Dikia rabano

Wikipedia Minangkabau - Lubuak aka tapian ilimu
Dikia Rabana di Kabupaten Padang Pariaman

Dikia rabano iolah sabuah kesenian nan berkembang di daerah Minangkabau. Dikia rabano marupoan tradisi dakwah lisan masyarakaik Minangkabau dalam dimensi agamo jo sosial. Kato “dikia” barasa dari bahaso Arab nan artinyo “dzikia”. Alaik musik, bahaso jo iramanyo indak pernah diubah-ubah. Latihan dikia rabano dilakuan sakali saminggu nan diadoan pas malam Jumaik. Caro latihan dikia rabano iolah maapa matannyo jo malatiah tangan untuak manokok rabano. Pamain dikia rabano ko hanyo dimainan dek laki-laki sajo. Alaik musik dikia rabano barupo rabano gadang. Jikok untuak nan padusi rabanonyo rabano ketek tapi itu ndak tamasuak ka dalam dikia rabano tapi nan dibaco nyo ndak jauah beda.

Panapilan dikia rabana iko disabuik juo jo badikia atau bahikayat. Di Piaman, Badikia iko dapek dijumpai pado hari rayo maulut nabi Muhammad SAW. Biasonyo tradisi iko diadoan di musajik dima tukang dikia alah mancaritoan hikayaik jo carito para sufi jo tokoh-tokoh Islam.[1] Tradisi iko diadoan biasonyo malam hari sampai manjalang subuah, sasudah tu baru salasai kasado rangkaian alek maulud nabi.

Sijarah[suntiang | suntiang sumber]

Sijarah dikia rabano bamulo dari Buya Canduang nan mandirian sakolah Islam jo mangolah manjadi dikia rabano. Awalnyo dikia rabano babahaso Arab, kamudian Buya Canduang manarjamahan ka bahaso Latin jo ka bahaso Minang. Dikia rabano badiri mulai taun 40-an tu bakambangnyo sacaro turun-tamurun sampai kini. Dikia rabano diolah indak untuak kesenian tradisional, tapi kesenian dikia rabano iolah kesenian nan barupo akidah, dikia atau sajarah-sajarah Nabi Muhammad SAW mulai dari Aminah manikah jo Abdullah sampai lahianyo jo maningganyo Nabi Muhammad SAW. Caro pawarisan dikia rabano iolah mamanggia anak-anak nan sudah tamaik SD jo anak-anak nan idak manginyam bangku sakolah untuak bakesenian Minang, kamudian dibao ka musajik dilatiah ciek-ciek mulai dari patamo dikia. Dikia rabano diturunan kapado urang-urang nan tatarik kapado agamo. Dikia rabano idak ado unsua-unsua kesenian lain, tapi dikia rabano hanyo bahubungan jo agamo Islam samo saputa sajarah Nabi dari lahia sampai maningga.

Dikia Rabano
Dikia Rabano

Panampilan[suntiang | suntiang sumber]

Dikia rabano biasonyo diadoan katiko maulid Nabi, baralek, manaikan rumah jo khatam Quran. Dikia rabano durasinyo salamo sajam. Panampilannyo ado 7 sesi, Patamo "kato junjuangan" nan mancaritoan Nabi Adam basamo Hawa. Kaduo "ciek mukaluak", 'mukaluak' maksudnyo iolah manusia (makhluk). Katigo "Wahai sudaro dangalah madah", iolah sajarah antaro saudaro jo saudaro (dunsanak di Minangkabau). Kaampek "pado maso itu", mancaritoan tantang baa sajarah islam ko badiri. Kalimo "wahai sudaro sagalo urang", sajarahnyo iolah sado urang diajak untuak masuak islam atau ajakan untuak manganuik agamo Islam (dakwah). Kaanam "wakatu itu", sajarahnyo mancaritoan paparangan islam jo Israel. Katujuah "cukuiklah hamil", iolah kelahiran Nabi Muhammad SAW. Uniknyo dikia rabano dapek digunoan untuak arakan mangiriangan marapulai mangunjuangi rumah anak daro nan dilakuan pado patang hari. Badzikia dimulai katiko alah tibo di rumah sampai laruik malam.[2]

Rujuakan[suntiang | suntiang sumber]

  1. PENCATATAN WARISAN BUDAYA TAKBENDA DI PROPINSI SUMATERA BARAT, BENGKULU DAN SUMATERA SELATAN. BPNB Sumatera Barat. 27 Maret 2011. ISBN 978-602-8742-67-2. 
  2. Chaniago, Ediwar (2 Mei 2018). "Mencermati Seni Tradisi Bernafaskan Islam di Minangkabau". suduikminang.com. Suduik Minang. Diakses tanggal 18 Oktober 2018.