Batuang gilo

Batuang gilo marupokan parmainan anak nagari di Minangkabau nan barasa dari Kota Solok. Parmainan iko maikuik saratokan kakuatan supranatural atau jampi-jampi untuak manjalankannyo, walaupun indak di paralukan ritual tatantu. Daulunyo ado sabagian nagari ketek di Kota Solok ko sarupo Gawan, Payo, Tanah Garam, Sinapa Piliang jo lain sabagainyo mampunyoi banyak tanaman batuang. Katiko patani di daerah nan tasabuik sadang musim malambuik, manongkang, pamatang sawah tasabuik banyak nan hancua atau cayia nan mangakibekan panen samakin mangetek atau kurang manjadi. Jadi dek ulah itu patani ko mampagunoan batuang-batuang nan ado untuak manguekan pamatang sawah tasabuik. Oleh karano itu tradisi adaik di Kota Solok katiko sadang musim malambuik, manongkang para patani basamo-basamo mancari batuang untuak manguekan pamatang tasabuik, sajalannyo wakatu, para patani manjadian batuang ko sebagai pamainan nan maikuik saratokan ilmu jampi-jampi. Sehinggo pamainan batuang gilo tasabuik manjadi hiburan bagi masyarakaik satampek karano ado tantangan untuak maangkek nyo, batuang tasabuik taraso barek jo lia.

Caro-caro mamainkan "Batuang gilo" adolah:

Caro mamainkan batuang gilo indaklah payah, pamain hanyo mamaluak jo manahan batuang nan manggarik malonjak jo baputa sasuai kamauan tukang jampi-jampi . Katiko tukang jampi-jampi alah mamasuakan nan gaib kadalam batuang, sudah itu batuang akan manggarik surang. Salain tukang jampi atau urang nan pandai mambaco-bacoan batuang supayo manggarik surang ado surang tukang tokok gandang nan mairiangi parmainan iko, gandang ko untuak mambuek parmainan manjadi labiah sero. Sapanjang parmainan, tukang baco baco atau tukang jampi jampi taruih mangandalian batuang jo mambaco jampi jampi nyo , batuang tasabuik indak baranti manggarik sampai tukang baco baco atau tukang jampi jampi mamarintahan untuak baranti.

Dalam parmainan iko urang-urang nan maikutinyo indak buliah takabua . Nyampang ado nan takabua nan gaib tadi berang dan batuang tasabuik bisa baputa-puta surang, sabatang batuang dipacik dek babarapo urang, jumlah urang diparmainan iko harus ganjia, ado sabagian nan mancukuikan, nan disabuik mancukuikkan disiko iyolah makhluk gaib nan ikuik dalam parmainan batuang gilo tasabuik. Karano nan mancukuikkan atau makhluk gaib ikolah nan ka manggarikan batuang tasabuik sasuai parintah tukang jampi-jampi atau urang nan pandai mambaco bacoan batuang tasabuik supayo bisa manggarik surang malalui makhluk gaib.