Umroh
Umroh (bahaso Arab: عمرة) adolah salah satu kagiatan ibadah dalam agamo Islam. Hampia mirip jo ibadah haji, ibadah iko dilaksanakan dengan caro malakukan babarapo ritual ibadah di kota suci Mekkah, khususnyo di Masjidil Haram.[1]
Pado istilah teknis syari'ah, Umrah bararti malaksanakan tawaf di Ka'bah jo sa'i antaro Shofa dan Marwah, sasudah mamakai ihram nan diambiak dari miqat. Acok disabuik pulo jo haji ketek.[1]
Pabedaan umrah jo haji adolah pado wakatu jo tampek. Umrah dapek dilaksanakan sawaktu-waktu (satiok hari, satiok bulan, satiok tahun) dan hanyo di Mekkah, sadangkan haji hanyo dapek dilaksanakan pado baberapo wakatu antaro tanggal 8 Dzulhijjah hinggo 12 Dzulhijjah sarato dilaksanakan sampai ka luar kota Mekkah.[2]
Katantuan
[suntiang | suntiang sumber]Syaraik
[suntiang | suntiang sumber]Syaraik untuak mangarajoan umroh sama jo syarat untuak mangarajoan haji:
- Baragamo Islam
- Baligh, jo baraka
- Meadeka
- Mampunyoi kamampuan, adonya bekal jo kandaraan, sarato anggaran
- Ada mahram (khusus untuak padusi)
Rukun
[suntiang | suntiang sumber]Rukun umroh adolah:
- Ihram, baniek untuak mamulai umrah
- Thawaf
- Sai
- Tahallul
- Tertib
Wajib
[suntiang | suntiang sumber]Adopun wajib umrah adolah:
- Malakukan ihram katiko handak mamasuki miqat
- Bertahallul jo caro manggundul atau mamotong sabagian rambuik
- Katarangan:
- Maninggaan rukun, mako umrohnyo indak sampurno dan wajib diulangi
- Maninggaan kawajiban, umrah tetap sah dan kasalahan tasabuik (maninggaan kawajiban) dapek ditutupi jo DAM
- Basatubuah sabalum tahallul mako wajib mambayia saikua kambiang
Jinih
[suntiang | suntiang sumber]Tadapek babarapo tipe umroh, nan umum adolah umroh nan digabuangan jo plaksanaan haji sarupo pada haji tamattu, adopulo umrah nan indak takaiik jo haji.
- Umrah Mufradah
- Umrah Tamattu'
- Umrah Sunah
Tata caro
[suntiang | suntiang sumber]Untuak tata caro palaksanaan umrah, mako paralu dipahatian hal-hal barikuik iko:
- Disunnahkan mandi wajib (janabah) sabalum ihram untuak umroh.
- Mamakai pakaian ihram. Untuak laki-laki 2 kain nan dijadian saruangjo salendang, sadangkan untuak padusi mamakai pakaian apo sajo nan manutuik aurat tanpa ado hiasannyo dan indak mamakai cadar atau saruang tangan.
- Niek umrah dalam hati, katiko sampai di miqot (bateh daerah tanah suci) sholat sunah duo rokaat dan mangucapkan Labbaika Allahumma 'umrotan atau Labbaika Allahumma bi'umrotin. Kamudian bertalbiyah dengan dikarehan suaronyo untuak laki-laki dan cukuik jo suaro nan didanga urang nan ado di sampingnyo dek padusi, yaitu mangucapkan Labbaikallahumma labbaik labbaika laa syarika laka labbaik. Innal hamda wan ni'mata laka wal mulk laa syarika laka.
- Jiko alah sampai kota Makkah, disunnahkan mandi talabiah dahulu sabalum mamasukinyo.
- Sasampai di Ka'bah, talbiyah baaranti sabalum thawaf. Kamudian manuju hajar aswad sambia manyantuahnyo jo tangan suok dan manciumnyo jiko mampu dan mangucapkan Bismillahi Wallahu Akbar. Jiko indak dapek manyantuah dan manciumyo, mako cukuik maagia isyaraik dan bakato Allahu Akbar.
- Thawaf sabanyak 7 kali putaran. 3 putaran partamo jalan capek dan sisonyo jalan biaso. Thowaf diawali dan diakhiri di hajar aswad dan Ka'bah dijadian barado di sabalah kida.
- Salat 2 rakaat di balakang maqam Ibrahim jiko dapek atau di tampek lainnyo di masjidil haram dengan mambaco surah Al-Kafirun pado rakaat partamo, kamudian mambaco surah Al-Ikhlas pado rakaat kaduo.
- Sa'i dengan naiak ka bukik Shofa dan manghadok kiblat sambia mangangkek kaduo tangan dan mangucapkan Innash shofa wal marwata min sya'aairillah. Abda'u bima bada'allahu bihi (Aku mamulai dengan apo nan Allah mamulainyo). Kamudian batakbir 3 kali tanpa maagia isyaraik dan mangucapkan Laa ilaha illallahu wahdahu laa syarika lahu. Lahul mulku wa lahul hamdu wahuwa 'alaa kulli syai'in qodiir. Laa ilaha illallahu wahdahu anjaza wa'dahu wa nasoro 'abdahu wa hazamal ahzaaba wahdahu sabanyak 3x. Kamudian badoa sakahandaknyo.
