Si Patai
Si Patai adolah sosok dari Pauh, Padang, nan tercatat dek Balando sabagai salah saurang bandit (urang bagak) tanamo di Kota Padang. Si Patai manjadi buah tutua urang Padang, khususnyo urang tuo-tuo di Pauh dek karano pabuatannyo bagi kolonial Balando sabagai bandit tapi bagi urang Padang sabagai pahlawan. Satidaknyo, Si Patai malenggang dalam dunia sastra berkat tulisan A.A. Navis dan Rusli Amran, man manjuluakkan inyo sabagai "Robin Hood" Padang.
Lata Balakang[suntiang | suntiang sumber]
Indak ado riwayaik hiduik nan jaleh dari Si Patai, baitu juo urang-urang bandit nan dikaja dek kolonial Balando. Namun, maso itu iolah perlawanan urang Minang terhadap Balando nan sakananyo mambuek peraturan sarupo Belasting nan mambuek Siti Manggopoh malawan.[1] Di sampiang itu, kabijakan monopoli kopi Balando itu indak banyak lai manambah kauntungan dalam baniago dek komoditas itu indak laku bana lai di pasaran dunia. Kamunduran ekonomi nan malanda juo Kota Padang pado akhir abad ka-19, mambuek banyak urang malarek baralih karajo manjadi bandit. Pauh dan Koto Tangah manjadi sarang perlawanan di kota Padang pado maso itu. Muncualah namo-namo sarupo Si Rancak, Buyuang Tupang, Galuang, Mara Otong dan lain-lain.
Si Rancak manjadi parhatian Balando sajak 1880, satiok dikaja inyo dapek lolos dari urang Balando. Si Rancak mangumpuaan banyak pangikuik dan basambunyi di babagai tampek di kota Padang, sahinggo urang Balando susah mancari inyo. Si Rancak nan pandai basilek itu akhianyo kalah ditembak malawan Marah Pense nan babadia di Manggopoh dan jatuah ka tabek, sadang badarah itulah inyo lalu ditangkok Balando, maningga dalam parjalanan ka Padang dek habih darahnyo.[2] Kawannyo Galuang dan Baruak ditangkok sasudah adu silek jo Kabuik nan ilmunyo labiah tinggi dari duo urang itu. Galuang dan Baruak manuruik jo Kabuik untuak disarahan ka Balando. Marah Pense jo Kabuik iko kudian mandapek hadiah dan pangkek dari Balando. Pado 1 Maret 1902, sabagai paringatan bagi bandit-bandit nan baserak di Kota Padang, Rajo Ageh basamo limo anak buahnyo nan tatangkok dihukum gantuang sampai mati di Plein van Rome (kini Lapangan Imam Bonjol).[2]
Riwayat Si Patai[suntiang | suntiang sumber]
Suatu ari, Si Patai bacakak jo anak saurang tuanku lareh, anak itu mati. Tuanku lareh nan kalap dek acok kalah bajudi manangkok Si Patai dan manyeso inyo dalam panjaronyo. Di panjaro itu konon inyo baguru dari tahanan lain urang Bugih dan Banten. Katiko ilmunyo diraso cukuik, Si Patai kabua dari panjaro dan manatok di Pauh.[3] Si Patai, basamo Buyuang Tupang, Palalok dan Sampan, manjadi incaran Balando pado awal abad ka-20. Manuruik carito pado maso itu, Si Patai acok masuak kalua kota Padang. Iindak ado nan barani malapor ka kolonial Balando, sabab katiko ado nan malapor di siang ari, rumahnyo kanai api di malam ari. Dek tasohor namonyo itu, urang sanantiaso manyabuik Si Patai apobilo tajadi maliang jo begal. Akhianyo Si Patai manjadi musuah nomor satu kolonial Balando di Padang[3]
Perlawanan sarupo Belasting menjadi alasan Balando mamasuakkan Si Patai sabagai gerakan perlawanan disampiang sabagai bandit. Suatu ari, urang Balando mandapek kaba baso Si Patai dan kawannyo Sampan singgah di lapau Maanjang di Aia Pacah. Iko mambuek urang Balando takajuik, dek karano Maanjang alah diamanan dek alah tau Si Patai acok basambunyi di sinan, tapi inyo barani ka situ baliak. Pado pukua 12 malam, 35 pasukan datang mangapuang lapau itu hanyo demi duo urang. Pado pukua 4, Si Patai kalua manyarang pasukan itu, namun ditembak dari jarak dakek.[4] Inyo nan masih iduik jo Sampan diarak urang Balando dan dipanjaro salamo tigo taun. Sasudah lapeh panjaro indak jera Si Patai. Inyo dikabaan ikuik Sarekat Djin pado 8 Mei 1926 sabagai pamimpin di Pauh basamo 40 anggota lainnyo.[5] Sajak itu, urang Balando mancatat banyak parangai Si Patai nan marugikan Balando. inyo pun mambuek rusuah baliak ka Balando di Pauh, mambunuah pagawai kolonial, malempa bom, dan mangancam masuak ka kota Padang (maso kolonial, Kota Padang masih sabateh Balantuang hinggo Batang Arau), walau gerakannyo dapek dialau dakek Alai.[2]
