Silek tuo

Silek Tuo adolah kasenian untuak mambela diri nan manganuik ajaran syatariah. Silek iko mambuek garakan nan barasa dari Al-Qur’an. Silek tuo ko adolah silek nan paliang tuo nan maadoan aliran-aliran silek baru sasudahnyo. Silek tuo barangkek dari Al-Qur’an mako garakan silek tuo taliek cayah jo lapang, tapi sulik untuak disarang.

Dalam latak sarang tangkih tajadi tigo latak bantuak di antaronyo, latak mampan mukasuiknyo musuah dapek kasampatan untuak manyarang, latak kaduo, latak kepoh mukasuiknyo maagiah panciangan kapado lawan untuak manyarang, samantaro awak alah siap untuak mananti jo mambaleh musuah, latak katigo, latak sukun mukasuiknyo latak tampek garak manangkih sacaro tatutuik.

Pakaro tapantiang dalam silek tuo ko yo itu antaro kudo-kudo jo pitunggua sangaik babedo, silek tuo indak mampunyoi kudo-kudo, nan labiah di caliak an latak kaki indak kuek. Ado pulo babarapo cara tangkok dalam silek tuo ko, antaronyo, tangkok mati adolah sarangan indak dapek ditangkih musuah, nan kaduo tangkok patah adolah manyarang dapek mamatahan anggota tubuah musuah umpamonyo, kaki, tangan, tamariah, pinggang. Katigo tangkok muntah, iolah sarangan mambuek lawan muntah, umpamonyo mancakiak tamariah, manyarang paruik. Salanjuiknyo tangkok ibo bisa juo disabuik lapeh, iolah sabalum sarangan musuah tibo pado mukasuik, si panangkih babuek patahanan taradok sarangan tu.