Laki-laki di Minangkabau

Peran laki-laki di Minangkabau salah satunya sebagai Penghulu

 Laki-laki di Minangkabau sangaik baparan pantiang dalam manjago harato pusako kaumnyo. Anak laki-laki yang alun manikah baparan sabagai kamanakan nan harus baraja kapado mamaknyo tantang caro mamimpin kaluarga jo sukunyo. Anak laki-laki nan alun manikah tingganyo di Surau, karano di Rumah Gadang indak ado biliak untuak laki-laki, hanyo padusi nan punyo hak ateh biliak di Rumah Gadang.

         Di surau anak laki-laki diajaan mampadalam ilmu agamo jo pangatahuan adaik, laki-laki Minang nan alah mampunyoi pangatahuan dianjurkan marantau untuak mamelokan ekonomi kaluarga jo maso depannyo. Laki-laki Minang nan alah patuik untuak manikah alah sewajarnyo mancari padusi untuak ka dijadian bini.

Peran laki-laki di Minangkabau

Sabagai Ayah

  Laki-laki nan alah manikah atau alah bakaluarga harus batangguang jawab panuah ka anak jo bininyo, sarato maajaan tantang kahidupan nan sasuai jo nilai-nilai agamo sarato adaik Minangkabau.

Sabagai Urang Sumando

  Sumando bararti suami nan tingga dirumah bininyo. Sabagai urang Sumando lelaki Minang haruslah sangaik bahati-hati, karano posisinyo dirumah kaluarga bininyo hanyo sabagai tamu. Layanan kapado Sumando bak cando manantiang minyak panuah nan mukasuiknyo, Sumando harus dijago parasaannyo supayo indak tasingguang.

   Ado ampek macam panilaian ka Sumando :

•    Sumando bapak paja : Sumando nan hanyo batingkah sabagai pajantan sajo, nan indak mampadulian kahidupan jo kaadaan bininyo.
•   Sumando kacang miang : sumando nan hanyo mambuek rusuah atau kakacauan dirumah bininyo.
•    Sumando lapiak buruak : Sumando nan suko maabiahan harato bando bininyo.
•    Sumando niniak mamak : sumando nan bisa tampek lawan baiyo.

Sabagai Mamak

Hubungan antaro mamak jo kamanakan adolah hubungan antaro seorang laki-laki jo anak saudara padusinyo. Nan dikatokan mamak adolah saudara laki-laki dari ibu, sadangkan kamanakan adolah anak dari saudara padusi. Mamak baparan sabagai pamimpin jo tampek baraja samo kamanakannyo mulai dari lingkuangan nan paliang ketek adolah rumah, kaum, kampuang jo lingkuangan nan paliang gadang adolah nagari. Dalam mambimbiang kamanakannyo mamak mampunyoi duo fungsi pokok

• kapado kamanakan nan padusi, bimbiangan persiapan untuak manyambuik warih bajawek jo persiapan untuak malanjuikkan katurunan. Nan dimaksud warih bajawek adolah pamahaman-pamahaman nilai sosial nan manampekkan padusi sabagai nenek sarato ibu nan akan mangasuah katurunanyo kelak.
• kapado kamanakan nan laki-laki, bimbiangan persiapan untuak pusako batolong adolah baparan sabagai panunjang jo pangambangan sumber-sumber kahidupan sanak saudaranyo, tarutamo saudaro padusinyo karano akan malanjuikkan katuruan.
  

Sabagai Panghulu

    Panghulu adolah Andhiko atau rajo dari kamanakannyo nan bapungsi sabagai kapalo pamarintah jo manjadi pimpinan dalam maatur kaumnyo. Nan disampaikan dalam papatah kamanakan barajo ka mamak, mamak barajo ka panghulu, panghulu barajo ka nan bana, nan bana tagak sandirinyo.