Saturnalia

Wikipedia Minangkabau - Lubuak aka tapian ilimu
Loncat ke navigasi Loncat ke pencarian
Saturnalia
Saturnalia
Kaadaan Saturnalia (1783) nan digambaran dek Antoine Callet
DirayoanRomawi
JinihAgamo Romawi klasik
MukasuikFestival publik
Tangga17–23 December
ParayoanPesta, batuka peran, maagiah hadiah, judi
KagiatanPangorbanan jo pajamuan umum untuak dewa Saturnus; mamakai Pileus

Saturnalia adolah festival Romawi kuno untuak manghormati dewa Saturnus, nan diadoan pado tanggal 17 Desember di kalender Julian inggo 23 Desember. Parayoan dilakuan di Kuil Saturnus, di Forum Romawi, jo di pajamuan umum. Jinih parayoannyo sarupo batuka hadiah, bapesta taruih-manaruih, bajudi jo suasano karnaval nan maubah norma sosial sosial Romawi. Kabiasoan nan umum adolah pamilihan "Rajo Saturnalia", nan akan mamarintah urang-urang jo harus diikuikan. Hadiah nan dipatukaan biasonyo patuang ketek nan tabuek dari lilin atau tambika nan disabuik sabagai sigillaria. Panyair Catullus manyabuik hari parayaoan tu sabagai "hari paliang elok".[1]

Saturnalia dirayaoan salamo bulan Attik Hekatombaion pado patangahan musim paneh. Manuruik sabagian urang Romawi, Saturnalia adolah simbol pambebasan jiwa ka dalam kaabadian. Saturnalia mungkin alah mampangaruhi sajumlah kabiasoan parayoan di Eropa Barat nan tajadi di patangahan musim dingin, khususnyo tradisinan takaik jo Natal, Feast of the Holy Innocents, jo Epifani. Sacaro khusus, tradisi Natal Eropa Barat nan mamiliah "Lord of Misrule" mungkin baaka ka parayoan Saturnalia.[1]

Asa Mulo[suntiang | suntiang sumber]

Saturnalia sacaro kasaluruhan indak dijalehan dari awal inggo akhia di dalam sumber kuno. Pamahaman modern tantang festival ko disatuan dari sajumlah kaisah nan bahubuangan jo banyak aspek. Saturnalia adolah latar dramatis karya Macrobius, saurang panulih Latin dari zaman kuno nan marupoan sumber utamo informasi tantang festival ko. Dalam sabuah interpretasi karya Macrobius, Saturnalia adolah festival cahayo nan mangarah ka titiak baliak matoari musim dingin, lilin dilambangan sabagai pancarian pangatahuan jo kebenaran. Pambaruan cahayo jo kadatangan taun baru dirayouan di Kakaisaran Romawi, Dies Natalis Solis Invicti, jo "Ulang Taun Matoari nan Indak Takalahan", pado 23 Desember.[2]

Popularitas Saturnalia balanjuik inggo abaik ka-3 jo ka-4 M, sarato katiko Kakaisaran Romawi barado di bawah kakuasaan Kristen. Banyak kabiasoan di Saturnalia nan disusun baliak jo mampangaruhi parayoan musiman Natal jo taun baru. Saturnalia mangalami reformasi gadang pado 217 SM, sasudah Patempuran Danau Trasimene, katiko Romawi mangalami kakalahan dek Carthage salamo Parang Punisia Kaduo. Sasudah bakonsultasi jo buku-buku Sibilin, inyo mangadopsi "ritus Yunani", nan mangenalan parayoan nan dilakuan jo caro Yunani. Parayoannyo sarupo pajamuan umum, jo mamakiakan io Saturnalia nan manjadi ciri khas parayoan tasabuik.[3]

Kagiatan[suntiang | suntiang sumber]

Bagian peilipis utamo patuang Saturnus biasonyo diikek jo wol untuak manandoan kebebasan dalam hari Saturnalia. Ritual resmi dilakuan sasuai jo ritual Yunani (ritual graecus). Pangorbanan dirsesmian dek saurang imam nan kapalonyo indak tatutuik. Dalam ritual Romawi, saurang imam mangorbanan capato velato nan kapalonyo ditutuik jo togan khusus nan dilipek. Prosedur ko biasonyo dijalehan dek asimilasi Saturnus nan bamitra dari Yunani, Cronus. Urang-urang Romawi acok mangadopsi jo manafsiran baliak mitos-mitos Yunani, ikonografi, jo bahkan praktik kaagamaan untuak dewanyo surang. Katiko kapalo imam indak ditutuik toga, bisa manjadi kabalikan dari sasuatu nan normal.[4]

