Rantau
Rantau marupokan suatu kawasan atau nagari nan talatak di lua kampuang halaman. Dalam konsep budayo Minangkabau, rantau dapek dimukasuikan juo subagai suatu kawasan nan ditaruko sarato lataknyo di lua kawasan darek (padalaman atau inti) Minangkabau. Salain itu kato rantau juo dapek bamakna garih pantai atau daerah aliran batang aia maupun hal nan marujuak pado daerah bateh.[1]
Rantau dek urang Minang adolah bagian dari Alam Minangkabau dan punyo ubuangan saliang bagantuang jo darek sabagai kawasan intinyo. Salanjuiknyo kawasan rantau tabagi ateh rantau di ilia jo rantau di mudiak, nan tanamo jo istilah rantau nan duo. Takaik jo hal ko, rantau dek urang Minang juo manjadi pintu garabang manuju Alam Minangkabau, dalam istilah lainnyo rantau samakna jo palabuahan. Kawasan rantau dalam sisi kahidupan marupokan tampek pancarian, kawasan niago, ataupun dapek manjadi jalua ka lua dari hal-hal nan bakalabiahan dari darek sarupo tanago, panduduak, raso takacio, raso kaingintauan, jo ambisi sainggo hal ko manjadi paluasan jo pangambangan kawasan rantau itu surang.[2]
Tomé Pires dalam Suma Oriental alah mancataik babarapo kawasan rantau di pasisia barat Sumatra sarupo Pariaman, Tiku dan Barus sabagai kawasan palabuahan Rajo Minangkabau, baitu juo kawasan Kampar jo Indragiri di pasisia timur Sumatra.[3]
Rujuakan
[suntiang | suntiang sumber]- ↑ Kato, Tsuyoshi, (2005), Adat Minangkabau dan Merantau dalam Perspektif Sejarah, Balai Pustaka, ISBN 979-690-360-1.
- ↑ Indonesia Dalam Kajian Sarjana Jepang, Yayasan Obor Indonesia.
- ↑ Cortesão, Armando, (1944), The Suma Oriental of Tomé Pires, London: Hakluyt Society, 2 vols.
