Maratok

Wikipedia Minangkabau - Lubuak aka tapian ilimu
Loncat ke navigasi Loncat ke pencarian

Maratok atau ratok adolah kabiasaan mandendangkan parasaan sadiah dek urang Minangkabau pado maso saisuak. Kutiko ado karik-kirabat nan maningga, urang banyak manangih dek sadiah bapisah jo mandiang. Kutiko bapisah samantaro jo urang nan disayang, urang ‘tu manangih basamo-samo. Maratok indak cuma manangih, tapi basarotoan jo mandendangkan pantun-pantun nan manyaik-nyaik ati.

Maratok labiah dikataui urang adonyo di kamatian. Padohal kutiko maantakan urang gaek pai naik aji pun urang maratok juo, bacarai jo anak atau jo laki pun urang maratok, bahkan bacakak jo dunsanak urang maratok pulo. Namun, ratok pado kajadian kamatian manjadi sua’tu kaharusan. Indak cukuik rasonyo manyatokan kasadihan kalau indak maratok. Indak langkok raso sadiah ka mandiang kalau kamatiannyo indak diratok-i. Akianyo di maso saisuak, maratok manjadi wajib dalam satiok kamatian di Minangkabau.

Di babarapo kampuang, ado urang nan sangaik pandai maratok. Aratinyo, urang ‘tu pandai bana mandendangkan pantun-pantun sadiah sambia manangih. Urang nan disabuik ‘tukang ratok ‘tu acok datang ka suatu kamatian atau diundang dek urang nan kamalangan. Dalam kabiasaan maratok ‘tu, ‘tukang ratok badendang, nan lain manangih baibo-ibo.

Di kudian ari, ratok barubah manjadi lagu tradisional Minangkabau. Lagu-lagu ratok dinamoi lagu rusuah. Samo jo karya-karya sastra pado umumnyo, lagu ratok ‘tu dibuek karano ado kajadian nan sabana-bana tajadi di masyarakaik. Namo-namo lagu ratok ‘tu di antaronyo adolah Ratok Pak Bawang, Ratok Lawang, Ratok Suayan, Ratok Sariak, Ratok Kamang, Ratok Canduang, Ratok Baso, Ratok Sianok, Ratok Taram, Ratok Pariaman, jo Ratok Aia Bangih. Tampak sacaro umum baraso namo-namo lagu saluang ‘tu dibuek didasarkan pado namo-namo tokoh, namo-namo geografis di Minangkabau, sarato dari kajadian nan pernah ado.