Merantau dan emas

sajauah tabangnyo bangau, kok pulang ka kubangan juo, itulah filosi nan dari dulu dipakai dek parantau dari bumi minang nan ko. tapi, apo nan marantau nan tun?.

marantau, adolah sabutan untuak urang minang nan pai kalua dari ranah jo tapian bumi minang, biasonyo urang tau jo rantau ko untuak marubah nasib. nan sabananyo rantau ko punyo carito nan panjang. marantau ko saksi juo dalam carito bagaimano bumi minangkabau dahulunyo.

baapo dek ado marantau ko?. marantau, sabananyo dahulu, urang minangkabau hanyolah mamiliki babarapo tampek populasi sajo di darek, lai ado pangambangan nagari tapi badakek-an, alasan di baliak itu iolah sagi status,ekonominyo, nan kok batambah jauah batambah sulik manyusuaian diri. dek alah manamui riak di dalam tabek, kambangnyo urang nan indak tatampuang ciek nagari, dek lah talampau padek di suatu tampek nan tun, mako dilakuanlah rantau, nan tujuannyo dulu untuak mampabanyak nagari di lingkungan bumi minangkabau. papindahan itu disabuik rantau hilia atau rantau hilir. rantau hilia ko adolah papindahan nan malintehi bukik barisan nan mano umumnyo mangarah ka ampek batang aia nan pantiang, lorong kapado batang aia siak, kampar, indaragiri, jo batanghari. ampek batang ayia nan tun manolah tatuju ka ciek muaro, nan muaro tatuju ka selat malaka. didalam pajalanannyo, ado nan manatap di sinan, ado nan manaruihan pajalanannyo.

sangkuik pauik ameh jo rantau iolah nan dulunyo, urang-urang minang dasarnyo urang nan baladang jo batani, ado nan alah tatap, ado juuo ladang nan bapindah-pindah. tapi ado juo nan pandai mandulang samo maayak ameh, nan mano tampek maasiahan ameh dahulunyo iolah sijunjuang, batang aia pagu, rao, salido, sangir, sipayang, tanah data timur, tanah data barat jo tompek-tompek lainnyo. ameh ko tanamo di masonyo nan sampai ka nagari sabalah. salain baladang bapindah-pindah katarampilan mandulang ameh ko manjadi boka untuak badagang dalam marantau. sampai-sampai ameh manjadi salah satu bagian nan pantiang untuak pajalanan rantau. ado pulo suatu maso, babarapo urang di minang ko nan pandai mandulang ameh ko di undang dek rajo nan ado di nagari malaysia.