Tari Alang Babega

Tari Alang Babega marupokan salah satu tarian tradisional minangkabau,tari ko acok ditampilkan pado acara-acara adaik. Gerakan tari alang babega ko didapek dari maliek alam sekitar, karano gerakan nyo maniru gerakan buruang alang nan manukik untuak manyemba mangsa nyo. Sarupo jo papatah minang, alam takambang jadi guru yaitu apo nan ado di alam dapek awak jadikan pelajaran bahkan manjadi karya seni contoh nyo tari alang babega ko.

Tari ko dapek dilakukan dek panari tunggal maupun bakalompok, tagantuang formasi panari nyo. Musik nan mairiangan tari ko tamasuak musik nan sumangaik, sabab tu tari ko cocok bana ditarikan dek urang mudo-mudo. Pakaian nan dipakai pun bawarna cerah untuak manambah sumangaik sarato sabagai simbol baso tari ko marupokan tari untuak basanang-sanang.