Siriah gadang

Siriah gadang adolah ragam hias atau motif ukiran tradisional Minangkabau. Motif iko mangambaan bantuak daun siriah nan gadang.

Sijarah

Ukiran tradisional Minangkabau maambiak gambaran kahidupan atau bantuak nan ado di alam. Cikal bakalnyo dapek ditelusuri dari tinggalan maso megalitik barupo menhir di Maek, Kabupaten Lima Puluh Kota. Guratan garih luruih, langkuang, jo geometris marupoan bantuak dasar nan umum basobok.

Motif siriah gadang punyo pola dasa barupo sulur atau guratan garis malungkuang.

Siriah gadang marujuak pado daun siriah nan gadang. Siriah marupoan tanaman nan tumbuah marambat atau basanda pado batang pohon lain. Tanaman iko dapek basobok di wilayah Sumatra jo lekat dalam kehidupan sehari-hari masyarakat.

Rancangan

Motif siriah gadang tardiri ateh duo garih malangkuang ka dalam nan saling bahadokan pado sumbu vertikal. Motif iko marupoan bagian dekorasi pado bangunan tradisional Minangkabau, takah rumah gadang, balai adat, jo surau. Motif iko maisi bidang gadang pado dindiang lua, dikombinasian jo motif-motif takah kaluak paku, pucuak rabuang, kuciang lalok, lapiah jarami, jo jalo-jalo.

Bangunan tradisional Minangkabau nan punyo ukiran motif siriah gadang di antaronyo yakni Istano Silinduang Bulan di Kabupaten Tanah Datar.

Pamaknaan

Makna motif siriah gadang dikaikan jo filosofi sirih dalam kahidupan masyarakaik Minangkabau. Siriah dianggap sabagai lambang karamahtamahan. Sijarawan William Marsden mancatat, urang Sumatra selalu mambaok parsediaan siriah langkok jo selalu maidangannyo pado tamu. Bagi tamu nan maambiak siriah jo mangunyahnyo, maka hal itu dipandang sabagai panghargaan ka tuan rumah.

Di Minangkabau, tradisi maidangan siriah jo mengunyah siriah ado di babagai acara adat, bahkan manjadi salah satu syaraik palangkok. Siriah diidangan sawaktu mamulai acara atau mambukak pembicaraan. Idangan siriah dilatakan dalam wadah kuningan banamo carano basamo kapur, buah pinang, jo gambia.