Nasrul Siddik

Dari Wikipedia baso Minang, ensiklopedia bebas
Loncat ke navigasi Loncat ke pencarian

Nasrul Siddik adolah wartawan nan barasal dari Bukiktinggi dan lahia pado tanggal 7 Maret 1936.  Nasrul Siddik disabuik "Inyiak" Koran Sumatera Barat. Inyiak dalam bahaso Indonesia artinyo "kakek-kakek". Panggilan inyiak ko cocok jo Nasrul Siddik karano jasonyo dan prestasinyo dalam dunia pers. Inyiak Nasrul ko urang nan sangaik manonjol dari kawan-kawannyo sasamo wartawan. Sajak mudo inyo alah mulai karirnyo manjadi wartawan dan redaktur harian Res Publika. Indak itu sajo, Inyiak Nasrul ko manjadi pandiri mingguan Singgalang basamo jo kawannyo Salius Sultan Sati dan Nazif Basir. Nasrul Siddik ko pernah juo manjadi Ketua PWI Sumatera Barat, dan salamo duo periode manjadi anggota Dewan Pers di Jakarta. Tahun 1985 Inyiak Nasrul maninggaan Singgalang dan manjua sado sahamnyo ka Kaluarga H. Basril Djabar. Siap tu Inyiak Nasrul mandirian surek kaba Mingguan Canang di Padang basamo jo Salius Sutan Sati dan Rusli Dahlan. Surek Kaba ko dibuek dalam bahaso minang nan lawak.[1]

Karir[suntiang | suntiang sumber]

Sajak masih remaja Inyiak Nasrul ko alah aktif maisi acara rutin kesusastraan di RRI Bukiktinggi basamo A.A Navis dan Motinggo Busye. Waktu tamaik SMA inyo pindah ka Padang untuak malanjuikan kuliah di Fakultas Ekonomi Universitas Andalas. Sabananyo Inyiak Nasrul ko manjadi wartawan tu indak sangajo. Saandainyo kalau Inyiak Nasrul ko kuliahnyo lancar-lancar se, mungkin Inyo indak ka jadi wartawan. Pado tahun 1961, Inyiak Nasrul mandapekan gelar Sarjana Muda Ekonomi. Sajak tamat tu Inyiak labiah mamiliah karajo di surek kaba. Koran partamo tampek Inyiak Nasrul karajo adolah Harian Res Publika. [2]

Rujuakan[suntiang | suntiang sumber]

  1. Chaniago, Hasril (2018). 121 Wartawan Hebat dari Ranah MInang. Sumbar: Setdaprov Sumbar. pp. 320-321. 
  2. Chaniago, Hasril (2018). 121 Wartawan Hebat dari Ranah Minang. Sumbar: Setdaprov Sumbar. pp. 322.