Paragede Alek

Wikipedia Minangkabau - Lubuak aka tapian ilimu

Paragede Alek (pregedel alek) marupokan makanan lamo babantuak samba nan dibuek dek masyarakaik Jorong Matua Katik, Nagari Matua Hilia pado acaro-acaro adaik, sarupo alek kawin, batagak pangulu, acaro tahlilan rambuik, khatam qur'an jo sabagainyo. Alaik-alaik untuak mambuek paragede alek adolah, kantang goreang nan digiliang, ubi abuih masak, talua, bawang perai, saladari, bawang sirah, bawang putiah, roiko, jo garam sacukuiknyo. Paroses mambueknyo, saluruah alaik-alaik nan baukuran cukuik diaduak manjadi ciek, salanjuiknyo dibulekan kapado ukuran sakiro duo sendok makan. Tarakhia, bulekan paragede digoreang hinggo masak sahinggonyo alah dapek ditatiangkan basamo dendeang ragi jo gulai bukek. Sacaro sosial budayo, paragede alek adolah samba adaik. Aratinyo, makanan sajanih samba nanko harus tasadio katiko tatiangan talatak di tangah pajamuan. Masyarakaik Jorong Matua Katik dapek manilai ganjia katiko induak-induak pado sabuah acaro banuansa adaik nan indak mambuek samba paragede.[1]

Badasakan katarangan narasumber, pamakanan lamo paragede alek (pragedel alek) marupokan palangkok makanan pado acaro-acaro nan banuanso adaik. Biasonyo pamakanan sajanih samba nanko ditatiangkan basamo jo dendeang ragi dan gulai bukek. Kasababnyo, masyarakaik Jorong Matua Katik Nagari Matua Hilia dapek manilai kurang marawah sabuah acaro apobilo si pangka indak mahidangkan paragede, sakalipun bajanih pamakanan lainnyo tatatiang sacaro langkok, sarupo randang, kalio, goreang lauak, goreang ayam jo sabagainyo. Dalam kasibukan kalompok induak-induak di dapua saurang wargo nan maadokan acaro manggambarkan sabaitu pantiangnyo paradege sabagai pamakanan nan musti ado. Bioasonyo kalompok induak-induak nan sambuah barasa dari kalompok induak-induak manjadi sibuak batanyo, “Bilo paragede ka dibuek”.

Hinggo maso nanko, masyarakaik di Joroang Matua Katik tatap manilai paralu adonyo paragede di tangah tatiangan. Ka muncua pambicaroan indak lamak di tangah masyarakaik, tautamo di kalompok induak-induak, apobilo sabuah kaluarga nan mangadokan acaro indak mambuek paragede, apobilo pado acaro-acaro banuanso adaik. Manuruik narasumber pulo, kurenah jo parilaku masyarakaik tasabuik marupokan sabantuak kapadulian kapado kakuatan kurenah kagotongroyongan masyarakaik ka bantuak karajo sabuah kaluarga nan mangadokan hajatan.  

Rujuakan         [suntiang | suntiang sumber]

  1. Hasanadi dkk (2013). Warisan Budaya Takbenda di Provinsi Sumatera Barat.. Jl. Raya Belimbing No. 16 A Kuranji, Padang, Sumatera Barat. Telp/Faks: 0751-496181: Balai Pelestarian Nilai Budaya Padang. pp. 61-62. ISBN 978-602-8742-67-2.