Mazda Familia

Wikipedia Minangkabau - Lubuak aka tapian ilimu
Loncat ke navigasi Loncat ke pencarian
Mazda Familia
2003 Mazda 323 (BJ II) Protegé Shades sedan (2015-08-07) 01.jpg
2003 Mazda 323 (BJ) sedan
Panjalehan
Pabrikan Mazda
Tahun dibuek 1963–2003
Badan jo karangko
Tipe oto
Masin oto
Pajalanan produksi
Panaruih Mazda Familia Wagon (BG generation, station wagon version)
Mazda3/Mazda Axela

Mazda Familia adolah oto keluarga nan baukuran agak ketek nan di produksi dek parusahaan Mazda Motor Corporation nan barado di 3-1 Shinci, Fuchu-cho, Aki-gun, Hiroshima, Jepang. Namo lain dari oto ko iolah Mazda 323. Oto ko mulai diproduksi dari tahun 1963 hinggo tahun 2003. Oto nan biaso digunoan dek keluarga ketek ko baranti di produksi di tahun 2003, namun salanjuiknyo produksi oto ko digantian dek oto nan labiah baru nan di agia namo Mazda 3 atau Axela nan diproduksi tahun 2004. Oto Mazda Familia ko marupoan tamasuak oto nan lamo maso produksinyo dek Pabrik Mazda Motor Corporation, yaitunyo baproduksi salamo 40 tahun. Oto ko dipajang di pintu masuak parusahaan tasabuik.[1] [2]

Generasi oto[suntiang | suntiang sumber]

Generasi partamo[suntiang | suntiang sumber]

Generasi partamo oto Mazda Familia di mulai dari partamo produksi pado tahun 1963 hinggo tahun 1968. Labiah tapeknyo oto ko paratamo di buek pado bulan September 1963. Namo partamo oto nan diproduksi ko iolah Familia Van. Oto ko mampunyoi masin 4 silinder nan punyo kapasitas 782 cc. Oto ko di lampihi jo bodi karangko nan tabuek dari logam aluminium alloy. Untuak oto nan generasi partamo ko mampunyoi babarapo tipe Mazda Familia, yaitunyo Familia (800) van jo wagon, sedan Familia 800, Familia 1000 van, sedan Familia 1000, jo Familia 1000 coupe. Samanjak oto ko mulai dijua atau ampek bulan tajua, tapeknyo pado bulan Februari 1964, panjualan oto Mazda familia ko sangaik laris sarato jo diminati dek pacinto otomotif. Katiko itu pulo panjualan oto ko dapek manguasai 44 persen pasa panjualan oto.[3]

Generasi kaduo[suntiang | suntiang sumber]

Generasi kaduo Mazda Familia iolah pado tahun 1967 hinggo tahun 1977. Pada tahun 1967 tadapek sabuah pambaharuan yaitunyo parubahan karangko bodi nan labiah agak moderen. Tahun 1968 tajadi pulo parubahan pado masin rotary R100. Babarapo tipe dari Mazda Familia generasi kaduo ko adolah Mazda 1000, Familia Presto, Mazda 1200, Mazda 1300, sarato jo Grand Familia. Karano alah manggunoan masin R100, oto Mazda ko dapek dipacu hinggo kacepatan nan paliang tinggi yaitunyo 180 km/jam dan hanyo mambutuahkan wakatu sakitar 16,4 datiak untuak manampuah jarak 400 meter. Familia Rotary Coupe ko dapek juara balap oto di Grand Prix Singapura pado tahun 1969.[4]

Generasi katigo[suntiang | suntiang sumber]

Generasi katigo Mazda Familia ko barado pado tahun 1977 hinggo tahun1980. Oto ko di produksi pado tahun 1977, sangkek tu harago minyak dunia sadang naik jo maha. Pado periode tahun iko mulai tajadi pulo kanaikan pamintaan tahadok kandaraan oto nan punyo emisi karbon nan labiah randah sarato jo aspek kaamanannyo nan labih baiak. Pado tahun 1976, Mazda Familia manggunoan teknologi pembakaran bahan baka nan ramah tahadok lingkuangan.[4]

Generasi kaampek[suntiang | suntiang sumber]

Generasi kaampek Mazda Familia dibaritahuan patamo kalinyo pado 2 Juni 1980 nan disabuik juo sabagai BD Familia atau Mazda 323 atau Mazda GLC. Pado tahun tu juo oto generasi kaampek ko langsuang mandapek panghargoan sabagai oto Japang nan terbaik atau Japan Car of the Year. Salain itu, hanyo dalam tempo wakatu 27 bulan samanjak produksi partamo, panjualan kumulatif dari oto Mazda Familia generasi kaampek iko mancetak angko sajuta unit atau mamecahkan panjualan sajuta unit mobil tacapek, mangalahkan Chevrolet Citation (General Motors) nan butuah wakatu 29 bulan dan VW Golf nan butuah wakatu salamo 31 bulan untuak mancetak panjualan sajuta unit.[5][6]

Generasi kalimo[suntiang | suntiang sumber]

Generasi kalimo Mazda Familia atau disabuik juo jo kode (BF) di produksi dari tahun 1985 hinggo 1989. Oto ko dibuek jo tujuan untuak manjadi oto keluarga nan punyo kualitas tinggi. Generasi kalimo diluncuakan pado bulan Januari 1985 nan bantuaknyo labiah sporti sarato jo tampilan nan aerodinamis kelas dunia. Oto nan dari generasi ka limo ko punyo baragam-ragam bantauk nan alah diproduksi. Tadapek bantuak sedan jo oto nan punyo bak balakang nan di produksi tahun 1989 hinggo 1994. Ado pulo nan batipe colombia nan diproduksi hinggo tahun 2004. Tadapek pulo pambaharuan masin di oto generasi kalimo ko yaitunyo panggantain masin tipe E ka masin tipe B.[7]

