Migrasi Indo-Eropa

Dari Wikipedia baso Minang, ensiklopedia bebas
Loncat ke navigasi Loncat ke pencarian
Skema migrasi Indo-Eropa, migrasi sajak lk. 4000-1000 SM manuruik hipotesis Kurgan ██ Asumsi lokasi Urheimat (budaya Samara, budaya Sredny Stog) sarato budaya Yamna salanjuiknyo. ██ Daerah nan kamungkinan diunyi inggo lk. 2500 SM. ██ Daerah nan diunyi inggo 1000 SM.[1]

Migrasi Indo-Eropa adolah migrasi (bapindahnyo panduduak) dari babagai kalompok pagubalo babahaso Proto-Indo-Eropa, nan bapindah dari wilayah Yamnaya jo stepa Pontus–Kaspia nan bakaik sacaro budaya sajak kiro-kiro taun 4000 SM. Kalompok-kalompok tu manyeba ka saluruah Eropa jo Asia, sarato mambantuak budaya baru basamo babagai kalompok budaya nan ditamui dalam papindahan tu, antaro lain jo kalompok budaya Tambika Batando Tali di Eropa Utara jo kalompok budaya Weda di India.

Pangatauan moderen manganai migrasi iko diparoleh badasa data linguistik, arkeologi, antropologi jo genetika. Ilimu linguistik manjalehan pasamoan antaro babagai bahaso, sarato aturan linguistik nan balaku dalam parubahan bahaso-bahaso itu. Data arkeologi manjalehan panyebaran dari bahaso jo budaya Proto-Indo Eropa dalam babarapo tahapan, dari wilayah asa Eurasia masarakaik Proto-Indo-Eropa di stepa Pontus–Kaspia, inggo ka Eropa Baraik sarato Asia Tangah jo Salatan,[2][3] malalui babagai migrasi, nan disaratoi juo parubahan bahaso akibaik masuaknyo kalompok elit tatentu dalam masarakaik, sarupo nan dijalehan dalam panalitian antropologi.[2] Panalitian genetik mutakhir samakin gadang paranannyo dalam mamahami ba'a ubuangan maso lalu antaro babagai budaya itu.

Bahaso dan budaya Indo-Eropa taseba dalam baberapo tahapan. Migrasi awa pado lk. 4200-3000 SM mambao budaya Proto-Indo-Eropa kuno ka dataran randah lambah Donau,[2] Anatolia,[2][4][web 1] jo wilayah Altai.[5] Budaya Pra-Keltik jo Pra-Italia kamungkinan taseba ka Eropa satalah muncuanyo galombang migrasi-migrasi salanjuiknyo ka Lambah Donau,[6][2] sadang budaya Pra-Jermanik jo Pra-Balto-Slavia bakambang di sabalah timua pagunuangan Carpathia, yaitu wilayah Ukraina saaik iko,[2] kamudian bagarak ka utara dan taseba basamo budaya Tambika Batando Tali di Eropa Tangah (yaitu pado milenium katigo SM).[6][2][web 2][7][web 3][web 4]

Bahasa jo budaya Indo-Iran nan muncua pado budaya Sintashta (lk. 2100-1800 SM) di sabalah timua dari bateh budaya Yamna jo budaya Tambika Batando Tali,[2] kamudian tumbuah manjadi budaya Andronovo (lk. 1800-800 SM). Masarakaik Indo-Arya lalu bapindah ka Kompleks Arkeologi Baktria–Margiana (lk. 2300-1700 SM) jo taseba inggo ka Levant (Mitanni), India utara (masarakaik Weda, lk. 1500 SM), jo Cino (Wusun).[3] Bahaso-bahaso Iran tarseba di saluruah stepa malalui bangso Skitia, jo ka Iran malalui bangso-bangso Media, Partia jo Persia sajak lk. 800 SM.[3]

Rujuakan[suntiang | suntiang sumber]

Situs web[suntiang | suntiang sumber]

Sumber[suntiang | suntiang sumber]