Beo nias

Beo Nias
Klasifikasi ilmiah
Kingdom:	Animalia
Phylum:	Chordata
Class:	Aves
Order:	Passeriformes
Family:	Sturnidae
Genus:	Gracula
Species:	G. robusta
Namo binomial
Gracula robusta Salvadori, 1887

Beo nias (Gracula robusta) adolah sajinih buruang anggota familia Sturnidae (jalak jo karabaiknyo) yang hanyo bisa disobok an di Pulau Nias, Sumatera Utara. Buruang ko hanya manyebar di situ sarato pulau-pulau ketek di sakitarnyo. Oleh karano tu, buruang ko manjadi satwa endemik dari Sumatera Utara, dan ditetapkan sabagai maskot fauna provinsi tu. Beo nias dikenal juo dengan namo beo sumatera atau tiong nias.

Buruang ko banyak dipaliharo dek urang-urang karano pandai maniru suaro manusia. Kamampuan beo nias untuak mangalua an bunyi jo maniru pambicaraan urang-urang manyebaban buruang ko jadi primadona. Meski baitu, ndak saketek urang nan takicuah karano ndak dapek mambedaan antaro jinih beo biaso jo beo nias.

Beo nias mamiliki warnah tubuah yang didominasi hitam pakek, tapi di ujuang sayok bulunyo ado warna putiah. Nan mambeda an beo nias jo beo jinih lainnyo yaitu adonyo cupian talingo nan manyatu di balakang kapalo babantuk galambia jo bawarna kuniang mancolok.

Buruang ko mamiliki tubuah nan labiah gadang dan gagah daripado burung beo jinih lainnyo yakni mancapai 40 sentimeter. Bagian iris mato buruang ko bawarna coklat. Paruahnyo kokoh sakatek malangkuang sarato bawarna oranye sampai kamerahan.

Habitaik alami beo nias adolah di hutan-hutan basah dengan papohonan tinggi sabagai sarangnyo dengan caro malubanginyo. Buruang ko dapek dijumpai mulai dari ataran randah sampai pabukitan. Beo nias hiduik dalam kalompok ketek atau bapasangan.

Salain tampek basarang, buruang ko juo manjadian pohon-pohon tinggi sabagai tampek batalua. Sakali batalua, beo nias dapek manatehan duo sampai tigo talua nan dierami salamo sakita tigo ahaik. Hewan ko mamiliki musim batalua yakni sakita bulan Desember sampai Mei.

Makanan buruang ko adolah buah jo nektar sarato kadang-kadang bisa pulo mamakan saranggo jo binatang ketek lainnyo.

Tapi sayangnyo, populasi beo nias ko labiah banyak ado di dalam sangka dibandingan di habitaik aslinyo.

Ndak dapek dipungkiri, kekhasan nan dimiliki beo nias manyebabannyo manjadi sasaran paburuan penghobi buruang. Tindakan ko tamasuak mampadagangannyo lah jaleh marupoan pabuatan nan salah karano badampak pado panurunan populasinyo di habitaik asli.

Buruang ko bahkan bisa dicari di Pasa Buaruang Sukahaji, Banduang, Jawa Barat. Salain tu, ado pulo yang mampadagangannyo lewat grup jual bali di lama Facebook.

Buruang ko alah taacam punah. Manuruik red list dari IUCN, buruang ko mamiliki status EN (endangered). Samantaro di Indonesia, pado 1970, Menteri Pertanian malalui Surek Kaputusan Nomo4 421/Kpts/Um/8/1970 alah manetapan buruang ko sabagai salah satu satwa dilindungi.

Buruang ko alah masuak pulo ka dalam daftar satwa nan harus dilindungi manuruik Undang-undang Nomor 5 Tahun 1990 tantang Konservasi Sumber Daya Alam hayati jo Ekosistemnyo sarato Paraturan Pamerintah Nomor 7 Tahun 1999 tatang Pangawetan Jinih Tumbuhan jo Satwa. Sia se nan mamburu buruang ko akan kanai tindak pidan panjaro salamo limo tahun sarato dando sagadang Rp100 juta.

Beo Nias parnah manjadi maskot pado Hari Cinta Puspa jo Satwa Nasional nan batujuan untuak maajak masyarakaik ikuik malestarian satwa nan mulai langka ko.

Buruang ko paranah pulo manjadi maskot pado Pekan Ilmiah Mahasiswa Nasional ke-34 tahun 2021 yang diadoan Universitas Sumatera Utara. Jauh sabalum tu, parnah pulo manjadi maskot acara Pekan Olaharaga dan Seni IX Bank Pembangunan Daerah se-Indonesia 2011 yang diadoan di Sumatera Utara di mano Bank Sumut batindak sabagai tuan rumah.