- Amalan pado poin 8 diulangi satiok putaran di sisi bukik Shofa jo Marwah disaratoi jo doa.
- Sa'i dilakukan sabanyak 7 kali dengan hituangan barangkek sakali dan kambalinyo dihituang sakali, diawali di bukik Shofa kamudian diakhiri di bukik Marwah.
- Mancukua saluruah atau sabagian rambuik kapalo bagi laji-laki dan mamotongnya sabateh ujuang jari bagi padusi.
- Dengan demikian salasai sudah amalan umroh.
Umroh dari Indonesia
[suntiang | suntiang sumber]
Indonesia marupoan negara muslim nan tabanyak di dunia, sakitar 80% panduduak Indonesia adolah muslim. Pado umumnyo masyarakat muslim Indonesia malaksanakan umroh manuju Masjidil Haram di Arab Saudi malalui travel umrah atau sabuah parusahaan travel atau biro pajalanan nan khusus manyalanggarokan jaso pajalanan umroh nan banyak taseba di Indonesia. Mereka manyadioan babagai fasilitas nan mamudahkan jamaah sahinggo konsentrasi jamaah hanyo pado palaksanaan ibadah umroh sajo di Masjidil Haram di Mekkah jo Madinah. Travel umroh bakarajo samo jo hotel di sakitaran Masjidil Haram sahinggo sangaik mamudahkan jamaah. Pado umumnya biro pajalanan umroh manatapkan babarapo paket umrah jo nan paliang minimal adolah 9 hari pajalanan dari Indonesia ka Arab Saudi dan baliak ka Indonesia.
Jemaah Umroh dari Indonesia
[suntiang | suntiang sumber]Pado 20 Desember 2016, Menteri Agama (Menag) Lukman Hakim Saifuddin mamaparkan bahwasanyo panyalanggaraan umroh pado tahun 2016 mangalami paningkatan dari tahun sabalumnyo. Maningkeknyo peserta salain karano kasadaran dan antrian haji nan panjang, juga dikaranoan batumbuahnyo ekonomi masyarakaik. Baliau juga mangungkapkan potensi paputaran pitih masyarakaik nan mancapai triliunan rupiah dan mambuek dampak bagi sektor ekonomi sacaro langsuang sarupo sektor panerbangan, perbankan jo leasing, asuransi, jo industri rumah tangga barupo panyadioan palengkapan umroh.
Paparan itu maliputi palaksanaan umroh dari November 2015 sampai Juni 2016. Ado 584.924 anggota jamaah umrah di pariode tasabuik. “Dengan asumsi harago nan murah, Rp 20 juta, paputaran pitih mancapai triliunan rupiah,” ungkap Lukman. Dipakiroan sampai akhia 2016, total anggota jamaah umroh bakisar 810.000 urang. Jumlah iko labiah banyak katimbang tahun sabalumnyo, yakni sakitar 710.000 urang.
Salain itu palaksanaan umroh salanjuiknyo diharapkan akan labiah rancak lai karano kini tasadio aplikasi lewat ponsel nan mamungkinkan jamaah malaporkan babagai kaluahan. Ado dua aplikasi di ponsel Android, yakni aplikasi Umroh Cerdas dan aplikasi SIMPU Online (Sistem Informasi Manajemen dan Pelaporan Umrah). Aplikasi Umroh Cerdas diparuntuakkan untuak masyarakaik lueh untuak mamparoleh informasi tentang panyalenggaraan pajalanan ibadah umroh sarato manyampaikan aduan. SIMPU Online adolah sistem panyambuang informasi antaro Kementerian Agamo, PPIU (Panyalanggara Pajalanan Ibadah Umroh),provider visa, sarato saluruah instansi takaik umrah nan takoneksi sacaro online sabagai pusek kandali kasado kagiatan umrah.[3]
Jamaah Umrah Indonesia salamo jo pasca Pandemi Covid-19
[suntiang | suntiang sumber]Sajak pandemi Covid-19 di awa tahun 2020 bakambang di Arab Saudi jo Indonesia, umroh untuak jemaah Indonesia pun ditutuik. Banyak travel haji umroh nan bangkrut.
Tahun 2021, umroh bagi jamaah Indonesia dibukak baliak dan mulai tahun 2022 jamaah Indonesia kembali ramai mamanuahi Arab Saudi, tacatat sapanjang 2022 ado 2 juta jamaah umrah nan datang ka Arab Saudi dan jamaah tabanyak ditempati dek Indonesia dengan 551.410 jamaah.
Rujuakan
[suntiang | suntiang sumber]- ↑ a b Madjid, Nurcholish (2008). Perjalanan Relogius 'Umrah dan Haji. Jakarta: PARAMADINA. pp. 3-4. ISBN 979-523-937-6.
- ↑ Liputan6.com (2019-01-17). Mandasari, Rizky, ed. "Tata Cara Umroh dan Bacaannya, Wajib Tahu Sebelum Berangkat ke Tanah Suci". Liputan6.com (dalam bahasa Indonesia). Diakses tanggal 2019-06-21.
- ↑ "Salinan arsip". Diarsipkan dari versi asli tanggal 2017-06-01. Diakses tanggal 2017-05-12.