Generasi kaanam[suntiang | suntiang sumber]

Generasi kaanam Mazda Familia ko disabuik juo jo kode (BG) nan diproduksi pado 1989 hinggo 1994. Namo oto nan di kaluan pado tahun 1989 ko di agia namo jo Familia Astina atau 323F. Tipe oto nan diproduksi ko ado babarapo macam, ado oto nan punyo pintu tigo, pintu ampek, jo oto nan punyo limo buah pintu. Produksi oto generasi kaanam atau BG Familia ko sabagiannyo mulai dibarantian pado 24 Mei 1994, maskipun baitu ado babarapo tipe oto nan masih diproduksi sampai bulan Oktober 1996. Di Australia, model BG ko taruih dijua hinggo tahun 1996 karano haragonyo nan labiah tajangkau dari pado model BH nan kaluaran tabaru.[7][8]

Generasi katujuah[suntiang | suntiang sumber]

Generasi katujuah dari oto Mazda Familia diproduksi tahun 1994 hinggo 1998. Oto nan diluncuakan tahun 1994 ko diagia kode (BH). Namo oto dari generasi katujuah ko baragam-ragam di tiok-tiok wiilayah sarupo Mazda Lantis di Jepang, Protege di Amerika Utara, Mazda Artis di Amerika Selatan, jo Mazda Etude di Afrika. Katiko iko industri dari oto Mazda familia ko sadang naiak. Oto ko basaiang jo pabrik-parik oto nan lainyom sarupo jo Toyota Camry. Parusahaan oto ko basaiang untuak manunjuakan kualitas oto nan rancak. Pabedaan kualitas oto ko dapek dicaliak dari masin oto, rem cakramnyo, jo pembakaran bensinyo.[7][9]

Generasi kasalapan[suntiang | suntiang sumber]

Generasi kasalapan diluncuakan pado tahun 1998. Oto generasi kasalapan ko di agia kode jo (BJ). Oto nan punyo ampek jo limo pintu kabanyakan di jua di negara Amerika Serikat jo kanada. Untuak oto nan tigo pintu rato-rato kabanyakan di jua di Asia. Oto ko alah dilengkapi jo gigi oto nan otomatis salian oto nan gigi nyo manual masih tetap di juo pulo. Pado tahun 2004, Mazda Motor Corporation mambarantian produksi oto Mazda Familia nan kamudian produksi oto tasabuik dilanjuikan jo mamproduksi oto Mazda 3 atau Axela.[7]

Mazda Familia di Indonesia[suntiang | suntiang sumber]

Oto Mazda di Indonesia baru didatangan dek Mazda Motor Corporation (MMC) pado maso tahun 1970-an malalui parusahaan PT Mazda Indonesia Manufacturing (parusahaan karajo samo MMC, Sumitomo Trading Corporation, jo Indomobil). Oto nan di datangan ka Indonesia ko di agia namo katiko tu jo namo MR90 nan marupoan arati dari singkatan Mobil Rakyat 90. Pado maso itu, oto ko di datang ka pasa di Indonesia manajdi pasaiang oto nan alah tanamo katiko tu yaitunyo oto Kijang. Tipe-tipe oto Mazda nan ado di Indonesia katiko tu iolah Mazda Baby Boomers, dan Mazda VanTrend. Karajo samo Mazda Motor Corporation jo Indomobil kamudian salasai pado tahun 2006, iko dikaranoan Mazda Motor Corporation alah mambuek parusahaan di Indonesia yaitunyo Mazda Motor Indonesia.[10]

Poto-poto Mazda Familia[suntiang | suntiang sumber]

Rujuakan[suntiang | suntiang sumber]

  1. "Google Maps Isi Museum Mazda". Google Maps (dalam bahasa Indonesia). Diakses tanggal 2020-04-28. 
  2. GridOto.com. "Mengenal Sejarah Mazda, Ternyata Awalnya Adalah Produsen Wine - GridOto.com". otomotifnet.gridoto.com (dalam bahasa Indonesia). Diakses tanggal 2020-04-28. 
  3. "the Mazda Familia Edition | Great Cars of Mazda". www2.mazda.com. Diakses tanggal 2020-04-28. 
  4. a b "Mazda : The Bongo Edition | Great Cars of Mazda". www2.mazda.com. Diakses tanggal 2020-04-28. 
  5. "MAZDA: Mazda's History of Car of the Year Japan Awards | External evaluation". www.mazda.com. Diakses tanggal 2020-04-28. 
  6. "Mazda : Familia Series Part 3 (5th Generation model) | Great Cars of Mazda". www2.mazda.com. Diakses tanggal 2020-04-28. 
  7. a b c d "Mazda : The Familia Series Part 4 (sixth – 9th generation) | Great Cars of Mazda". www2.mazda.com. Diakses tanggal 2020-04-28. 
  8. "Haima CA7130, a rebadged Mazda 323". 
  9. "Toyota Mazda - Toyota and Mazda car models: Specs, Prices and Release Date. Find out all info about 2018 and 2019 Toyota, Lexus and Mazda vehicles". Toyota Mazda (dalam bahasa Inggris). Diakses tanggal 2020-04-28. 
  10. developer, medcom id (2016-10-17). "Sejarah Perjalanan Mazda di Indonesia". medcom.id (dalam bahasa Indonesia). Diakses tanggal 2020-04-28.