Khatijah Sidek
Khatijah Sidek | |
|---|---|
| Lahia | 1918 |
| Maningga | 1982 |
| Kabangsaan |  Malaysia |
| Karojo | Politisi |
| Dikana dek | Pajuang kamardekaan Malaysia jo Indonesia |
| Urang tuo | - Mohammad Sidek bin Haji Ismail - Sariah binti Mohammad Saleh |
Khatijah Sidek (laia di Kampuang Baru, Pariaman, Sumatera Barat, taun 1918 – wafaik di Kuala Lumpur, Malaysia, taun 1982) adolah pajuang kamardekaan Malaysia jo Indonesia. Baliau dikana sabagai politisi padusi Malaysia nan cukuik tanamo.
Asa usua[suntiang | suntiang sumber]
Khatijah adolah anak dari pasangan Mohammad Sidek bin Haji Ismail jo Sariah binti Mohammad Saleh asa Pariaman, Sumatera Barat. Ayahnyo adolah surang padagang nan cukuik bahasil, sarato mampunyoi cito-cito tinggi untuak anak-anaknyo. Khatijah Sidek nan banamo ketek Khadijah, adolah anak bungsu dari sapuluah basudaro.
Kahidupan[suntiang | suntiang sumber]
Pado taun 1936, Khatijah manamaik-an pandidikannyo di Normal School, Bukittinggi. Sasudah itu baliau maaja di Pangkalan Susu, Sumatera Utara (1936-1938), Pangkalan Brandan (1938-1939), Binjai (1939-1940), sarato Matang Glumpang Dua, Aceh Salatan (1940-1942). Sasudah itu baliau pai ka Bukittinggi lalu mandirian pasukan semi-militer padusi "Kesatria Bangsa."
Barakaik undangan anggota Kesatria Bangsa, baliau pai ka Singapura pado bulan Juni 1946. Disinan baliau manjadi panggiat padusi nan cukuik lantang. Karano kagiatan politiknyo tu, pamarentah kolonial Inggirih mamanjaroannya di Outram Road pado 18 Agustus 1948. Balaiau baru dibebasan pado taun 1950. Panjaro indak manyuruik-an niaiknyo dalam manantang kolonialisme Inggirih. Karier politiknyo taruih balanjuik lalu mancapai puncaknyo katiko barado di Samananjuang Malaysia.
Pado taun 1953, Khatijah manjadi anggota UMNO sarato manduduak-i jabatan Setiausaha Kaum Ibu sarato Katua Kaum Ibu (1953-1956). Salamo mamimpin Kaum Ibu, Khatijah alah mahimpun hampia 10.000 urang padusi untuak bagabuang jo UMNO.
Khatijah salah surang anggota UMNO nan paliang vokal. Baliau manuntuik supayo UMNO barani mamakiak-an kato "mardeka". Dalam Pasidangan Aguang UMNO taun 1953, baliau jo lantang manuntuik supayo jumlah pawakilan dari kaum padusi ditambah. Kalantangannyo tu manimbuaan karasahan di kalangan pamimpin sarato para anggota UMNO. Hal iko manyabab-an dipecatnyo baliau dari kaanggotaan UMNO pado taun 1956. Pado pariode 1959-1964, Khatijah manjadi anggota parlemen dari Partai Islam Sa-Malaysia.[1]
Rujuak-an[suntiang | suntiang sumber]
- ↑ Khatijah Sidek, Memoir Khatijah Sidek : Puteri Kesatria Bangsa, Universiti Kebangsaan Malaysia, 1995