Cati Bilang Pandai

Wikipedia Minangkabau - Lubuak aka tapian ilimu

Cati Bilang Pandai adolah tokoh nan tasabuik dalam Tambo Alam Minangkabau, urang nan santiang bijaksano, candokio, ayah dari Datuak Parpatiah Nan Sabatang nan legendaris. Cati Bilang Pandai dikana juo banamo Indo Jati, bakawan jo Sang Sapurba dalam khazanah Malayu.

Sasuai jo kiasan nan ado dalam tambo, Cati Bilang Pandai diisyaraikan sabagai bantuak kaarifan dan kabijaksanaan. Tamasuak dalam silek, Cati Bilang Pandai juo marupokan tokoh silek nan mampunyoi kabijaksanaan. Garak langkahnyo tatata jo panuah parhituangan dan kasaimbangan. Kaduo hal itu didapekan dari babagai kajian ilmu nan dikaji sacaro mandalam. Garak langkah tasabuik juo didapek dari hasil mancaliak ka sagalo sisi dan sagalo arah, nan kamudian manghasilkan pandangan nan sampurna. "Samparono silek tak bagarak", adolah ungkapan nan manggambaran garak langkah tasabuik. Nan mano artinyo, sabuah pamahaman nan dilahiaan dari pangatahuan nan lueh dan manumbuahan kayakinan nan kuek dan kokoh dalam diri sahinggo manamuaan garak langkah nan dikontrol dek energi sajati dalam diri.[1]

Dalam ungkapan ka pai tampek batanyo, ka pulang bakeh babarto, Cati Bilang Pandai dimaknai sabagai urang yang arif dan bijaksano dan kayo jo ilmu pangatahuan. Tapi jikok dicaliak badasarkan suduik pandang silek, Cati Bilang Pandai adolah karangko nan mambantuak karakter silek. [1]

Rujuakan[suntiang | suntiang sumber]

  1. a b Osman, ADI. ENSIKLOPEDIA SILEK MINANGKABAU. Padang: DINAS KEBUDAYAAN PROVINSI SUMATERA BARAT. pp. 127.