Misbach Yusa Biran

Wikipedia Minangkabau - Lubuak aka tapian ilimu
Misbach Yusa Biran
Lahia11 September 1933
Lebak, Banten, Hindia Belanda
Maningga11 April 2012 (umua 78)
Tangerang Selatan, Banten, Indonesia
Karojo
  • Sutradaro
  • panulih
  • kolumnis
  • sastrawan
PasanganNani Widjaja (1969-2012)
AnakNina Kartika
Tita Fitrah Soraya
Cahya Kamila
Firdausi
Farry Hanief
(Almarhumah) Sukma Ayu

H. Misbach Yusa Biran (lahia 11 September 1933 – maningga 11 April 2012 pado umua 78 taun) adolah saorang sutradaro, panulih skanario, kritikuih film, sastrawan, sarato palopor dokumentasi film Indonesia.

Latar balakang[suntiang | suntiang sumber]

Misbach Yusa Biran lahia di Rangkasbitung, Lebak, Banten pado tanggal 11 September 1933. Inyo adolah anak dari pasangan Ayun Sabiran nan badarah Minangkabau jo Yumenah nan badarah Banten. Ayahnyo barasa dari Danguang-danguang, Lima Puluh Kota, Sumatera Barat, adolah saorang Digulis nan kamudian manjadi pamilik studio foto. Namo Misbach diagiah dek ayahnyo, nan tarinspirasi dari namo tokoh pargarakan Haji Misbach, sadangkan Yusa Biran ditambahan dek Misbach katiko inyo alah dewasa, nan marupoan namo pena ayahnyo, "Jose Beron".[1]

Misbach manyalasaian pandidikannyo di Taman Madya Bagian B, Paguruan Taman Siswa, Kemayoran, Jakarta.[2]

Karier[suntiang | suntiang sumber]

Film[suntiang | suntiang sumber]

Misbach mulai manyutradarai sandiwara katiko inyo masih basikola pado awal taun 1950-an. Salain itu, inyo sato manulih resensi film jo karya sastra. Salapeh lulus dari sakola, inyo mamiliah film sabagai jalan hiduiknyo. Tahun 1954-1956, Misbach bakarajo di Perusahaan Film Nasional Indonesia (Perfini) nan dikapaloi Usmar Ismail, mulonyo sabagai pancataik skrip, kamudian manjadi asisten sutradaro jo anggota sidang pangarang.[3] Inyo pernah pulo manjabat sabagai Direktur Pusat Perfilman H. Usmar Ismail Jakarta, anggota Dewan Film Nasional, jo Katua Umum Karyawan Film dan Televisi (1987-1991).[4]

Kagiatannyo di bidang film bamulo katiko inyo manjadi panulih skrip untuak film Puteri dari Medan (1954) nan disutradaroi D. Djajakusuma. Sataun kamudian, inyo manjadi pambantu sutradaro Usmar Ismail untuak film Tamu Agung (1955). Tahun 1955, Biran manulih skanario partamo cerpen Sjumandjaja nan bajudul Kerontjong Kemajoran, nan kamudian diangkek dek Persari manjadi film bajudul Saodah. Misbach acok bakarajo samo jo sutradaro Wim Umboh sabagai asisten sutradaro jo panulih skanario, contohnyo dalam film Istana Jang Hilang (1960), Djumpa Diperdjalanan (1961), Bintang Ketjil (1963), Matjan Kemajoran (1965), ...Dan Bunga-Bunga Berguguran (1970), jo Biarlah Kupergi (1971).[5]

Salamo taun 1957-1960, Misbach mambuek film singkek jo dokumenter, sarato manyutradarai babarapo film pado taun 1960-1972, diantaronyo bajudul Dibalik Tjahaja Gemerlapan (1967), nan manarimo pangharagoan untuak sutradaro tabaik dalam ajang "Pekan Apresiasi Film Nasional". Inyo juo mandapek pangharagoan skanario tabaik untuak film Menjusuri Djedjak Berdarah di ajang sarupo. Film lainnyo nan inyo tulih skanarionyo adolah Ayahku (1987), film nan disutradaroi Agus Elias iko dinominasian sabagai film skanario tabaik dalam ajang Festival Film Indonesia 1987. Karyanyo nan lain adolah Karena Dia (1979) nan mandapek nominasi sabagai skanario tabaik dalam ajang Festival Film Indonesia 1980.[6]

