Desa wisata talang babungo

Desa Talang Babungo

Talang Babungo adolah sabuah nagari yang talatak di kecamatan Hiliran Gumanti, Kabupaten Solok, Sumatera Barat. Nagari nan sajuak ko sampai kini masih manjago kaasrian daerahnyo. Masyarakaik di Nagari Babungo tak hanyo manjago kultur yang ado di nagari tu, tapi juo maubah kampuang nan dulunyo kumuah manjadi labiah indah. Kampuang nan dulunyo samak kini lah disulap manjadi kampuang nan dipanuahi oleh taman bungo, di satiok rumah warga sanak akan manamui bungo yang macam-macam rupo tapi jenis bungo yang paliang banyak ditanam warga adolah bungo piladang merah. Nagari yang dikaliliangi dek bukik ko sangaiklah indah dan dipanuahi dek parak-parak warga yang mayoritas batanam tabu dan aren karano sabagaian gadang warga bakarajo sabagai tani.

Topografi nagari Talang Babungo bagalombang, ado jalan manurun dan ado jalan nan mandaki. Kondisi ko dimanfaatkan dek para pangguno motor trail untuk uji kemampuan. Salain manyulap rueh jalan jo taman bungo, nagari ko juo mambangun puluahan halte bakonsep minang tuo. Pangunjuang nan datang ka Talang Babungo batua-batua diajak marasoan baliak kaindahan alam minang 100 tahun lampau. Babeda jo halte nan ado di kota gadang nan bafungsi sabagai tampek mananti bus atau angkutan umum, halte nan ado di Talang Babungo bafungsi sabagai tampek duduak basamo baiyo-iyo, salapeh karajo.

Nagari Talang Babungo manjadi kampuang nan indan dan nyaman sasudah adonyo kabakaran nan manimpo kampuang tu. Kajadian tu berhasil mambuek CST PT Astra Internasional Tbk mancaliak ka kampuang tu dan manolong kampuang Talang Babungo untuak mancinptakan Kampung Berseri Astra (KBA). Malalui program tu warga jo perusahaan bakarajo samo untuak mambangun kampuang nan labiah indah, nyaman dan labiah produktif sahinggo dapek maningkekan kualitas hiduik masyarakaik nan tingga di Talang Babungo.

Nagara Talang Babungo diharokan bisa manjadi salah ciek ikon wisata yang ado di Solok, dan dapek mamajukan perekonomian masyarakaiknyo. Nagari Talang Babungo mampunyoi kalabiahan dari sagi lokasi, daerah ko talatak di kawasan Bukik Barisan nan manyuguahan panorama bukik-bukik nan asri, kampuang ko barado di katinggian 1.141 mdpl, dan dihuni oleh kurang labiah 2.000 warga. Di jorong nan banamo Tabek, dibantuak pambagian zona-zona untuak mampamudah program kampuang asri. Di satiok zona tadapek gapura sabagai panando dan halte nan bafungsi sabagai tampek pasinggahan.