Lompek tinggi
Lompek tinggi adolah salah satu ulahrago katarampilan untuak malewati mistar nan barado di kaduo tiangnyo. Katinggian lompek nan dicapai palompek tagantuang dek kamampuan jo persiapan batandiang dari masiang-masiang atlet. Tingginyo lompek bagantuang pado tigo faktor. Partamo, palompek harus magambangan dayo angkek sagadang mungkin bia dapek mancampakan badan ka udaro jo kacepatan nan sagadang-gadangnyo. Tinggi nan digunoan dek badan sasuai jo kacepatan nan digunoan untuak maninga'an tanah. Kaduo, suduik tulakan sadapek mungkin mandakek'i tagak luruih bia dapek mamusekan gaya untuak mancapai katinggian, namun suduik tulakan harus cukuik untuak mambawok badan dari sabalah mistar ka sabalah nan lain. katigo, jarak di mano barek badan dapek diangkek tabateh. Pado target lompekan, bateh jarak harus antaro 2 jo 3 kaki dimano saurang palompek nan tabaiak dapek manulakan titiak bareknyo ka ateh dari sikap tagak jo tangan disampiang badan.[1]
Pakambangan[suntiang | suntiang sumber]
Dalam cabang ulahrago lompek tinggi, sadoalah atlit barupayo untuak malompek satinggi-tingginyo. Dick Fosbury adolah namo urang nan partamo kali marubah gaya lompek tinggi katiko inyo mamiliah pandakekan nan babeda dalam malompek, nan akhirnyo disabuik sabagai Lompek Fosbury. Sabalum Olimpiade Mexico City taun 1968, sadoalah atlit lompek tinggi malompek jo caro baguliang ka muko atau kasampiang. Dick Fosbury mangubah pandakekan konvensional ko katiko mamanangan medali ameh Olimpiade jo caro malompek tabaliak dan pungguangnyo talabiah dahulu. Caro ekstrim ko salanjuiknyo dipalajari dek sado atlit lompek tinggi dunia sasudah kesuksesan Fosbury katiko Olimpiade 1968. Sajak Vladimir Yaschenko pado taun 1978 mancetak rekor dunia gaya straddle jo catatan tinggi 2,34 meter, sadoalah juara dunia lompek tinggi sasudah itu mangunoan gaya Fosbury Flop dalam mancetak rekor dunia. Rekor samparono untuak cabang ulahrago lompek tinggi dicetak dek Javier Sotomayor urang Kuba pado 1993 jo catatan tinggi 2,45 meter.[2]
Sarana[suntiang | suntiang sumber]
Lapangan lompek tinggi tadiri dari jalur lari, palang jo daerah jatuah. Jalur lari digunoan untuak awalan sabalum malompek. Jalur lari digunoan untuak awalan indak kurang dari 15 meter. Jalur iko indak buliah naiak atau turun. Kamiriangannyo harus saketek mungkin. Samantaro tampek nan digunoan untuak tulakan harus luruih jo indak buliah miriang. Palang adolah bateh bawah nan harus dilewati atlit lompek tinggi. Dalam aturan IAAF, palang nan digunoan untuak lompek tinggi harus manggunoan balok nan tabuek dari fiber indak logam. Paraturan iko digunoan untuak mahambek cidera katiko atlit malompek jo manyantuah palang. Palang dilatakan pado panyangga nan babarapo lubangnyo untuak manampekan palang di katinggian nan diinginan. Daerah jatuah iolah tampek nan dipabuliahan untuak mandarek sasudah malompek. Panjang daerah jatuah atau tampek mandarek indak buliah kurang dari 5 meter jo lebanyo 3 meter.[3]
Teknik[suntiang | suntiang sumber]
- Awalan marupokan kunci patamo bagi palompek dalam malakuan lompekan.
- Tumpuan dilakuan jo kaki takuaik jo harus tapek pado titiak tumpu.
- Malayang katiko malewati mistar, titiak barek badan sadakek mungkin jo mistar, dilakuan jo tanago saketek mungkin jo sadar untuak mahindari gerakan nan indak paralu.
