Donny Syofyan

Wikipedia Minangkabau - Lubuak aka tapian ilimu

Donny Syofyan laia di Padang, 11 Desember 1978. Sampai kini nangko manjadi dosen di Fakultas Ilmu Budaya Universitas Andalas samanjak taun 2002. Manamaikan bangku kuliyah di Universitas Andalas jurusan Sastra Inggirih alah tu mandapekkan gala Sarjana Sastra (S.S) di taun 2002. Malanjuikkan short course Public Administration di Australian National University (Januari—Desember 2007) alah tu maraiah Diploma of Public Administration (Dippl. PA). Taun 2008—2009 Donny Syofyan melanjuikkan sikolahnyo di University of Canberra maambiak jurusan Human Resource Management jo manambah gala Master of Human Resource Management (M.HRM). Donny Syofyan nan masih auih jo pandidikan pado taun 2010 maambiak Program Master Ilmu Sastra di Universitas Gadjah Mada nan akhianyo maraiah gala Master of Arts (M.A) pado taun 2012. Pado 2016 Donny Syofyan baliak ka Australia untuak mandapekkan gala Ph.D kini manjadi mahasiswa di Deakin University jurusan Sastra Australia.

Walaupun balatar balakang sabagai dosen kasusastraan Inggris, Donny Syofyan mampunyoi minaik intelektual nan lueh saroman isu-isu kasusastraan Inggris, politik, sosial, budayo, jo kaagamoan. Donny Syofyan sangaik santiang mancaliak isu-isu baru nan sadang tajadi jo manulihkannyo ka dalam tulisan nan lugaih jo langsuang. Inggo saaik nangko, Donny nan sangaik produktif ko, lah manulih labiah dari 500 artikel nan alah dimuek di koran-koran satampek jo internasional di antaronyo di The Jakarta Post, The Jakarta Globe, Inclover, Indonesia Expat, Bali & Beyond, Jakarta Java Kini, Defence Review Asia, The Korea Times, The Japan Times, The Kathmandu Post, The Brunei Times, Asia Times, Koran Tempo, Bisnis Indonesia, Republika, Sinar Harapan, Haluan, Padang Ekspres, jo Mimbar Minang (indak tabik lai).

Salain manulih di koran, taituang Donny Syofyan alah manulih di babarapo buah jurnal nasional jo jurnal babahaso Inggirih di antaronyo di jurnal Kalamistic, Lingua Didaktika, Indonesian Journal of English Language Teaching [IJELT], Nazharat, Puitika, Andalas Journal of Humanities, Journal of Islamic and Social Studies, Islam Realitas.

Tulisan Donny Sofyan ado pulo nan manjadi Juara III Lomba Artikel dalam rangko Hari Pandidikan Nasional 2012 Kemendiknas nan bajudul “M-Learning: Menjangkau nan Tidak Terjangkau” nan ditabikkan di Haluan tanggal 21 Maret 2012. Sudah tu nyo ado pulo maraiah Juara II Lomba Panulisan Artikel Peacekeepers Day 2012 PMPP TNI nan bajudul “Revitalisasi Peacekeepers TNI” di Harian Bhirawa tanggal 9 Mei 2012.

Donny Syofyan alah pulo manulih buku Tantangan dan Peluang Studi Humaniora nan bajudul “Perbudakan Dalam Karya Sastra Amerika” hal.125-135; Looking into Contemporary Indonesia, Labor Sajarah Universitas Andalas pado taun 2015; Menapaktilasi Kesusastraan Inggris, nan ditarbikkan dek Rumah Kayu (2016).

Pado tanggal 13 Desember 2016 Donny Sofyan tamasuak ka dalam 20 urang panulih buku nan mandapekkan Apresiasi Penulis Sumatra Barat 2016 nan diagiahkan dek Gubernur Sumatera Barat, H. Irwan Prayitno dalam rangko "Apresiasi Penulis dan Semiloka Kepenulisan" nan diadokan dek Badan Perpustakaan dan Kearsipan Sumatera Barat batampek di Auditorium Gubernuran Sumatera Barat.[1][2]

Rujuakan[suntiang | suntiang sumber]

  1. "archive copy". Diarsipkan dari versi asli tanggal 2018-02-14. Diakses tanggal 2018-02-14. 
  2. "archive copy". Diarsipkan dari versi asli tanggal 2018-02-14. Diakses tanggal 2018-02-14.