Pado 9 Januari 1927 tajadilah sarangan ka bivak tentara dakek Pasar Ambacang di Padang. Konon, Si Patai sabananyo indak satuju sarangan iko dipabuek, tapi anak buahnyo mamasoan pakaro itu. Kajadian itu ditunggu-tunggu dek Mayor Rhemrev (Vermehr?) sabagai alasan untuak malancaran sarangan akhia ka Si Patai dan kawan-kawannyo. Mulonyo, dari bantuan mato-mato lokal, urang dakek Si Patai ditangkok, sarupo Pakih Tahir, sapupunyo, hinggo pambantunyo Lawai/Laweh. Akhianyo, pado malam ari tanggal 3 Februari 1927 Si Patai dikapuang dek Balando di Pauh, dan mati di tangan Sersan Klas I Lintong.[2] Jasadnyo dipancuang, kapalonyo ditusuak dan manjadi tontonan dek Balando. Hasjim Ning, saudarar tanamo di Padang, mancaritoan kesaksiannyo:
"Si Patai saurang pambarani dari Pauh, desa bagian utara Kota Padang. Si Patai adolah Kapalo pambarontak malawan Balando. Inyo telah banyak mambunuah tantaro dek parangnyo. Tantaro akan gantar dan lari lintang pukang bilo bahadapan jo inyo." Pasang surut pengusaha pejuang: otobiografi Hasjim Ning
Warisan[suntiang | suntiang sumber]
Di tangah-tangah suasana pemberontakan Kuminih taun 1926-1927 di Minangkabau, Leo Hulsman, saurang wartawan Balando, maliput Si Patai langsuang ka Padang. Manuruiknyo, Si Patai alah manjadi lagenda urang Padang, bagaikan Robin Hood. Inyo manjadi buah tutur urang Pauh sakitarnyo dek diadang pasukan Balando. Ado carito, Si Patai singgah ka sabuah rumah dan mambaia sabanyak 25 Rupiah untuak samalam di surambinyo. Uang itu dipakai urang sarumah untuak makan basamo. Katiko garaknyo tabaco musuah, inyo dari surambi buliah langsuang kabur dengan mudahnyo. Bagi urang Pauh zaman dahulu, Si Patai dikaitkan jo pambarani, ahli beladiri, banci jo urang Balando, dan banyak ilmunyo. Hulsman manulih tantang Si Patai iko sabalun inyo tatangkok pado 3 Februari itu.[3]
Saketek urang nan manulih riwayaiknyo, tapi duo sejarawan manulih tantang inyo. Rusli Amran dalam Padang Riwayatmu Dulu manulih satu bab tasandiri tantang bandit Si Rancak dan Si Patai, dek pangalamannyo jo urang Pauh nan masih banyak bacarito lagenda itu. Amran manakanan peran Si Patai sabagai urang nan bajaso bagi Pauh, sahinggo panduduaknyo indak mudah manyarahan inyo ka Balando, sadang urang Balando kalang kabuik dek parangai Si Patai dan kawan-kawannyo[2] A.A. Navis, di sisi lain, mambuek cerpen sejarah tantang Si Patai, di mano saurang tuanku lareh nan anaknyo dibunuah Si Patai manyimpan dandam ka inyo, lalu mangadu ka Balando bia inyo ditangkok dan dihukum mati. Bagitu suliknyo Si Patai ditangkok hinggo tuanku lareh manyaranan bia Marsose datang manyarabu inyo. Marsose iko takenal dek panumpehan perlawanan Rakyat Aceh nan silam. Akhianyo Marsose mangapuang Pauh, mambunuah urang nan dianggap Si Patai dan manancokkan kapalonyo di kayu. Tuanku lareh indak mandapek kapalo Si Patai, tapi residen Sumatra Westkust manganggap baso pakaro Si Patai alah usai walau nan tabunuah hanyo kawannyo nan mirip, Ujuang Patai.[3]
Panunjuak[suntiang | suntiang sumber]
- ↑ https://indonesiadefense.com/siti-manggopoh-pemimpin-perang-belasting-dari-ranah-minang/
- ↑ a b c d e Rusli Amran, Padang Riwayatmu Dulu (Jakarta: Yasaguna, 1988) hlm. 112-117
- ↑ a b c d A.A. Navis, "Rekayasa Sejarah Si Patai", Kumpulan Cerpen A.A. Navis (tanpo taun, tanpo panarabik).
- ↑ https://historia.id/politik/articles/sarekat-djin-melawan-belanda-P1B4O/page/2
- ↑ Mestika Zed, Pemberontakan Komunis Silungkang 1927: Studi Gerakan Sosial di Sumatera Barat (Yogyakarta: Syarikat Indonesia, 2004).