Kacomato
Kacomato iolah lensa tipih untuak mato nan baguno menormalan jo mampatajam mato katiko maliek (ado nan barangko ado pulo indak).[1] Kini salain manjadi alaik bantu maliek, kacomato juo digunokan sabagai manggaya sarato alaik bantu khusus untuak manikmati hiburan sarupo kacomato khusus tigo dimensi.
Sijarah
[suntiang | suntiang sumber]Pendahuluan
[suntiang | suntiang sumber]Sijarah kacomato partamo kali dimulai dek Nero, Saurang Kaisar Roma, nan bakuaso pado taun 54 sampai 68 Masehi. Nero acok manggunoan batu paramato cakuang untuak inyo mambaco hinggo manonton acara pertunjukan. walaupun indak diketahui sacaro pasti apokah Nero mamiliki masalah jo matonyo.[2]
Panamuan kacomato
[suntiang | suntiang sumber]Banso Cino mungkin nan partamo kali mangunokan kacomato lazim digunokan sarupo zaman kini ko. Biasonyo kacomato tabuek dari lensa nan babantuak oval sangaik gadang nan tabuek dari batu kristal jo bingkai dari tampuruang kura-kura. supayo dapek mamegang kaconyo, banso Cino mangunokan duo kawek nan diagiah pambarek sarato dikaikan ka talingo urang nan mamakai tuh atau lensanyo diikekan ka topi atau manggunokan kaik nan dilakekan ka palipih urang tuh. Dek banso Cino wakatu itu, kacomato hanyo digunokan sabagai jimek kabaruntuangan atau alaik untuk mambuek inyo taliek labiah bagaya jo bawibawa sahinggo kadang inyo hanyo mangunokan bingka kacomato sajo tanpa ado lensa.[2]
Pakambangan
[suntiang | suntiang sumber]
Kacomato mulai tanamo di Eropa pado abaik ka-13. Namun babeda jo banso Cino, urang Eropa manggunokan kacomato untuak mambantu panglihatan inyo. Kacomato nan dipakai masih manyarupoi jo kacomato banso Cino yaitunyo dari kristal batu atau batu janiah.
Kacomato partamo nan dipagunoan dek urang Eropa hanyolah kaco pangadang nan dipacik dek ciek tangan. setelah tu barulah digunoan lensa kaco ganda nan diagiah gagang supayo bisa dikaikan ka talingo. lalu, gagangnyo pun dihilangkan dan digaantian dek pita atau tali supayo bisa diikekan ka kapalo. untuak babarapo wakatu, urang mangunokan kacamao per, yakni kacomato nan dijapik jo alaik sarupo samek ka ateh hiduang. Akhirnyo, lamo kalamoan, tabiklah ide untuak manggunokan kawaik bengkok nan dikarehkan supayo manjadi gagang di talingo.
Lensa nan digunokan untuak mangoreksi penglihatan konon digunokan dek Abbas Ibn Firnas[3] pado abaik ka sambilan. Abbas Ibn Firnas manamukan caro untuak mamproduksi lensa nan amaik janiah. Lensa ko ado dibantuak jo diasah manjadi batu bulek nan dapek digunokan untuak mambaco sahinggo takenal jo istilah batu mambaco.
Pado akhir abaik katigo baleh, akhirnyo dikatamukan bahwasanyo panggunoan kaco sabagai lensa jauah labiah baiak daripado manggunokan batu transparan. Hal iko badasarkan hasil penelitian ilmuan jo sejarawan inggris nan banamo Sir Joseph Needham. Penelitiannyo manunjuakan bahwasanyo kacomato dikatamukan 1000 taun nan lampau di Cino dan tasebar ka saluruah dunia pado zaman kadatangan Marco Polo pado taun 1270. Hal iko juo disabuikan dek Marco Polo dalam bukunyo tasabuik. Walau indak dikatahui sacaro pasti, tatapi urang pacayo bahwa tukang kacolah nan manjadi panggagas hal iko.[2]
Panyamparonoan kacomato
[suntiang | suntiang sumber]Pado taun 1784, Benjamin Franklin, saurang ilmuwan Amerika, barasil manamukan kacomato bifokal yaitunyo kacomato nan dapek dipagunoan untuak maliek untuak jarak nan dakek ataupun jarak nan jauah.[4]
Jinih kacomato
[suntiang | suntiang sumber]Kacomato itam
[suntiang | suntiang sumber]
Kacomato itam iolah kacomato nan mampunyoi lensa nan galok (biasonyo barono itam). Tujuan pambuatan kacomato iko iolah untuak malindunggi mato dari cahayo silau hinggo cahayo ultraviolet (UV). kacomato itam digunokan selain untuak malindunggi mato dari cahayo, juo acok digunoan untuak bagaya. Kacomato itam acok pulo digunoan dek urang tuna netra untuak alasan estetika supayo urang indak paralu maliek mato inyo.
