Aia kawa

Sakalompok urang sadang mamanggang daun kupi di ateh api ketek sampai daun manjadi coklat dan kariang, untuak mambuek kopi daun (pantai baraik Sumatera, tanpa tahun)

Aia kawa, kawa daun, teh kawa, atau kopi daun adolah minuman tradisional masyarakaik Minangkabau jo Kurinci. Namo aia kawa barasa dari bahaso Arab, qahwah nan bararti kopi. Sakileh minuman aia kawa iko sarupo jo kopi tapi babeda jo kopi-kopi nan biasonyo. Aia kawa ko indak tabuek dari racikan biji kopi malainkan dibuek dari daun kopi. Daun kopi lokal pilihan awalnyo dikariangkan jo caro disangrai salamo 12 jam. Katiko ka diminum, daun kariang iko dicampua jo aia dingin, lalu disaduah jo aia nan mandidiaah. Di daerah Kurinci, minuman iko tanamo jo sabutan air kawo.

Sijarah

Kawa Daun tasaji dalam tampuruang karambia dan biaso tahidang basamo goreang.

Aia kawa dapek dikaikan jo adonyo tanam paksa pado maso kakuasaan kolonial Balando. Pado maso itu, salain kaum pribumi nan disuruah untuak mambudidayokan kopi di Pulau Jawa, masyarakaik Minang diminta pulo untuak mananam kopi di daerah pagunungan. Budidaya tasabuik dilakukan hinggo padalaman Sumatera, di Luhak Agam jo Lima Puluh Kota.

Jinih kopi nan patamo kali ditanam adolah kopi Arabika. Satalah babuah, kopi tasabuik mampunyoi banyak paminat sarato hargo jua nan tinggi. Namun, panduduak di Sumatera Barat dilarang manikmati biji kopi untuak diri surang walaupun dipaso untuak mananamnyo demi kapantiangan pardagangan. Biji kopi tasabuik harus dijua ka VOC untuak diekspor ka Eropa. Paraturan iko diakali jo manggunokan dadaunan kupi nan dipicayo masih manganduang kafein.

Dalam novel Max Havelaar karya Multatuli, istilah kopi daun (kawa daun) ado disingguang, misalnyo dalam ota antaro tokoh Pangawas Verbrugge jo Letnan Duclari. Kumandan garnisun itu takajuik katiko mandanga ado minuman banamo "kopi daun", dan Verbrugge mangatokan basonyo minuman itu alah biaso diminum urang-urang di Sumatera.

Kandungan

Aia kawa ko indak pakek mode kopi, labiah saroman jo teh. Kandungan kafein pado minuman iko labiah randah pulo daripado kopi. Salain kafein, daun kopi ko juo mamiliki senyawa tanin nan marupoan kalompok polifenol, mambantuak raso sapek jo rono coklat. Senyawa-senyawa nan ado pado daun kopi ko mampunyoi manfaaik untuak badan, yaitu maubek panyakik kulik, hipertensi, malancarkan angok, sarato dapek manambah stamina.

Tradisi maminun

Minuman iko disarupuik wakatu cuaco dingin sarato dikinyam jo kulek-kulek angek cando goreang. Di tampek-tampek panjua aia kawa nan biasonyo babantuak dangau-dangau, biaso manyajikannyo indak jo galeh atau mangkuak, malainkan tampuruang karambia kariang nan dibalah duo. Tampuruang iko baagiah aleh bambu. Aia kawa dapek diminum basamo atau indak jo gulo.