Sasudah pangorbanan, Senat Romawi maatua sabuah lectisternium, yaitu sabiah ritual asa Yunaninan biasonyo malatakan gambar dewa di sofa mewah, saolah-olah dewa tibo jo aktif dalam Saturnalia. Pajamuan umum (convivium publicum) pun dilakuan sasudah itu. Saturnalia adolah hari libur untuak sadolah karajo. Sakolah ditutuik, kagiatan olahraga dibarantian, pangadilan indak ado sidang, jo indak ado deklarasi parang nan dibuek di hari tu. Sasuah ritual publik, parayoan dilanjuikan di rumah. Pado tanggal 18 jo 19 Desember, nan marupoan hari libur publik, satiok kaluargo mangadoan parayoannyo. Inyo mandi labiah capek jo mangorbanan babi untuak dewa bumi.[5]

Parayoan[suntiang | suntiang sumber]

Saturnalia ditandoi dek parilaku nan batuka. Budak dijamu dek makannan nan biasonyo hanyo buliah dimakan dek tuannyo. Tuan jo budaknyo pun makan basamo, ado pulo sumber kuno nan manyabuikan basonyo tuanyo lah nan manyajian makanan tu ka budaknyo. Katiko Saturnalia, budak diizinan pulo untuak indak manghormati tuannyo tanpa adonyo ancaman hukum.[6]

Toga, pakaian khas warga negara Romawi nan laki-laki disiapan untuak pakaian katiko makan malam dek karano warnanyo nan warna-warni dianggok labiah lamak digunoan katiko malam. Urang Roma nan bastatus warga negara biasonyo indak manggunoan panutuik kapalo, tapi untuak Saturnalia manggunoan pilleus, topi karucuik nan manandoan basonyo urang tu bebas. Budak manggunoan topi nan samo untuak manandoannyo sabagai budak nan bebas. Salain laki-laki Romawi, nan padusinyo ikuik pulo marayoan Saturnalia. Nan padusi labiah bebas basosial jo nan laki-laki, tamasuak adonyo padusi panghibur katiko tu.[7]

Bajudi[suntiang | suntiang sumber]

Biasonyo bajudi dilarang untuak sadolah rakyaik, tamasuak budak. Tapi katiko Saturnalia, sadolah urang buliah bajudi manggunoan koin. Tuan jo budak dudak basamo untuak bajudi. Saluruah kota manjadi tampek hiburan nan rami jo hiruak-pikuak. Namun ado rumah-rumah tapalosok di vila Laurentine nan dijadian tampek baistirahat dari malam nan rami tu. Di rumah tu indak akan ado urang-urang nan mamakak, bajudi, basorak-sorak jo nan mambuek karamian.[4]

Batuka Hadiah[suntiang | suntiang sumber]

Pada tanggal 19 Desember katiko Saturnalia manjadi hari batuka hadiah. Hadiah nan dipatukaan biasonyo sarupo patuang-patuang tambikar atau lilin nan disabuik sigillaria nan khusus dibuek untuak hari tu. Anak-anak manarimo hadiah mainan dari urang-urang. Salain patuang jo mainan, ado pulo hadian lain nan dipatukaan sarupo dadu, buku ketek, kotak pitih, sikek, tusuak gigi, topi, pisau baburu, kapak, lampu, bola, minyak arum, pipa, babi, sosis, buruang beo, meja, galeh, sendok, pakaian,jo topeng. Bos atau urang nan bapangkek biasonyo maagiahan gratifikasi (sigillaricium) ka klien atau bawahannyo untuak manolongnyo mambali hadiah.[8]

Io Saturnalia[suntiang | suntiang sumber]

Ungkapan io Saturnalia adolah teriakan khas atau salam festival, awalnyo dimulai sasudah pajamuan umum pado 17 Desember. Kato seru io (Yunani ἰώ, ǐō) dibaco jo duo suku kato (i pendek jo o panjang) atau sabagai suku kato tunggal (i manjadi konsonan Latin j nan dibaco yō). Io Saturnalia manjadi saruan ritual nan emosional. Biasonyo digunoan aktiko maumuman kamangangan atau marayoan Bacchus, tapi bisa jo untuak manandoi sabuah lawakan.[3][4]

Sasudah Saturnalia[suntiang | suntiang sumber]

Sasudah diapuih dari kalender resmi, Saturnalia balanjuik manjadi parayoan sekuler lamo. Sarupo nan ditulih dek William Warde Fowler, Saturnalia alah maninggaan jajaknyo di kabiasoan abaik patangahan jo modern nan tajadi sakitar titiak baliak matoari musim dingin. Wakatu itu, tanggal kalahiran Yesus nan sabananyo indak dikatahui tanggalnyo, tapi pado abaik kaampek Masehi, Paus Julius I (337-352) maresmian tanggalnyo dirayoan pado 25 Desember, sampia sarupo jo parayoan Saturnalia. Sajumlah spekulasi manyabuikan basonyo alasan Paus mamiliah tanggal tu untuak mambuek alternatif Kristen untuak Saturnalia.[9]

