Monumen Tugu Pajuangan Kemerdekaan Rakyaik Pauah

Tugu Pajuangan Kemerdekaan Rakyaik Pauah, dalam bahaso Indonesia disabuik Tugu Perjuangan Kemerdekaan Rakyat Pauh, marupokan tugu nan dibuek taun 1989 untuak mangana banyaknyo pajuang nan mati dek gigiahnyo mampatahankan kamerdekaan malawan Tantara Sakutu jo Balando, anyo jo manggunokan sanjato nan dirabuik dari Japang sarato jo bambu runciang.

Pauh nan kini manjadi wilayah kecamatan, dulu acok disabuik sabagai Pauah Limo jo Pauah Ampek atau Kuranji kini. Duo wilayah tu indak dapek dipisahan paranannyo dek wilayah tu samo struktur alamnyo.

Ado pamimpin pauah-kuranji tu nan tanamo jo "Siampek Baleh" takah Rajo Perak, Rajo Lebe, Sutan Mulia, Rajo Bangsawan, Marajo Lelo, Rajo Bonsu, jo Sutan Baso nan acok maancam jo manyarang Padang dan sakitanyo. Sarangan tu baulang-ulang,

Sijarah

Katiko proklamasi diumumkan, rakyaik manyambuik jo sanang ati. Namun, katiko tadanga kaba sakutu ka tibo untuak maamanan tantara-tantara Japang. Indak ciek juo masarakaik Pauh satuju. Untuak baadokan Sakutu jo bambu runciang indak ka mungkin, untuak itu dirabuiklah sanjato-sanjato Japang. Ado nan sanang ati maagiah ado jo dipaso baru ka diagiahan dek tantara-tantara Japang tu. Bulan Oktober 1945 sabalun Sakutu mandaraik, gudang sanjato jo markas Japang di Ulu Gaduik diserbu dek pamuda-pamuda pajuang. Patampuran pun dimanangan dek pamuda-pamuda Padang dan barasil madapek sanjato masin ringan, tigo puluah buah karaben, garanaik tangan, jo babarapo paluru tangan.

Pado tanggal 13 Oktober 1945 Sakutu mandaraik, kaadaan samakin managang, patampuran samakin manjadi-jadi sampai taun 1946. Tanggal 18 Juni 1946 mandapek laporan dari Letnan Anwar Banel baso ka ado panyarangan dari Tantara Sakutu ka Batu Busuak di ma tampek kaki tangan tantara Sakutu (NICA) tu ditahan. Ruponyo pasukan sakutu barasil mambebasan kaki tangannyo tu. Sabanyak 13 urang pajuang republik gugua wakatu tu, nan bakubua di Markas Batalyon I Harimau Kuranji. Pado tanggal 26 Juni 1946 sakutu indak manarimo kakalahannyo tu doh.