Rumah Gadang Sungai Baringin

           Rumah Gadang Sungai Baringin marupokan rumah adaik nan talatak di Nagari Sungai Baringin di Kecamatan Payokumbuah, Kabupaten Limopuluah Kota, Sumatera Barat. Rumah gadang ko talatak di tangah-tangah sawah, bagi dunsanak  nan menyukai wisata budaya makonyo sangaik dianjuakan untuak datang ka Rumah Gadang Sungai Baringin. Dirumah nan tampak rancak dan tapaliharo ko dunsanak akan basobok banyak hal –hal nan takaik jo budaya di Sumatra Barat. Ado banyak hal nan bisa kito palajari dari tampek ko, mulai dari tampek panyimpanan barang antik, alaik-alaik rumah tanggo zaman dulu, dan rumah gonjong nan didalamnyo tadapaik ruangan khusus Minang.

           Salain itu ado tampek nan acok dijadian urang untuak pra-wedding, bahkan dijadian tampek untuak acara baralek atau acara-acara lainnyo. Tabayangkan dunsanak batapo hikmatnyo keadaan tampek iko sahinggo acok dijadian pilihan untuak maadoan acara-acara resmi. Karano lataknyo nan barado di tangah-tangah sawah, rumah ko mambarian nuansa  sajuak dan tanang nan mambuek kito batah untuak balamo-lamo disiko, karano disiko kito indak hanyo bisa malakuan wisata indoor tatapi pamandangan outdoor-nyo indak kalah rancak pulo.

Latar Belakang

Rumah Gadang Sungai Baringin

           Bagi kawan-kawan nan suko dunia fotografi sabaiknyo datang ka wisata budayako, dan disiko ado banyak objek nan manunggu keahlian dunsanak dalam mamotret, bayiak objek nan babau alam atau kebudayaan. Satalah pueh bamain, mamotret, dan mampalajari kebudayaan Sumatra Barat kito bisa langsuang babalanjo buah tangan karano disekitar lokasi iko tadapaik tampek nan manjua oleh-oleh khas Sumatra Barat.

Akses Menuju ke Rumah Gadang Sungai Baringin

Rumah Gadang ko talatak di dakek Kantua Wali Nagari Sungai Baringin dan di dakek Masajik Nurul Islam, tapeknyo di jalan M.syafei, Sungai Baringin, Payakumbuah, Limo Puluah Kota. Untuak bisa mancapai tampek ko bukanlah hal nan sulik, maingek tampeknyo nan indak jauah dari pusat kota Payokumbuah. Perjalanan ko bisa dunsanak tampuah manggunokan kendaraan pribadi bahkan jo angkot. Jikok dunsanak mamulai perjalanan dari kota Payakumbuah dunsanak hanyo manghabiskan waktu 15 minik.