Di Parancih jo Swiss pado abaik patangahan, saurang anak laki-laki akan tapiliah sabagai "uskup untuak sahari" pado tanggal 28 Desember (the Feast of the Holy Innocents) sarato mangaluaan dekrit sarupo gambalo Saturnalicius. Maso jabatan anak laki-laki uskup tu barakhia pado malam hari. Kabiasoan tu tajadi di sadolah Eropa Barat, tapi ado variasi di tiok wilayah. Di sajumlah wilayah bagian Prancis, salamo maso jabatan uskup untuak anak laki-laki, ulamo nan sabananyo akan mamakai topeng sabagai kabiasoan di tradisi Saturnalia.[10]

Salamo pariode akhia abaik patangahan jo awal Renaisans, banyak kota di Inggririh mamiliah "Lord of Misrule" pado wakatu Natal untuak mamimpin Feast of Fools. Kaabiasoan tu dikaikan jo Twelfth Night atau Epiphany. Tradisi umum di Eropa barat adolah manjatuahan kacang, koin, atau token ketek lainnyo ka dalam kue atau puding, sia nan dapek manamuannyo akan manjadi "Rajo (atau Ratu) Kacang". Salamo Reformasi Protestan, reformis barusaho maubah bahkan maapuih prraktik-praktik samacam tu, inyo manyabuiknyo sabagai "popish". Urang-urang Puritan malarang "Tuan Misrule" di Inggirih, salanuiknyo kabiasoaan tu mulai hilang, walaupun kacang di raga-raga masih batahan di Skandinavia.[11]

Pado patangahan abaik ka-19, tradisi batuka hadiah dihiduikan baliak di negara-negara Inggirih sabagai bagian dari "kabangkitan Natal" yang tersebar luas. Siso-siso parayoan Saturnalia mungkin masih dilestarian dalam sajumlah tradisi nan kini dikaikan jo Natal. Tradisi batuka hadiah katiko Natal manyarupoi tradisi Romawi maagiah sigillaria jo maiduikan lilin manyarupoi tradisi Romawi dalam menyaloan obor jo lilin. Salain itu, Saturnalia jo Natal samo-samo bahubuangan jo makan-makan, minum, banyanyi, jo manari.[12]

Rujuakan[suntiang | suntiang sumber]

  1. a b Okezone (2017-10-05). "OKEZONE STORY: Perayaan Saturnalia di Romawi, Saat Para Tuan Bertukar Tempat dengan Budak Mereka : Okezone News". https://news.okezone.com/ (dalam bahasa Indonesia). Diakses tanggal 2020-03-30.  Hapus pranala luar di parameter |website= (bantuan)
  2. Kaster, Robert A. (2011). Macrobius: Saturnalia. Loeb Classical Library. pp. 16. 
  3. a b Robert E. A., Palmer (1997). Rome and Carthage at Peace. Germany: Franz Steiner. pp. 64. ISBN 978-3515070409. 
  4. a b c Hank S, Versnel (1992). Inconsistencies in Greek and Roman Religion, Volume 2: Transition and Reversal in Myth and Ritual. BRILL. pp. 140. ISBN 978-90-04-29673-2. 
  5. Mary, Beard (2004). Religions of Rome: A Sourcebook. Cambridge, England: Cambridge University Press. pp. 50. ISBN 0-521-45646-0. 
  6. Fanny, Dolansky (2011). Celebrating the Saturnalia: Religious Ritual and Roman Domestic Life. New Jersey: Wiley-Blackwell. pp. 484. ISBN 978-1405187671. 
  7. Erich, Segal (1968). Roman Laughter: The Comedy of Plautus. Oxford University Press. pp. 8-9. 
  8. Rawson, Beryl (1991). Adult-Child Relationships in Ancient Rome. Oxford University Press. pp. 19. 
  9. J, John (2005). A Christmas Compendium. New York City, New York and London, England: Continuum. pp. 112. ISBN 0-8264-8749-1. 
  10. Anthony, Grafton (2010). The Classical Tradition. Cambridge, Massachusetts and London, England: The Belknap Press of Harvard University Press. pp. 116. ISBN 978-0-674-03572-0. 
  11. Yvonne, Jeffrey (2008). The Everything Family Christmas Book. Everything Books. pp. 46–47. ISBN 9781605507835. 
  12. Bruce David, Forbes (2007). Christmas: A Candid History. Berkeley, California: University of California Press. pp. 9–10. ISBN 978-0-520-25104-5.