Palasik

Wikipedia Minangkabau - Lubuak aka tapian ilimu
Loncat ke navigasi Loncat ke pencarian

Manuruik picayo urang Minang, palasik samo jo makhluk gaib. Asa palasik dari manusia nan punyo ilimu itam tingkek tinggi. Ilimu itam dipacayo basipek turun-tamurun. Jikok urang tuonyo urang palasik anaknyo ka manjadi palasik jo.[Buku 1]

Bawang Putiah jo Bawang Merah Panangka Palasik

Kabanyo, makanan palasik iyolah anak bayi nan masih iduik jo anak bayi nan alah maningga. Palasik mananggaan kapalonyo atau badannyo katiko mancari makan. Palasik nan malapehan kapalonyo disabuik jo palasik kuduang.

Palasik ado tigo :

  1. Palasik pamakan bayi urang nan sadang manganduang, palasik ko indak sacaro lansuang mamakan bayi nan nyo incar, inyo cukuik jo marasok-rasok paruik amak-amak nan sadang manganduang, anak nan di dalam paruik tadi maningga katiko alah lahia.
  2. Palasik nan suko maisok darah anak-anak jo bayi nan baru lahia, jikok ado anak nan mandadak sakik ndak tau panyabeknyo itu alah pasti ulah palasik. Kok indak capek diubek, anak tu abih darahnyo tu maningga.
  3. Palasik kuduang, palasik ko palasik nan mamutuih kapalo dari badannyo, tapi masih mambaok bagian badan nan lain, co jantuang, hati, tu organ dalam nan lain. Biasonyo sabalum mamutuih badannyo, badan bagian bawahnyo disuruakan.

Manuruik carito, urang palasik di siang hari tatek jo samo jo manusia nan lainnyo. Palasik babaua jo saliang kenal jo urang nan ado di lingkuangannyo. Ado mitos nan mangecekan urang palasik ko punyo ciri-ciri, nan partamo urang palasik indak punyo lubang antaro bibia jo iduangnyo, nan kaduo urang palasik manutuik lihianyo supayo ndak nampak bakeh sambuangan kapalo jo badannyo.

Dicaritoan pado sangkek dulu, jikok ado suatu nagari atau kampuang nan mandadak kayo rayo, ado nan mangecekan urang tu kayo rayo dek palasik. Masyarakaik yakin urang palasik tu kayo dek ilimu itam nan nyo pakainyo. Kecek urang, kok ado urang nan baparangai palasik basobok jo anak nan baumua di bawah tigo taun, bia pun anak itu digendong urang tuonyo, biasonyo urang palasik maagah jo mancaliak anak tu jo mangijokan mato, kok nyampang anak tu manangih taibo-ibo, barati itu alah takanai dek urang palasik. [Buku 2]Biasonyo anak nan kanai palasik ko paliang banyak nan maningga, tapi jikok anak alah takanai dek urang palasik, ado panangkanyo. Panangka nan partamo, urang palasik indak suko jo baun bawang putiah, bawang merah, daun salasiah, dan lainnyo nan diagiah ka ubun-ubun anak. Panangka nan kaduo, jikok basobok jo urang nan dicurigai palasik, kok dapek lansuang agiahan anak tadi sambia mangecekan "iko anak atau iko cucu".

  1. Rach, Rhisa. 2012. Tempat Menyeramkan di Dunia Plus Hantu-hantu Terkenal. Jakarta : Aksara.
  2. Wikanjati, Argo. 2010. Kumpulan Kisah Nyata Hantu di 13 Kota. Jakarta : Narasi.