Maria SW Sumardjono
Maria Sri Wulan Sumardjono adolah Guru Gadang Hukum Agraria lulusan Universitas Gadjah Mada (UGM). Padusi kelahiran Yogyakarta, 23 April 1943 tu alah pernah manjadi Dekan UGM maso 1991-1997. Salain tu baliau adolah Kapalo Pusek Pangkajian Hukum Tanah (PPHT), Fakultas Hukum UGM samanjak 1995. Cukuik banyak posisi nan pernah dijabati dek Maria sabagai saurang akademisi, panaliti, pajabaik pambuek kaputusan maupun sabagai pamakalah dalam seminar agraria. Implementasi dari karajo-karajo takaik agraria nan dijalani dek Maria, baliuam mandokumentasian kasado hal tasabuik dalam bantuak buku, tadapek 10 buku nan tagolong kapado buku nan alah ditabikan maupun dalam rancangan panabikan.
Maria mamiliah fokus keilmuan Agraria karano sikap-sikap keadilan nan dipatenkan dek urang tuonyo sajak ketek. Perihal ko manjadi salah ciek pamicu baa Maria mandalami keilmuannyo walau pado dasarnyo Maria indak punyo dasar pangathuan nan cukuik tantang ilmu ko. Dorongan nan kuek juo baliau dapekan dari dosen-dosen samaso kuliah, namun hal tasabuik indak manjadikan Maria manjadi sosok nan punyo tingkek katagantuangan ka urang lain nan tinggi. Dorongan nan diagiah hanyo untuak mandalami tanpa ado intervensi nan labiah dari pihak lua.
Maria dikenal sabagai sosok padusi pakarajo kareh jo disiplin nan tinggi. Saparti nan dicaliak di halaman Kompas, kepribadian tasabuik alah tabantuak sajak Maria mulai mangikuti janjang pandidikan karano Maria maikuikan progam asrama di sikolah. Tapi, hal nan mandasar dari itu sadonyo adolah pandidikan moral nan alah didapekan dari rumah, Maria dididik cukuik kareh. Sikap tasabuik diimplementasikan dalam mambangun karirnyo sabagai saurang akademisi, panaliti, ataupun pajabaik pambuek kaputusan. Sabagai buah hasil karajo kailmuannyo, Maria mandapek penghargaan sarupo Satya Lencana Kesetiaan, 25 taun pangabdian sabagai staf pangaja UGM jo Piagam tando Kahormatan Bintang Jaso Pratama sabagai Panasihat Ahli Menteri Nagaro Agraria, taun 1998.
Maria nan kritis jo baprestasi tanyato mamiliki kasanangan untuak mambaco karya sarupo buku-buku Pramoedya Ananta Toer, Karl May jo nan laiinyo. Hobi mambaco sastra ko diikuikan jo kasanangan manonton film di bioskop, sarato sampai kini Maria ikuik aktif manulis babarapo artikel di media massa.