Musajik Ampang Gadang

Musajik Ampang Gadang pado Februari 2020

Musajik Ampang Gadang talatak di Nagari Ampang Gadang, Kecamatan Guguk, Kabupaten Lima Puluh Kota, Sumatra Barat, Indonesia. Musajik iko kiro-kiro dibangun pado awal abaik ka-20. Bangunan induaknyo tabuek dari kayu, jo tambahan ruangan surambi nan tabuek dari tembok.

Musajik iko punyo menara nan lataknyo tapisah di bagian selatan musajik. Manaro itu tabuek dari bata sirah basimin jo gaya papaduan Eropa jo Persia. Salain itu, di bagian selatan musajik, ado bangunan Taman Pendidikan Alquran.

Sadang di sabalah barat ado pintu gerbang jo janjang manurun untuak masuak ka laman musajik. Tabuah musajik talatak tapek di sabalah kanan pintu gerbang. Bangunan induak musajik tabagi ka dalam surambi jo ruang utamo.

Surambi musajik talatak di sabalah timur atau bagian muko bangunan utamo. Lantai jo dindiang surambi tabuek dari beton. Di subalah kiri jo kanan surambi ado menara nan babantuak segi salapan jo gobah di atehnyo. Di antaro duo menara tu, ado dindiang jo duo buah pintu nan mamisahan surambi jo ruang utamo.

Konstruksi

Bangunan induak musajik tabagi ka dalam surambi jo ruang utamo. Surambi musajik ado di sabalah timur atau bagian muko bangunan utamo. Lantai jo dindiang surambi tabuek dari beton. Di sampiang kiri jo kanan surambi, ado menara babantuak segi salapan jo kubah di atehnyo. Di antaro duo menara, ado dindiang jo duo pintu nan mamisahkan surambi jo ruang utamo.

Ado duo pintu di sabalah timur untuak masuak ka ruang utamo. Pintu tu talatak di antaro duo kubah nan babantuak segi lapan. Ruang utamo tabuek dari kayu, tamasuak lantai ruang utamo.

Lantai tabuek dari papan kayu nan kondisinyo kini lah lapuak. Hanyo lantai dakek mihrab, nan lantai di sabalah barat, nan masih dapek digunoan untuak sumbayang. Di dalam ruang utamo ado 18 buah tiang jo ciek tonggak utamo di tangah ruangan.

Ruang utamo ado 10 buah jandela, nan tiok limo buah lataknyo di sabalah utara jo selatan. Dindiang ruang utamo nan tabuek dari kayu ko punyo kaligrafi. Di sisi barat ruang utamo, ado mihrab nan manjorok kalua. Mihrab punyo duo buah jandela di sisi utara jo selatan. Mihrab dihiasi duo buah lakuak jo ciek tiang di bagian tangahnyo. Di bagian ateh mihrab ado pulo hiasan kaligrafi.

Manaro

Manaro musajik talatak di sabalah selatan nan saroman bantuaknyo jo manaro Musajik Raya Taluk. Bagian dasa manaro babantuak persegi nan di bagian atehnyo babantuak segi lapan. Bagian paliang ateh masih babantuak samo namun labiah ketek, kamudian babantuak bulek jo punyo atok seng. Pintu masuak manaro ado di sabalah timur nan ado ampek anak janjang di bagian bawahnyo. Satalah itu masuak ka anak janjang nan malingkar ka arah kiri.

Bangunan lain

Bangunan lain nan ado di dalam kompleks musajik adolah tampek wudhu, TPA, jo makam. Tampek wudhu masih manyatu jo bangunan induak, tanpa atok, dan talatak di sabalah timur. Di bagian tangah ado tampek wudhu. Sadang di sampiang kiri jo kanannyo ado ruangan babantuak persegi.