Lagenda Minangkabau
Lagenda Minangkabau mancaritoan asa mulo namo "Minangkabau". Namo ko barasa dari duo kato, iyolah minang (kamanangan) jo kabau.
Lagenda mancaritoan pasalisiahan tanah antaro urang awak jo palimo dari nagari subarang nan ka manjajah. Palimo jo pasukannyo marupoan pasukan dari karajaan Majopaik.[1] Untuak mailakan parang, pamimpin urang awak, mamutuihkan untuak maadu kabau sampai mati. Palimo jo pasukannyo tu pun satuju dan maambiak kabau nan paliang gadang jo bagak. Sadang urang awak manyiapkan bayi kabau nan lapa batanduak ketek nan diasah manjadi satajam pisau. Mancaliak kabau gadang manyubrang di ladang, bayi kabau mangaja untuak manyusu dari kabau tu. Kabau gadang tu mancaliak biaso sajo ka bayi kabau nan balari kaarahnyo. Kironyo, katiko bayi kabau tu mandorongan kapalonyo (untuak manyusu), tanduaknyo manyucuak paruik kabau tu inggo mambunuah kabau gadang itu. Urang awak pun mamanangan adu kabau itu dan manamoan suku bangsonyo sabagai "Minangkabau" untuak manandoi kajadian pantiang tu.[2]
Nilai moral nan didapek dari carito ko adolah pagunoan aka jo basiasaik untuak mailakan parang dan kagaduahan. Hal itu marayoan santiang jo manangnyo urang Minangkabau.
Simbol kabau[suntiang | suntiang sumber]
Kabau adolah hewan pantiang di kabudayaan Minangkabau. Inyo dapek digunoan untuak mambajak sawah dan dapek maasiakan susu jo dagiang. Pantiangnyo kabau dalam simbol budayo dapek juo dijumpoi di suku Toraja.
Kabau, tarutamo tanduaknyo, adolah simbol pantiang di budayo Minangkabau. Atok rumah tradisional Minangkabau, Rumah Gadang, malangkuang ka ateh dari tangah inggo marunciang di ujuangnyo bak cando tanduak kabau. Tutuik kapalo padusi Minangkabau pun, nan disabuik tingkuluak, dilipek dan dibantuak sarupo tanduak kabau.
Catatan sajarah[suntiang | suntiang sumber]
Namo Minangkabau partamo kali disabuik jo Minanga Tamwan, pado abaik ka tujuah tatulih dalam Batu basurek Kedukan Bukik. Pado batu basurek tu mancaritokan pajalanan ziarah Sri Jayanasa dari Minanga Tamwan dikawal jo 20.000 tantara manuju Matajap dan manakluakan babarapo daerah di selatan Sumatera.[3]
Rujuakan[suntiang | suntiang sumber]
- ↑ "Invasi Majapahit ke Pagaruyung dan Pertarungan Dua Kerbau". Sindo News (dalam bahasa Indonesian). 11 March 2017.
- ↑ Samsuni. "Asal Mula Nama Nagari Minangkabau". Cerita Rakyat Nusantara. Diarsipkan dari versi asli tanggal 11 May 2012. Diakses tanggal 6 May 2012.
- ↑ R. Ng. Poerbatjaraka, Riwajat Indonesia. Djilid I, 1952, Jakarta: Yayasan Pembangunan