Dalimi Abdullah

Drs. H. Dalimi Abdullah, SH bagala Datuak Indo Kayo marupoan saurang birokrat Kementrian Agama yang kamudian masuak ka politik dan pernah juo manjadi anggota DPR-RI dari Partai Demokrat mawakili Sumatera Barat. Dalimi barasa dari daerah pamilihan (dapil) Sumatera Barat II nan maliputi sajumlah daerah tingkek II, yaitu Pasaman, Pasaman Baraik, Payakumbuah, Limo Puluah Koto, Bukittinggi, Agam, Pariaman dan Padang Pariaman. Sabelumnyo, Dalimi pernah manjabaik Kakanwil Departemen Agama (Depag) Sum­atera Barat.

Dalam babagai sosial kamasyarakatan dan kaagamaan, Dalimi Abdullah tamasuak urang nan diparituangan. Tantu ndak lapeh dari pangaruah jabatan dan pangalaman nan inyo jalankan. Dalimi Abdullah pernah manjadi wartawan dan mangasuah rubrik konsultasi penasihatan perkawinan di Harian Haluan, sajak tahun 1980.

Riwayaik Pendidikan

Beliau tamat pendidikan di Sekolah Rakyat (SR) tahun 1957, lalu malanjuikan ka Pendidikan Guru Agama Pertama (PGAP) (1961), dan Pendidikan Guru Agama Atas (PGAA) (1964). sudah tu inyo manaruihan studi ka IAIN (kini UIN) Imam Bonjol Padang sampai dapek gala sarjana mudo (1972) dan sarjana lengkap (Drs.) tahun 1977. Gala sarjana hukum nan inyo dapek dari Universitas Eka Sakti Padang (1996)

Jabatan

Tamaik sekolah PGAAN Padang, Dalimi Abdullah mamulai dunia karajo. inyo mulai jadi guru agama Islam di SDN 49 PJKA Padang, tahun 1965-1968. Kamudian, dari 1968-1972, inyo jadi Penilik Pendidikan Agama Islam di Kecamatan Padang Barat. Artinyo, dari fungsional ka struktural.

Sudah tu, dari 1972-1973, Dalimi Abdullah dipacayo jadi Kasubsi Pendidikan Agama Islam di Kantor Departemen Agama, kini Kemenag Kota Padang.