Hubuangan masyarakat

Wikipedia Minangkabau - Lubuak aka tapian ilimu
Loncat ke navigasi Loncat ke pencarian

Hubungan masyarakat adolah salah satu posisi nan manangani urusan publik dari parusahaan. Pangartian dari hubungan masyarakat iko bisa dibagi manjadi duo yaitu sacaro internal dan eksternal. Sacaro internal, kagiatan hubungan masyarakat dikarajoan untuak mambino hubungan samo pihak internal sarupo kariawan, manejer, sampai ka pamacik saham di parusahaan itu. salanjuiknyo, pangartian hubungan masyarakat sacaro eksternal marupokan kagiatan nan malakuan hubungan samo pihak publik atau pihak lua dari parusahaan, sarupo wartawan, komunitas lainnyo, tanago pendidik, dan tokoh masyarakat guno maambiak paratian pihak lua.[1]

Kategori[suntiang | suntiang sumber]

Karajo urang di hubungan masyarakat bisa dikategorian manjadi:

  1. Publik internal dan publik eksternal
    Publik internal adolah pihak nan ado didalam parusahaan sarupo karyawan, hinggo pamacik saham. Bedanyo, pihak eksternal adolah pihak nan ado di lua parusahaan sarupo media pers, pamarintah, palanggan, dan masyarakat.
  2. Publik primer, sekunder samo publik marjinal
    Publik primer punyo peran nan paliang paralu dalam jalannyo suatu parusahaan atau organisasi. Pihak iko adolah nan bahubuangan langsuang samo parusahaan itu. Salanjuiknyo, publik sekunder adolah pihak nan posisinyo kurang paralu samo perusahaan, tapi kalau ado masalah samo pihak iko karajo parusahaan akan tagaduah. Contoh pihak sekunder adolah pemerintah nan maagiah peraturan bagi parusahaan dalam malaksanakan usaho dan bisnisnyo. Kamudian ado publik marjinal nan marupokan pihak nan dianggap indak paralu bana tapi tetap harus diparatian samo urang hubungan masyarakat. Karano kalau indak, bisa jadi ancaman di maso nan akan datang. Contohnyo masyarakat, katiko parusahaan malupoan adonyo pihak iko, bisa jadi biko masyarakat akan maajukan tuntutan katiko seandainyo ado nan bamasalah.
  3. Publik tradisional dan maso depan
    Pambagian publik iko didasari samo ukuran wakatu. Publik tradisional adolah publik nan ado di parusahaan atau organisasi pado maso kini. Misalnyo konsumen lokal atau mitra dari parusahaan nan dijalani saat kini. Salanjuiknyo, publik maso depan nan marupokan publik nan punyo potensi untuak pangambangan organisasi. Contohnyo konsumen lua daerah nan bisa jadi sasaran katiko bisnis nio dikambangan.
  4. Publik proponents, opponents, uncommitted
    Pangkategorian kalompok publik nan iko dibedaan badasarkan arah condong kabapihakan pihak kapado parusahaan. Partamo ado publik proponets nan marupokan pihak nan mamihak ka parusahaan. Contohnuo pagawai nan patuah ka pamimpin, konsumen nan loyal, akademisi nan satuju samo kabijakan universitas sabagai organisasi tampek inyo bakarajo. Babeda samo publik oponents nan arah kabapihakannyo labiah ka manantang parusahaan. Contohnyo buruah nan manantang kabijakan parusahaan tentang jumlah gaji atau jam istirahat, sarato bisa juo pihak masyarakat nan malakuan protes kapado kabijakan nan dilakuan parusahaan dalam malakuan usaho dan bisnisnyo. Salanjuiknyo ado publik uncommitted nan marupokan pihak nan indak paduli samo adonyo kagiatan parusahaan atau organisasi.
  5. Publik silent majority dan vocal minority
    Publik silent majority adolah pihak nan punyo sifat pasif kapado adonyo kagiatan parusaan atau organisasi. Contohnyo masyarakat sakitar pabrik nan indak protes ateh adonyo pencemaran lingkungan karano limbah pabrik, dan kariawan nan indak nio protes atau nan satuju sajo samo sadoalah peraturan nan dikaluaan samo atasan. Babeda hal samo publik voval minority nan marupokan pihak nan aktif maagiah respon kapado kegiatan dan aktifitas dari parusahaan. Contohnyo katua sarikat buruah nan manyampaian kainginan buruah kapado parusahaan, kamudian lembaga konsumen nan sacaro kritis manyikapi layanan atau produk di suatu perusahaan, aktifis lingkungan, hingga BEM di tingkek universitas.[2]

