Sapai ijuak

sapai ijuak

Sapai ijuak iyolah alek rumah tanggo nan dibuek dari ijuak diikek jadi sarumpun, diagiah tangkai singkek atau panjang untuak mambarasiahan kabuik (debu) jo sampah. Sapai ijuak ko sapai nan acok nyo gunoan dek urang Minang. Sapai ijuak sampai kini masih ado, walaupun banyak mode-mode sapai kaluaran baru. Urang masih manggunoan sapai ijuak dikaranoan sapai nyo nan tahan lamo, indak capek patah, manyapu pun labiah barasiah. Sapai ijuak gagang pamacik nyo tabuek dari rotan, tampek ijuak disatuan jo gagangnyo dijalin jo rotan pulo.

Caro-caro mambuek sapai ijuak

Nan partamo barasiahan ijuak, ijuak dibarasiahan manggunoan tangan, kamudian pisahan ijuak-ijuak nan masih ado manyatu jo lidih-lidih. salanjuknyo karek ijuak mamakai pisau sasuai ukuran nan ditantuan. Biasonyo mangarek ijuak baukuran 20 cm. satalah itu pasang sagitigo atau kipeh, caronyo gunoan tangan jo kaki untuak tampek mamasang sagitigo, gunoan tali nan sangajo diikek di salah ciek kaki, masuak’an ka sagitigo atau kipeh nan lah ado. Sagitigo bafungsi manahan ijuak bia jan baputa tangkai nan dapek mambuek ijuak lapeh. caro salanjuk nyo mangabek ijuak ka tangkai, tujuan nyo untuak manyasuaian ijuak ka tangkai nan bajarak 13 cm dari pangka tangkai. sudah tu manjalin ijuak ka tangkai manggunoan jarum sabagai alaik (alat) pancucuak nan dimulai dari sampiang bawah manuju ka ateh. caro tarakhir manyikek jo maratoan ijuak manggunoan sikek nan agak kasa, dimulai dari bagian pangka ijuak ka bawah. Sapai disikek batujuan untuak marapian susunan ijuak jo mangaluaan sarok (sampah) nan ado di ijuak.

Ukuran sapai ijuak

Sapai ijuak ado 3 ukuran, nan partamo sapai ijuak baukuran kaciak. Sapai ko bantuaknyo kaciak, tenggihnyo satenggih lutuik. Sapai ijuak ukuran kaciak biasonyo dipakai di dapua. Ukurannyo nan kaciak dapek mamudahan maangkek’an sarok-sarok sudah mambuek samba. Kaduo, sapai ijuak ukuran sadang. Sapai ukuran sadang ko nan banyak urang mamakainyo. Sabeknyo, sapai ko panjangnyo normal, urang labiah mudah mamakainyo katiko manyapai lantai dalam dangau (rumah). Salanjuiknyo nan katigo, sapai ijuak ukuran panjang. Bantuak sapai iko ukuran e panjang, sasuai jo kagunoan nyo. Sapai ko digunoan untuak manyapai langik-langik dangau nan balawah (jaring laba-laba). Mangkonyo sapai ko tangkainyo baukuran panjang. Kalabiahan dari sapai ijuak tantulah banyak, yaitue harago sapai ijuak nan murah, sapu ijuak tatek barasiah walau indak di cuci, sapai ijuak ko murah parawatannyo, sapai ko tahan lamo, bantuak sapai nyo tatek sarupo sapai zaman dolu sampai kini, pagangan nyo nan awet, sapai ijuak tahan rayap, dan tarakhir sapai ijuak ko tahan aia.