Tadashi Maeda

Tadashi Maeda

Namo dalam bahaso usali	(ja) 前田精
Biografi
Lahia	3 Maret 1898 Prefektur Kagoshima (id)
Kamatian	13 Desember 1977 (79 tahun (id) ) Japang
Almamater	Imperial Japanese Naval Academy (en)
Kagiatan
Karajo	Anggota angkatan basanjato
Kesetiaan (id)	Kakaisaran Japang
Cabang militer (id)	Angkatan Laut Kekaisaran Jepang (id)
Pangkat militer (id)	Laksamana
Kaluarga
Sanak saibu/sabapak	Minoru Maeda (en)

Laksamana Mudo Tadashi Maeda (前田 精 Maeda Tadashi, 3 Maret 1898 - 13 Desember 1977) adolah surang pajabaik tinggi Angkatan Lauik Kakaisaran Japang, pado maso Parang Dunia II. Tokoh iko baparan pantiang dalam paristiwa pasiapan kamardekaan Indonesia, dek di rumahnyo disusun naskah proklamasi kamardekaan Indonesia, nan kudian dibacoan pado tanggal 17 Agustus 1945. Di kamudian ari, Maeda manarimo Bintang Jasa Nararya dari Pamarentah Indonesia.

Maso awa

Maeda laia di kampuang Kajiki (kini ko Kajiki-cho, Aira) di Prefektur Kagoshima, di pulau Kyushu. Sikola manangahnyo diambiaknyo pulo di Kajiki, alah tu masuak pandidiakan Marinir Japang, angkatan ka-46. Kawan saangkatannyo antaro lain Pangeran Takehiko Yamashina dari kaluargo Kakaisaran Japang.

Karir

Pado 21 November 1918, Maeda luluih pandidiakan Marinir tasabuik. Bulan Agustus taun barikuiknyo, Maeda naiak pangkek jadi Letnan, dan batugeh sabagai atase maliter di Kadutaan Besar Japang di Den Haag, Balando. Kudian Maeda batugeh di Kamantrian Angkatan Lauik Japang manguruih tugeh-tugeh maliter manganai Batavia.

Pado taun 1945, Maeda lah bapangkek Laksamana Mudo jo ditampekan di Jakarta, sabagai perwira maliter paubuang antaro antaro Angkatan Darek jo Angkatan Lauik Japang. Salain itu, Maeda manjabaik pulo sabagai Kapalo Kantua Pawakilan Asrama Mahasiswa USI (Unitas Studiosorum Indonesiensis), nan mambari palajaran patriotisme jo maliter kapado para pamudo Indonesia.

Maso pasiapan proklamasi

Pado 16 Agustus 1945, atau satu ari satalah kakalahan rasmi Japang dalam Parang Pasifik, balansuang rapek pasiapan kamardekaan Indonesia nan diadoan di rumah kadiaman rasmi Maeda ateh isinnyo. Rapek dimulai jam 11 malam, balansuang inggo jam 2 pagi bisuak arinyo tanggal 17 Agustus. Ado 50 urang nan ikuik dalam rapek tu. Jam 3 pagi kutiko para pamimpin Indonesia Soekarno, Hatta, jo Ahmad Soebardjo manyusun kato-kato proklamasi, pihak Japang indak sato ikuik, dek maoromaiki kaputuihan dari Japang nan lah manyarah ka Sakutu. Pado jam 10 tanggal 17 Agustus 1945, Proklamasi Indonesia dibacoan dek Soekarno di adapan para hadirin nan ado di rumah Maeda tu.

Jam 3 pagi tu, Maeda tamasuak nan udua diri naiak ka lantai duo rumahnyo untuak tidua. Sabalun rapek balansuang, Maeda lah maubuangi Mayor Jenderal Yamamoto pamimpin Angkatan Darek Japang, nan manulak untuak mandukuang rapek tu karano takuik malangga saraik-saraik panyarahan kakalahan nan lah disapakati antaro Japang jo Sakutu. Dalam panyataanyo jauah ari sasudah tu, Maeda bakato baso tindakan tu untuak manjago supayo pangumuman Proklamasi Indonesia indak dapek dianggap sabagai adiah dari pihak Japang, tapi sabana dek karano usao para pamimpin Indonesia sandiri nan manulak barado di bawah pamarentahan bangso lain.

Satalah parang baakia

Pado bulan April 1946, Maeda ditakok dek Sakutu jo dipinjaro di pinjaro Glodok. Kudian basamo tawanan perwira Japang lainnyo, Maeda dibao ka Singapura untuak diadili dek parannyo nan dianggap gadang dalam kajadian proklamasi tasabuik. Maeda ditahan Sakutu inggo 1947, kudian pulang ka Japang. Sasampai di Japang, Maeda diadili juo dek mahkamah maliter Japang, namun diputuih indak basalah. Maeda kudian baranti dari maliter dan manjalani iduik sabagai rakyaik biaso sajo.

Pamarentah Indonesia maanugerahan Bintang Jasa Nararya kapado Maeda pado parayaan 17 Agustus 1977, nan disarahan dek Duta Besar Indonesia Witono.

Tadashi Maeda wafaik indak lamo sasudah tu, iyolah tanggal 13 Desember 1977.