Dasril Ahmad

Wikipedia Minangkabau - Lubuak aka tapian ilimu

Dasril Ahmad iyolah ciek di antaro sakian kritikus sastra nan ado di Sumatra Barat nan tatap sajo rajin bagiek sabagai pangamaik, pakarajo, panulih kritik karya satsra jo esai bagai. Salain manulih, Baliau ko acok pulo dimintak manjadi juri dalam lomba jo sayembara sastra, baiak di kalangan murik sakola juo lomba sastra untuak umum di Sumatra Barat nan ko. Pak Dasril Ahmad ko lahia pado tanggal 25 Desember 1957 di Kampuang Mato Aia, Padang Selatan, Kota Padang. Inyo datang dari kaluarga nan indak bakarajo sabagai panulih. Baliau ko anak kaduo dari anam badunsanak. Ayahnyo banamo Ahmad Sutan Kayo (alm.) nan dulu jadi prajurit TNI AD, ibunyo banamo Rosma (almh), inyo iyo ibu rumah tangga. Dasril Ahmad ko dulu basakola di jurusan masin di STM Nagari 2 Padang, tamaik pado taun 1976. Salanjuiknyo, Dasril Ahmad masuak bakarajo di unit pangangkutan (tapeknya di bengke truk pangangukutan) PT Igasar Semen Padang salamo duo taun (1977—1979). Pado taun 1979, ado pulo paluang ka manjadi karyawan PT Semen Padang. Inyo pun sato pulo ikuik sariangan, mako dapek luluih pulo sariangan tu mako liau ko ditampekan pado jabatan operator III di Mekanical Departement Pabrik Indarung II, PT Semen Padang. Namun, bakarajo di pabrik semen paliang saisuak di Indonesia nan tun hanyo inyo jalani salamo 13 taun (1979 – 1992) se nyoh[1].

Soal dunia tulih menulih jo sastra ko, sajak ketek liau ko sabananyo indak takilek jo ba angan-angan ka manjadi panulih. Karano kaadaan ekonomi urang tuonyo nan indak cukuik, inyo pun indak pulo baniek ka melanjuik an sakola ka paguruan tinggi, hanyo lansuang nio bakarajo guno mancari pitih se nyoh. Kunun pado maso ba itu, lulusan sakola teknik manangah ruponyo labiah capek dapek bakarajo langsuang dibandiang jo lulusan sakolah manangah umum. Namun samantang ba itu, sabalun tamaik, iyo lah pado maso sakolah manangah nan tu pado taun 1974 inyo lah mulai pulo bakenalan pulo jo kagiatan tulih-menulih malalui ciek kalompok nan banamo “Perkumpulan Sahabat Pena Indonesia” (PSPI) cabang Padang. Dek Liau ko masuak pulo ka kalompok itu tarnyato iyo itu pulo nan manjadi pintu masuak inyo mangenal dunia tulih-menulih walau sajak ketek indak tapikia dek nyo ka jadi cita-citanyo. Pakumpulan itu punyo kagiatan ba-korespondensi antarosahabat pena malalui surek manyurek. Kagiatan nan tu lah dan alah melatiahnyo tarmpil manulih basilek kato jo ba-imajinasi, mako nan itu pulo lah nan maagiahnyo baka nan sangaik baharago dalam kapanulisan kreatif salanjuiknyo.

Wadah sahabaik pena itu mambueknyo acok manulis jo pakai gaya panulihan nan rancak co gaya bacarito carito pendek juo pun tulisan-tulisan nan bak puisi nan romantis kecek urang bak gaya anak mudo katiko itu. Dek Liau ko, kagiatan dalam wadah sahabaik pena itu alah mambueknyo tatariak jo basitungkin jo dunia tulih manulih, tarutamo kapandaian ba sastra. Inyo pun indak manyio-nyiokan rahmaik kapandaian manulih nan tun. Kreativitas basastranyo pun inyo salurkan sairiang jo timbuanyo suatu ruang kreativitas sastra anak mudo-udo di Harian Haluan nan bagala “Remaja Minggu Ini” (RMI) sajak edisi samulo bana, Minggu, 4 April 1976. Ruang kreativitas sastra anak mudo itu diasuah dek penyair Rusli Marzuki Saria, nan labiah mautamokan karya para panulih mudo jo nan jolong bana, bantuak puisi, cerpen, esai, jo kritik sastra bagai. RMI Haluan sangaik bajaso bana dalam mamanciang bakaik para panulih mudo jo nan jolong bana katiko itu di daerah Sumbar jo Riau, nan di antaronyo iyo Pak Dasril Ahmad nan ko. Inyo masiah ingek katioko tulisannyo (Dasril Ahmad) nan paliang partamo bana muncul di RMI iyolah ciek esai nan bagala “Yang Diperlukan untuk Mengembangkan Bakat” (RMI Haluan,  Minggu, 21  November 1976). Dapek pulo dikecek an baso Dasril Ahmad ko ciek di antaro panulih dari “angkatan” partamo panulih RMI nan diasuah dek Angku Rusli Marzuki Saria nan juo akrab disapo jo gala “Papa” itu.

Rujuakan[suntiang | suntiang sumber]

  1. Wawancara dengan Dasril Ahmad, di Padang, 9 Oktober 2017