Pandidikan jarak jauah

Murik Meksiko nan maambiak pandidikan jarak jauah salamo Pandemi COVID-19.

Pandidikan jarak jauah (bahaso Inggris: distance education) adolah pandidikan formal babasis lembaga nan peserta didik jo instrukturnyo barado di lokasi tapisah sainggo mamaralukan sistem telekomunikasi interaktif untuak maubuangkan kaduonyo dan babagai sumber daya nan diparaluan di dalamnyo. Pambalajaran elektronik (e-learning) atau pambalajaran daring (online) marupoan bagian dari pandidikan jarak jauah nan sacaro khusus manggabuangkan teknologi elektronika jo teknologi babasis internet.

Kamajuan nan tajadi dalam dunia teknologi komunikasi jo informasi mamuncuaan paluang maupun tantangan baru dalam dunia pandidikan. Paluang baru nan muncua tamasuak akses nan labiah laweh tahadok konten multimedia nan labiah kayo jo baragam, dan bakambangnyo metode pambalajaran baru nan indak lagi dibatasi dek ruang jo wakatu. Di sisi lain kamajuan teknologi jo baragam inovasi digital nan taruih bakambang maadiakan pulo tantangan baru dek panyalanggara pandidikan untuak taruih manyasuaikan infrastruktur pandidikan jo teknologi baru tasabuik.

Pandidikan jarak jauah bukan metode baru dalam sistem pandidikan. Metode pambalajaran iko alah digunoan di Amerika Serikat samanjak taun 1892 katiko Universitas Chicago maluncuaan program pambalajaran jarak jauh partamanyo untuak tingkek pandidikan tinggi. Metode pambalajaran jarak jauah taruih bakambang dengan manggunoan baragam teknologi komunikasi jo informasi tamasuak radio, televisi, satelit, dan internet. Bakambangknyo panggunoan internet dek publik di babagai nagara pado taun 1996 manjadi suatu fenomena nan bakambang dan diikuti dek kamunculan baragam konten digital di dalamnyo. Pado taun nan sama, John Bourne mangambangkan Asychronous Learning Network Web nan marujuak kapado kamampuan untuak maagiah pandidikan bilo-bilo pun dan di mano pun malalui internet.

Pambalajaran online pado dasanyo adolah pambalajaran jarak jauah (PJJ). Sistem pambalajaran jarak jauah marupoan sistem nan alah ado samanjak patangahan abaik ka-18. Samanjak awal, pambalajaran jarak jauh selalu manggunoan teknologi untuak palaksanaan pambalajarannyo, mulai dari teknologi paliang sederhana inggo nan kakinian. Sijarah pakambangan pambalajaran jarak jauah dapek dikalompokkan manuruik teknologi dominan nan digunoannyo. Manuruik Taylor (2000), generasi pambalajaran jarak jauah dikalompokkan manjadi limo: model korespondensi, model multimedia, model tele-learning, model pembelajaran fleksibel, jo model pambalajaran fleksibel nan labiah santiang (The Intelligent Flexible Learning Model). Generasi PTJJ kaampej jo kalimo tadapek istilah nan sangaik populer di masyarakaik, cando e-learning, online learning, dan mobile learning nan labiah mamasyarakaikkan lai fenomena PJJ.

Sistem pandidikan jarak jauah

Pandidikan jarak jauh adolah suatu kajian kapandidikan nan taruih bakambang sairiang jo darehnyo kamajuan teknologi komunikasi jo informasi. Karano itu juo pandidikan jarak jauah acok dipersepsikan sabagai suatu inovasi dalam metode pambalajaran abaik ka-21 nan mampunyoi dayo jangkau linteh ruang, wakatu, jo sosioekonomi. Dek adonyo inovasi iko, masyarakaik mampunyoi piliahan alternatif untuak manjangkau pandidikan. Sacaro umum, pandidikan jarak jauah mampunyoi prinsip nan mancakuik antaro lain:

• Akses, yakni takaik jo kainginan untuak mampalaweh akses masyarakaik tahadok pandidikan malalui panyalanggaraan pandidikan nan babasis teknologi komunikasi jo informasi, basifaik massal, ekonomis, sarato maminimalkan sakek jarak jo wakatu.
• Pamaratoan nan marujuak kapado asas keadilan jo pasamoan hak untuak siapo sajo dalam mandapek pandidikan jo indak tasakek baragam alangan.
• Kualitas, yaitu bahubuangan jo jaminan standar nan maaja, materi bahan aja jo ujian, dan proses pambalajaran interaktif nan babasis teknologi komunikasi jo informasi.

Walaupun sistem pandidikan jarak jauah (PJJ) alah mulai samanjak patangahan abaik ka-19, PJJ sabagai sistem implementasi pandidikan tabukak baru mulai tanamo sacaro luweh pado taun 1969 sasudah pandirian ‘Universitas Terbuka’ partamo di Inggris nan banamo The Open University (mulonyo tanamo sabagai The British Open University atau United Kingdom Open University). Model penyelenggaraan The Open University (OU) iko dinilai barasia mambukak akses pandidikan tinggi sacaro massal dan kamudian banyak ditiru dek nagara lain tamasuak dek Indonesia nan mandirikan Universitas Terbuka (UT) pado taun 1984.

Karakteristik pandidikan jarak jauah

Pandidikan jarak jauah mampunyoi babarapo karakteristik dasa, yaitu:

• Pangajar jo paserta didik indak barado dalam ciek ruang nan samo katiko proses baraja-maaja balansuang.
• Panyampaian materi aja jo proses baraja dilakuan jo mamanfaatkan media komunikasi jo informasi.
• Manakankan pado caro baraja mandiri, tapi ado limbago nan maatuanyo.
• Katabatasan pado patamuan tatap muko. Biasonyo patamuan tatap muko dilakukan sacaro periodik antaro paserta didiak jo nan maaja atau tutor.
• Fleksibilitas dalam proses pambalajaran. Dengan kalaluasoan tiok paserta didiak dapek maatua wakatu barajanyo surang diri sasuai jo katasadioan wakatu dan kasiapannyo.

Teknologi komunikasi dalam pandidikan jarak jauah

Panyalenggaraan pandidikan jarak jauah indak dapek dilapehan dari panggunoan teknologi. Hal iko dek dalam pandidikan jarak jauah indak tajadi kontak sacaro lansuang antaro nan maaja jo nan diaja. Proses komunikasi antaro kaduonyo dilakuan malalui pamanfaatan teknologi komunikasi jo informasi. Walau baitu, patamuan tatap muko tatap dapek dilakukan jo frekuensi nan tabateh. Teknologi komunikasi jo informasi nan banyak digunoan dalam pandidikan jarak jauah adolah komputer jo internet.