Media[suntiang | suntiang sumber]

Media nan digunoan samo hubungan masyarakat adolah sadoalah bantuak sarana komunikasi dan saluran publikasi informasi nan bisa digunoan untuak publikasi informasi penting kapado publik. Fungsi media iko adolah sabagai sarano promosi, maningkekan palayanan atau pamasaran, maningkekan kapacayoan publik, hinggo akhirnyo manjago dan maningkekan citra dari lambaga itu sarupo parusahaan atau organisasi. Biasonyo ado babarapo jenis media nan digunoan samo hubungan masyarakat, diantaronyo ado majalah internal/bulletin, koran, brosur, booklet, flayer, poster, hingga media luar ruang sarupo spanduk dan banner.[3]

Caro panulisan[suntiang | suntiang sumber]

Surang hubungan masyarakat harusnyo bakarajo sarupo saurang jurnalis atau wartawan. Ado babarapo kaidah nan harus dikuasai samo urang nan bakarajo sabagai hubungan masyarakat diantaronyo:

  1. Mangikuikan prinsip jurnalistik
    Media nan dikaluaan samo urang nan bakarajo sabagai hubungan masyarakat harus manganduang informasi nan singkek, padek dan lugeh. Kato-kato nan digunoan juo harus akurek sarato murah untuak dipahami.
  2. Kaidah bahaso
    Kalimat dan bahaso di media nan dibuek samo hubungan masyarakat minimal ado manganduang subjek, prediket, dan objek. Kalimatnyo diusahoan manggunoan kalimat aktif
  3. Ciri bahaso jurnalistik
    Partamo adolah manarik, artinyo bisa mambangkikan minat dan paratian urang nan mambaco media nan dibuek. Kaduo, singkek, sadarhano, padek, dan lugeh, artinyo pilihan kato labiah pendek sahinggo sadarhano dan padek dalam arti sarato muatan informasi. Kalimatnyo harus lugeh nan bararti indak ambigu sarato bamakna tagok. Katigo, jaleh jo Janiah, artinyo kalimatnyo murah ditangkok, indak ado manyiratkan sasuatu nan negative sarupo fitnah atau prasangko. Kamudian nan ka ampek, logis, artinyo masuak samo aka sehat. Salanjuiknyo gramatikal, artinyo kato, istilah, atau kalimeknyo apopun nan dipakai dan dipiliah dalam media itu harus mangikuikan kaidah tato bahaso nan baku.

Rujuakan[suntiang | suntiang sumber]

  1. Wahid, Umaimah; Puspita, Anggun Eka (2017-08-09). "Upaya Peningkatkan Brand Awareness PT. Go-Jek Indonesia Melalui Aktivitas Marketing Public Relations". Jurnal Komunikasi (dalam bahasa Inggris). 9 (1): 31–43. doi:10.24912/jk.v9i1.265. ISSN 2528-2727. 
  2. Hasibuan, Indah Kemala; Lubis, Rahmi (2011-08-31). "PERAN PUBLIC RELATIONS SEBAGAI PENDUKUNG MANAJEMEN DI RUMAH SAKIT UMUM DR. PIRNGADI KOTA MEDAN". Analitika: Jurnal Magister Psikologi UMA (dalam bahasa Indonesia). 3 (1): 44–52. doi:10.31289/analitika.v3i1.841. ISSN 2502-4590. 
  3. B, Gita Aprinta E. (2016-01-19). "Strategi Cyber Public Relations dalam Pembentukan Citra Institusi Pendidikan Tinggi Swasta". Jurnal The Messenger (dalam bahasa Indonesia). 6 (1): 1–7. doi:10.26623/themessenger.v6i1.161. ISSN 2527-2810.