Pado taun 1971, Misbach mamutuihan untuak indak sato manyutradarai film karano inyo manulak untuak mandukuang industri perfilman nasional sangkek itu nan panuah dek produksi film porno. Pado maso itu, inyo hanyo manulih skanario untuak film Romansa (1970), Samiun dan Dasima (1970), Bandung Lautan Api (1974), Krakatau (1976), jo Tenggelamnya Kapal van der Wijck (1977).[5]

Kontribusi Misbach nan paliang gadang untuak perfilman nasional adolah mandirian Sinematek Indonesia pado taun 1975. Lambago iko barusaho mandokumentasikan film nasional sacaro independen. Inyo mamimpin Sinematek Indonesia sampai taun 2001. Sosoknyo bahkan manjadi identik jo lambago tasabuik. Misbach pernah manjadi Direktur Pusat Perfilman H Usmar Ismail Jakarta, anggota Dewan Film Nasional, jo Ketua Umum Karyawan Film dan Televisi (1986-1991).[7] Salain itu, inyo pernah juo manjadi dosen di Akademi Sinematografi LPJK sajak taun 1979 untuak mato kuliah Sajarah Film Indonesia jo Teknik Penulisan Skenario.[8]

Kapanulihan[suntiang | suntiang sumber]

Misbach aktif juo di dunia jurnalistik. Inyo sampaik manjabat sabagai Pamimpin Redaksi Minggu Abadi (1958-1959), Purnama (1962-1963), jo Redaktur Duta Masjarakat (1965-1966), Abad Muslimin (1966), sarato Gelanggang (1967).[9] Karya-karya sastranyo antaro lain bajudul Bung Besar (Drama, 1958, mandapek Hadiah Kedua Sayembara Penulisan Naskah Drama Kementerian Pendidikan dan Kebudayaan pado taun nan samo), Setengah Djam Mendjelang Maut (Drama, 1968), Menjusuri Djedjak Berdarah (Novel, 1969), Keajaiban di Pasar Senen (Kumpulan Cerpen, 1971), Oh, Film (Kumpulan Cerpen, 1973). Kaduo kumpulan cerpen iko dipasatuan di bawah judul Keajaiban di Pasar Senen, nan dicetak ulang pado taun 1996.[10]

Di sampiang itu, Misbach acok manulih buku tantang parfilman. Misbach maluncuan buku bajudul "Teknik Menulis Skenario Film Cerita" pado tanggal 30 Januari 2007.[11]

Pengharagoan[suntiang | suntiang sumber]

Pado taun 1993, Misbach manarimo Hadiah Seni dari Pamerintah RI.[12] Di umuanyo nan ampia 78 taun, Misbach nan mandapek pangharagoan khusus dari Forum Film Bandung ateh dedikasi jo kontribusinyo di dunia film, masih taruih bakarya malalui skanario nan ditulihnyo.[10]

Pado taun 2010, Misbach manarimo pangharagoan status Fellows dari Asosiasi Arsip Audiovisual Asia Tenggara-Pasifik (Southeast Asia-Pacific Audiovisual Archive Association, SEAPAVAA) di Bangkok, Thailand. Pangharagoan SEAPAVAA iko batujuan sabagai bantuak pengakuan untuak urang-urang lua biaso ateh kontribusi nan taramaik pantiang di bidang arsip audiovisual, sarato ateh kapemimpinan inyo dalam komunitaih profesional pangarsipan. Taruntuak Misbach, SEAPAVAA manyatoan sosoknyo adolah inspirasi untuak komunitas arsip film di Asia jo Pasifik. Pandiri Sinematek Indonesia iko adolah urang partamo nan manarimo Lifetime Achievement Award SEAPAVAA pado taun 1997.[13]

Kaluarga[suntiang | suntiang sumber]