Kacomato itam ko patamo kalinyo digunokan pado abaik ka-12 atau mungkin labiah awal di Cino. Mirip jo kacomato itam, suku Inuit mangunokan kacomato salju untuak malinduangi mato inyo, walaupun kacomato jinih ko indak dapek mangkoreksi kelainan nan dialami dek mato.[5]
Kacomato 3D
[suntiang | suntiang sumber]Kacomato 3D marupokan kacomato nan digunokan untuak manonton pilem tigo dimensi. Kacomato ko marupokan alaik bantu vital untuak mandapatkan sensasi tigo dimensi. Kacomato iko mamiliki ciek lensa nan barono merah jo ciek lensa nan barono biru atau cyan.
Kacomato baco
[suntiang | suntiang sumber]Kacomato baco iolah kacomato nan digunokan untuak mambantu mato mancapai penglihatan normalnyo katiko mambaco. Kacomato jinih ko manjadi kebutuhan bagi urang nan mandapek cacat mato. Contoh kelainan mato nan dapek diperbaiki jo kacomato baco iolah Miopia atau acok disabuik jo rabun jauah. Rabun jauah ko iolah sabuah kelainan mato di maa mato indak dapek maliek objek nan jauh sacaro jaleh, tetapi dapek maliek benda nan dakek akibek kelainan lensa mato urang tasabuik alah kahilanggan gaya elastisitasnyo. Akibaiknyo cahayo pun indak tapek jatuah di retina melainkan jatuah di muko retina. Kelainan mato ko dapek diatasi jo bantuan kacomato balensa konkof atau acok juo disabuik jo kacomato minus.
Hipermetropi atau lazim pulo disabuik rabun dakek, iolah kelainan mato dimaa mato indak dapek maliek benda nan dakek, tatapi dapek meliek benda nan jauah akibek lensa mato urang tasabuik kahilangan elastisitasnyo sahinggo cahayo indak jatuah tapek di retina melainkan jatuah di balakang retina. Kelainan mato ko bisa diatasi jo bantuan lensa konveks atau acok juo disabuik kacomato plus.
Presbiopi atau acok juo disabuik rabun tuo karano biasono kalainan mato iko dialami dek urang-urang nan alah barusia di ateh 40 taun. Kelainan jinih iko mambuek si pandarito indak dapek maliek dengan jaleh benda-benda nan barado di jarak jauah ataupun benda nan barado di jarak dakek. Untuak mangatasi kelainan mato ko, diharuskan mangunokan kacomato bifokal.
Astigmatisma atau disabuik pulo jo istilah silinder, iolah sabuah gangguan pado mato nan mambuek si pandarito indak mampu membedakan garih luruih. Gangguan mato ko disababkan karano adonyo permukaan nan indak rato pado bagian mato sahinggo katiko cahayo dipantulkan malalui permukaan yan indak rato tasabuik, mato akan mangirimkan cahayo nan indak rato pulo pado retina mato. Untuak mangatasi masalah iko, dapek manggunokan lensa silinder.
Kacomato kini
[suntiang | suntiang sumber]
Kini ko, kacomato lazim sakali manggunokan lensa plastik. Hal iko disababkan patimbangan untuak malinduangi mato si pangguno karano lensa plastik indak mudah pacah dibandiangkan jo lensa kaco. Salain itu, dengan pakambangan teknologi nan samakin canggih, lensa kacomato plastik pun diusahokan supayo indak mudah pacah bakapiang-kapiang sahinggo indak mambahayokan mato panggunonyo.
Panggunoan kacomato pado zaman kini indak lai tabateh sabagai alaik bantu mancaliak. Kini ko, kacomato alah manjadi salah satu aksesoris fashion nan turuik bakambang capek.[5] Indak jarang pulo kacomato manjadi gaya khusus dek urang tatantu.
Walaupun dek baitu, kacomato kini ko mulai diraso marepotkan. Walaupun praktis jo mudah digunokan, tatapi kacomato juo dirasokan mahambek manusia dalam bakegiatan sarupo katiko baolahraga, katiko makan-makanan angek nan manyebabkan kacomato barambun, baranang, katiko bajalan di tangah hujan, atau malakukan papindahan dari tampek nan basuhu drastis misalnyo dari tampek nan dingin sakali ka tampek nan labiah angek. Keberadaan lensa kontak untuak mambantu panglihatan sarato operasi lasik pun mulai manjadi alternatif dek pangguno kacomato
Rujuakan
[suntiang | suntiang sumber]- ↑ "Definisi Kacamata". Diakses tanggal 2020-10-26
- ↑ a b c Wulffson, Don M.H: " Kisah-Kisah Menarik Di Balik Penemuan Benda-Benda Biasa Dalam Kehidupan Sehari-Hari", halaman 100. Penerbit Arena, 2000. ISBN 979-6695-13-5
- ↑ Ajram, Dr. Kasem: "Miracle of Islamic Science", Appendix B. Knowledge House Publisher, 1992.ISBN 0-911119-43-4
- ↑ "Perkembangan Kacamata" Archived 2010-12-26 di Wayback Machine.. Diakses tanggal 2020-11-26.
- ↑ a b Gramedia Pustaka Utama: " Asal Usul Api Sampai Alat Musik", halaman 07. Penerbit Gramedia Pustaka Utama, 2000. ISBN 978-979-22-4641-4