Musajik Gadang Balai Nan Duo

Musajik Gadang Balai nan Duo adolah suatu kompleks nan tadiri dari babarapo bangunan. Bangunan utamonyo adolah musajik nan di bagian tangah. Adopun bangunan tambahannyo barupo perpustakaan, rumah garin, WC (di sabalah timur di muko musajik), dan TPA (di sabalah selatan Musajik). Sabuah bangunan dari batu bata babantuak karucuik nan talatak di sisi baraik dakek mihrab dan sabuah gardu jago talatak di dakek pintu masuak musajik.

Musajik iko baratok tumpang tigo dari bahan seng jo puncaknyo runciang ka ateh. Antaro atok partamo jo atok kaduo di agiah dindiang papan nan berhiaskan ukiran matoari, sadangkan antaro atok kaduo jo atok katigo juo di agiah pambateh dindiang papan polos

Bangunan musajiknyo babantuak ampek persegi ukurannyo 140 X 168 meter. Dindiang musajiknyo tabuek dari kayu. Pintu masuaknyo diagiah anak janjang yang talatak di sisi timur. Di muko anak janjangnyo tadapek bangunan tampek wudhuak jo jamban. Ruangan dalam musajik di tupang jo tonggak panumpang bajumlah 21 buah nan di susun dalam jumlah 5, 4, jo 3. tunggak panupangnyo tabuek dari kayu babantuak bulek. Tonggak tonggak iko di agiah babarapo ornamen di bagian ateh jo tangahnyo. Dari 21 buah tonggak, tadapek ampek buah tonggak nan manggantuang, yang bararti ujuang atehnyo dak sampai ka langik langik. Adopun mihrab talatak di sisi barat jo ukuran 6,5 m X 1,7 m yang di langkok'i jo mimba.