Nuskan Sjarif
Nuskan Sjarif | |
|---|---|
| Lahia | 4 Juni 1935 |
| Kabangsaan |  Indonesia |
| Karojo | Musisi |
| Dikana dek | Musisi |
Nuskan Sjarif (lahia di Medan, Hindia Belanda, 4 Juni 1935 – maningga di Jakarta, 13 Februari 2007 pado umua 71 taun) adolah saurang guru jo musisi Indonesia nan mandirikan grup musik Orkes Kumbang Tjari pado tahun 1961.[1]
Riwayat[suntiang | suntiang sumber]
Pado dekade 50-an jo 60-an orkes (grup musik) nan mambaokan musik banuansa Minang sangaik disukoi dek masyarakaik Indonesia. Orkes nan paliang populer katiko itu adolah Orkes Gumarang nan pado awalnyo didirikan dek Awaluddin Djamin nan kamudian hari manjadi Kapolri. Orkes Gumarang mangalami maso kajayoan dibawah pimpinan Asbon Madjid.[2]
Orkes Kumbang Tjari[suntiang | suntiang sumber]
Nuskan adolah panyuko Orkes Gumarang, sahingga inyo pernah manawarkan lagu ciptaannyo untuak dinyanyikan dek orkes tu, namun katiko inyo manyatokan nio bagabuang, pimpinan Orkes Gumarang nan mangatahui kamampuan Nuskan manolaknyo jo manyarankannyo untuak mambuek orkes surang.[3]
Akhianyo Nuskan Sjarif mandirikan Orkes Kumbang Tjari, jo basamo panyanyi Elly Kasim, inyo pun maraih sukses, bahkan manjadikan Elly Kasim sabagai panyanyi lagu Minang legendaris nan dikanang sampai kini.[3]
Dalam orkes tu, inyo bamain gitar nan mampu manghasilkan suaro-suaro mirip bunyi pakakeh musik tradisional Minang sarupo saluang (suling besar), talempong, rabab jo lainnyo. Sabalumnyo Nuskan bakarajo sabagai guru.[3]
Di kamudian hari Nuskan Sjarif dipacayo sabagai pangisi ilustrasi musik untuk film-film Indonesia. Film partamo nan digarapnyo adolah Cinta Rahasia pado tahun 1976. Kamudian balanjut jo film-film barikuiknyo, diantaronyo Mustika Ibu (1976), Liku Liku Panasnya Cinta (1976), Bungalow di Lereng Bukit (1976), Seindah Cintamu (1976), Yang Mana Yang Benar (1976), Garis Garis Hidup (1977), Gara Gara Janda Kaya (1977), Rosita (1978), jo babarapo film lainnyo.[1] Nuskan Sjarif, guru jo musisi badarah Pesisir Selatan ko maningga dunia di Jakarta pado 13 Februari 2007 pado umua 71 tahun.[4]
Rujuakan[suntiang | suntiang sumber]
- ↑ a b "Nuskan Syarief" Archived 2020-03-04 di Wayback Machine. Film Indonesia. Diakses 10-6-2014.
- ↑ "Gumarang" Portal Resmi Provinsi DKI Jakarta. Diakses 10-6-2014.
- ↑ a b c "Kumbang Tjari" Archived 2014-07-14 di Wayback Machine. Portal Resmi Provinsi DKI Jakarta. Diakses 10-6-2014.
- ↑ "Re: Nuskan Syarief, meninggal dunia" Rantau-Net, 13-2-2007. Diakses 10-6-2014.
Pranala lua[suntiang | suntiang sumber]
- "Kumbang Tjari" Archived 2014-07-14 di Wayback Machine. Iramanusantara.org. Diakses 10-6-2014.
- "Teruna Ria" Archived 2014-04-27 di Wayback Machine. Portal Resmi Provinsi DKI Jakarta. Diakses 10-6-2014.