- Pandaratan marupokan sikap badan katiko mandarek tagantuang dari masiang-masiang gaya, dilakuan sacaro sadar jo posisi badan sademikian rupo sahinggo indak ma'akibekan raso sakik atau cidera.[4]
Gaya[suntiang | suntiang sumber]
Guliang Paruik[suntiang | suntiang sumber]
Gaya guliang paruik salah ciek gaya dalam lompek tinggi di mano posisi badan tatilungkuik untuak malewati mistar. Ciri dalam malakuan gaya guliang paruik diawali jo gerakan awalan, tulak'an atau tumpuan, sikap badan diateh mistar jo mandarek. Pado awalan palompek ma'ambiak langkah dari muko mistar atau bilah kabalakang 5 atau 7 langkah, pado hituangan 5 atau 7 langkah kaki kiri atau tumpu mamijak balok tulakan. Pado wakatu ka malakuan tumpuan, palompek pado tigo atau limo langkah tarakhir harus sudah mampasiapan kakinyo untuak malakuan tulakan nan sakuek-kueknyo, sahinggo dapek mangangkek badannyo malayang ka ateh. Tulakan dimulai dari tumik, taruih ka talapak kaki dan barakhir pado ujuang kaki nan dilakuan sacaro capek jo tapek. Pado saat titiak barek badan barado di ateh kaki tulakan, sacapek mungkin pagalangan kaki ditulak luruih ka ateh, badan dicondogan ka balakang hinggo barek badan barado pado kaki balakang (kaki ayun) sikap badan di ateh mistar dibantuak mulai dari saat lapehnyo kaki tulak sampai malayang di ateh mistar.[5] Posisi badan di ateh mistar iolah sasudah tungkai nan diayunan malewaikan mistar, posisi badan talungkuik di ateh mistar, jo posisi pinggul labiah tinggi dari pungguang. Kaki tulak jo lutuik dibengkokan manuju ka sampiang. Samantaro itu, kapalo dimirianggan kabawah mistar, badan akan jatuah ka tampek pandarekan.[6] Katiko mandarek atau jatuah nan patamo kali kanai adolah kaki kanan jo tangan, bilo tumpuan mangunoan kaki kiri, lalu baguliang manyusuri pungguang, tangan jo barakhir ka bahu jo pungguang badan.[5]
 |
Iko baru laman rancangan. Bantulah Wikipedia untuak mangambangannyo. |
Referensi[suntiang | suntiang sumber]
- ↑ Refiater, Ucok Hasian (2012-09-01). "HUBUNGAN POWER TUNGKAI DENGAN HASIL LOMPAT TINGGI". JURNAL HEALTH AND SPORT (dalam bahasa Inggris). 5 (03): 670.
- ↑ Soemawinata, Nenny (2016-02-05). Fusion Leadership (Harmoni dua dunia). Jakarta: Gramedia Pustaka Utama. hlm. 178. ISBN 978-602-03-2464-7.
- ↑ Nelistya, Anne (2007). MENJADI PEMAIN ATLETIK YANG TANGGUH. Jakarta: Be Champion. hlm. 10. ISBN 978-602-8884-07-5.
- ↑ Susila, Wawan (Juli 2019). "EFEKTIVITAS METODE PEMBELAJARAN DRILL UNTUK MENINGKATKAN KEMAMPUAN LOMPAT TINGGI GAYA GULING (STRADDLE) TERHADAP SISWA KELAS V SEMESTER 2 SD NEGERI NGABEYAN 01 KECAMATAN KARTASURA TAHUN PELAJARAN 2017/2018". Konvergensi. 6 (29): 173. ISSN 2301-9050.
- ↑ a b Sriawan, Sriawan (2015). "IDENTIFIKASI KESALAHAN DALAM MELAKUKAN LOMPAT TINGGI GAYA GULING PERUT SISWA KELAS V sdn iii PENGASIH WATES KULONPROGO". Jurnal Pendidikan Jasmani Indonesia (dalam bahasa Inggris). 11 (1): 56–58. doi:10.21831/jpji.v11i1.8171. ISSN 2581-2300.
- ↑ Ilham, Zulfikar (2017-06-22). "HUBUNGAN ANTARA DAYA LEDAK OTOT TUNGKAI DENGAN HASIL LOMPAT TINGGI GAYA STRADDLE SISWA PUTRA KELAS X SMK YPS PRABUMULIH". JURNAL ILMU KEOLAHRAGAAN (dalam bahasa Inggris). 16 (1): 17. doi:10.24114/jik.v16i1.6449. ISSN 2549-9777.