Misbach manikah jo aktris Nani Widjaya pado taun 1969, nan dikaruniai anam urang anak. Duo anaknyo ikuik jajak amak apaknyo di dunia film, yaitu Cahya Kamila jo Sukma Ayu. Misbach adolah kakak dari sutradaro Ida Farida jo aktris Ani Hidayat.[14]

Misbach maningga pado tanggal 11 April 2012 akibaik sakik gangguan paru-paru. Inyo dikubuan di pamakaman Yayasan Al Ihiyah, Ciomas, Bogor, disabalah anak padusinyo, Sukma Ayu, nan maningga pado taun 2004.[15]

Filmografi[suntiang | suntiang sumber]

Sutradaro[suntiang | suntiang sumber]

Panulih skanario[suntiang | suntiang sumber]

Rujuakan[suntiang | suntiang sumber]

  1. ↑ "Misbach Yusa Biran. Bukan Haji dari Moskow". historia.id. 12 April 2012. Diakses tanggal 3 Januari 2024. 
  2. ↑ "Kisah Misbach Yusa Biran, pengarsip gambar hidup". antaranews.com. 31 Maret 2013. Diakses tanggal 3 Januari 2024. 
  3. ↑ "Profil Misbach Yusan Biran". sinematekindonesia.com. Archived from the original on 2013-10-27. Diakses tanggal 3 Januari 2024. 
  4. ↑ Rampan, Korrie (2000). Leksikon Susastra Indonesia. Jakarta: Balai Pustaka. ISBN 9796663589.  Hal 291.
  5. ↑ a b Indonesia, Sinematek (1979). Apa Siapa Orang Film Indonesia 1926-1978. Yayasan Artis Film dan Sinematek Indonesia. p. 310. OCLC 6655859. 
  6. ↑ "Misbach Jusa Biran di Indonesia Film Center". indonesiafilmcenter.com. Archived from the original on 2014-03-06. Diakses tanggal 5 Januari 2024. 
  7. ↑ "Tokoh perfilman Indonesia Misbach Yusa Biran wafat". bisnis.com. 11 April 2012. Diakses tanggal 5 Januari 2024. 
  8. ↑ Indonesia, Sinematek (1979). Apa Siapa Orang Film Indonesia 1926-1978. Yayasan Artis Film dan Sinematek Indonesia. p. 311. OCLC 6655859. 
  9. ↑ Damono, Sapardi Djoko (2006). Antologi Drama Indonesia. Jakarta: Amanah Lontar. p. 529. ISBN 9799985846. 
  10. ↑ a b "Misbach Yusa Biran". kapanlagi.com. Diakses tanggal 5 Januari 2024. 
  11. ↑ "Undangan Peluncuran buku "Teknik Menulis Skenario Film Cerita". rumahdunia.net. 26 Januari 2007. Archived from the original on 2007-06-25. Diakses tanggal 5 Januari 2024. 
  12. ↑ Dewan Redaksi Ensiklopedi Sastra Indonesia. (2004). Ensiklopedi Sastra Indonesia. Bandung: Titian Ilmu. ISBN 9799012120 hlm. 514
  13. ↑ "Misbach Yusa Biran Raih Penghargaan SEAPAVAA". tempo.co. 4 Agustus 2010. Diakses tanggal 5 Januari 2024. 
  14. ↑ "Misbach Yusa Biran". kemdikbud.go.id. Ensiklopedia Sastra Indonesia - Badan Pengembangan dan Pembinaan Bahasa, Kementerian Pendidikan dan Kebudayaan Republik Indonesia. Diakses tanggal 3 Januari 2024. 
  15. ↑ "Misbach Yusa Biran Dimakamkan Berdampingan dengan Putrinya". republika.co.id. 11 April 2012. Diakses tanggal 3 Januari 2024. 

Pautan lua[suntiang | suntiang sumber]

Pangharagoan dan prestasi
Didaului jo:
Bachtiar Siagian
Film : Turang
(1960) 		Sutradara Terbaik
(Festival Film Indonesia)
Film : Dibalik Tjahaja Gemerlapan
(1967) 		Digantian dek:
Wim Umboh
Film : Perkawinan
(1973)
Diambiak dari "https://min.wikipedia.org/w/index.php?title=Misbach_Yusa_Biran&oldid=3148431"