Sirompak

Wikipedia Minangkabau - Lubuak aka tapian ilimu
Loncat ke navigasi Loncat ke pencarian

Sirompak adolah sabuah tradisi nan lahia dari Nagari Taeh Bukik, Kecamatan Guguak, Kabupaten Lima Puluh Kota. Tradisi Sirompak dikana jo tradisi ritual nan manyanyian syair jo manto untuak mamikek lawan jinih. Syair sirompak indak sumbarang syair, dek syairnyo barisi manto untuak mambuek lawan jinih tagilo-gilo malah sampai mamanjek-manjek dindiang. Sirompak aratinyo "mamaso", dapek dikecekan sirompak sabuah ilmu guno-guno nan dinyanyian jo syair nan barisi manto untuak mamaso lawan jinih jo kakuatan gaib. Sirompak ko diiriangi jo gasiang sarato alaik musik saluang nan tanamo jo saluang sirompak.[1]

Sijarah[suntiang | suntiang sumber]

Sirompak bamulo dari surang padusi nan banamo Puti Losuang Batu nan mancacek Sibabau sainggo Sibabau sakik ati. Untuak mailangan sadiah atinyo, Sibabau badendang sambia maambuih saluang. Dendang nan dinyanyian dek sibabau marupokan dendang manto pamikek nan digunoan dek dukun-dukun pelet. Suatu katiko, Sibabau mandatangi dukun untuak mamintak tolong mamikek Puti Losuang Batu. Ritual ko baru dapek dilakukan kok syaraik nan dimintak dek dukun alah langkok. Syaraik-syaraiknyo antaro lain: gasiang tangkurak, banang pincono, talua, kumanyan, jo daun siriah. Katiko sadoalahnyo langkok, barulah dukun mamulai ritual. Ritual dimainan tangah malam sambia badendang jo maambuih saluang, dek itulah saluangnyo banamo saluang sirompak.[2]

Saluang Sirompak[suntiang | suntiang sumber]

Saluang Sirompak adolah sabuah alaik musik nan dimainan jo caro diambuih. Saluang Sirompak tabuek dari batuang nan tadiri dari limo buah lubang, di ma tiok lubangnyo banamo, antaro lain: Simambang Hitam, Simambang Putiah, Simambang Sirah, Simambang Tungga, jo Simambang Barantai nan dipicayoi maisi kalimo lubang nan ado pado saluang. Alunan nada nan babunyi dari saluang nan diiriangi dek manto-manto ko nan mambuek Puti Losuang Batu tadi tagilo- gilo ka Sibabau.[3]

Caliak pulo[suntiang | suntiang sumber]

Rujuakan[suntiang | suntiang sumber]

  1. https://www.liputan6.com/regional/read/2404254/perkenalkan-sirompak-pelet-asmara-asal-payakumbuh
  2. https://hot.detik.com/art/d-3412815/asal-usul-sirompak-dari-ilmu-pelet-hingga-tengkorak-kepala-manusia
  3. https://sumbar.antaranews.com/berita/216936/alunan-magis-sirompak-di-langit-payakumbuh