Hikayat Siak
Hikayat Siak iolah sabuah tulisan Melayu nan babanyuak hikayaik perihal tagak jo bakambangnyo Kasultanan Siak Sri Inderapura Naskahnyo ado ampek buah, nan paliang tuo ditulih sakitar patangahan abaik ka-19 dek katurunan sultan Siak di Kalimantan.[1] Hikayat Siak dianggap sabagai karya nan mangungkapkan parubahan identitas masyarakaik nan tingga di pasisia timur Sumatera.[2][3]
Manuskrip
[suntiang | suntiang sumber]Kalau mancaliak tarikh riwayaik iko, Hikayat Siak ditulih sakurang-kurangnyo pado taun 1850-an dek Tengku Said, katurunan Raja Akil (rajo dari Sukadana, jo anak dari Sultan Alamuddin Syah). Satu salinannyo ado dek von de Wall (W.191) nan tarikhnyo 23 Safar 1271 (5 November 1857).[3] Basamo jo koleksi lain punyonyo, naskah ko disimpan di Perpustakaan Nasional Republik Indonesia. Naskah lain nan duo buah ado di Leiden dalam tulisan Arab Melayu ; nan ciek (Cod. Atau. 6342) dipakiroan diketik dek Winstedt dari naskah W.191, nan ciek lai (Cod. Or. 7304) ditulih tangan pado 24 Juni 1893 di Batavia. Salinan naskah Cod. Or. 6342 lataknyo di Royal Asiatic Society of London (Mal. 138).[3] Salinan-salinan ko pado dasarnyo samo, tapi ado ejaan nan babedo saketek.[1]
Isi
[suntiang | suntiang sumber]Hikayat Siak dapek dibagi manjadi duo bagian.[1][3] Nan partamo barisi narasi ulang Sajarah Melayu. Dek sabab itu Hikayat Siak dianggap pulo sabagai versi tambahan[4] jo papanjangan nan dipabarui[5] dari Sejarah Melayu. Nan kaduo, versi nan labiah panjang barisi sejarah karajaan Siak. Bagian iko dapek juo dibagi manjadi duo: Raja Kecil jo kahidupannyo, jo maso pamarintahan katurunan sasudahnyo. Hikayat Siak disudahan jo naiaknyo Tengku Anum (anak Tengku Akil) manjadi Panembahan Anum Sukadana.[3]
Analisis
[suntiang | suntiang sumber]Hikayat Siak ditulih dari narasi lisan urang Siak – atau paliang indak katurunan sultan Siak di Sukadana – nan tapaliharo di kalangan masyarakaik ko.[3]
Hikayat Siak acok disandiangan jo dibandiangkan oleh panaliti jo Tuhfat al-Nafis, karano salain manyadiokan sijarah Johor jo urang-urang Bugih di dalamnyo, Tuhfat al-Nafis manulihan pulo sabagian gadang sijarah Siak. Dalam hal iko, tulisan itu dianggap mambela bana urang Bugih sarato mancimeehkan urang Siak jo Minangkabau nan alah marabuik kakuasaan di Johor sarato bacakak jo urang Bugih.[3] Hikayat Siak, di sisi lain, mampatahankan sosok Raja Kecil sabagai pawaris Sultan Mahmud Syah II sabagai rajo Johor. Roolvink juo manambahkan baso Hikayat Siak marupoan "teks nan diedit nan bahubuangan jo sijarah Melayu dari suduik pandang Siak".[5]
Leonard Andaya maliek Hikayat Siak sabagai gambaran proses etnisisasi suku bangso Melayu, dalam hal iko Minangkabau, nan manyadiokan pabedaan nan jaleh jo suku bangso Melayu pado umumnyo.[2] Hikayaik ko manandoan awal pamisahan Minangkabau jo Melayu sabagai etnis nan babeda, nan ditandoi jo babarapo ciri khas. Walaupun diklaim sabagai katurunan rajo-rajo Melayu, Raja Kecil digadangan dalam kaluarga karajaan Pagaruyung, diangkek anak dek Puti Jamilan nan marupoan tokoh istano pantiang wakatu itu. Tuhfat al-Nafis jo Hikayat Siak manunjuakan fenomena iko. Hikayat Siak, manuruiknyo, "mambarikan kasaimbangan baiak kapado kabapihakan Bugih di Tuhfat al-Nafis.[6] Narasi legendaris Hikayat Siak manggambarkan jou tema-tema sastra jo nuansa politik di Nusantara. Dalam kisah Encik Apong manganduang, Barnard manyabuik baso mitos aia mani – dalam hal iko ikatan silsilah – marupoan hal pantiang nan mampakuek legitimasi kakuasoan di Asia Tenggara, sarupo jo kisah Pangeran Puger di Jawo.[1]
Nan mencolok juo di Hikayat Siak adolah narasi Tengku Akil, nan maruopkan katurunan Tengku Buwang Asmara. Tengku Akil ditulih untuak mamainkan peran nan labiah gadang dan labiah rinci. Karano itu, hikayaik ko disabuik dek Roolvink sabagai Hikayat Raja Akil. [7]
Rujuakan
[suntiang | suntiang sumber]- ↑ a b c d Barnard, Timothy. Multiple centres of authority; Society and environment in Siak and eastern Sumatra, 1674-1827'. Leiden: KITLV Press, 2003.
- ↑ a b Andaya, Leonard Y. (2019). Selat Malaka: sejarah perdagangan dan etnisitas. Jakarta: Komunitas Bambu. ISBN 978-623-7357-04-9.
- ↑ a b c d e f g Hashim, Muhammad Yusoff (1988). "Di Antara Fakta dan Mitos: Tradisi Pensejarahan di Dalam Hikayat Siak atau Sejarah Raja-Raja Melayu". Sejarah: Journal of the Department of History. 1 (1): 63–116. doi:10.22452/sejarah.vol1no1.3. ISSN 2756-8253.
- ↑ Winstedt, Richard (1958). "A History of Classical Malay Literature". Journal of the Malayan Branch of the Royal Asiatic Society. 31 (3 (183)): 3–259. ISSN 2304-7550.
- ↑ a b Roolvink, R. (1967-01-01). "The variant versions of the Malay Annals". Bijdragen tot de taal-, land- en volkenkunde / Journal of the Humanities and Social Sciences of Southeast Asia (dalam bahasa Inggris). 123 (3): 301–324. doi:10.1163/22134379-90002896. ISSN 0006-2294.
- ↑ Andaya, Leonard Y. (1975) (dalam bahaso en). The Kingdom of Johor: 1641-1728. Oxford University Press. ISBN 978-0-19-580262-7. https://books.google.co.id/books/about/The_Kingdom_of_Johor.html?id=Ow8fwgEACAAJ&redir_esc=y.
- ↑ Roolvink, R. (1967-01-01). "The variant versions of the Malay Annals". Bijdragen tot de taal-, land- en volkenkunde / Journal of the Humanities and Social Sciences of Southeast Asia (dalam bahasa Inggris). 123 (3): 301–324. doi:10.1163/22134379-90002896. ISSN 0006-2294.