Batombe

Batombe marupoan seni babaleh pantun nan disampaikan jo caro mandendangkan pantun antaro kaum laki-laki jo kaum padusi nan barasa dari Nagari Abai, Kecamatan Sangir Batang Hari, Kabupaten Solok Selatan, Provinsi Sumatra Barat.

Sijarah

Kasenian batombe bamulo dari tradisi mambangun Rumah Gadang. Dek Nagari Abai masih sangaik sunyi, masyarakaik pun takuik jo baragam ancaman mulai dari baragam binatang lia sarato cuaco. Karanonyo masyarakaik bainisiatif untuak mambangun Rumah Gadang nan ditampati basamo-samo. Tradisi Batombe batujuan untuak mamotivasi anak laki- laki supayo basamangaik manabang batang ka utan salapeh makan siang. Batang nan ditabang ka diolah manjadi tunggak, tiang, jo papan untuak mambuek Rumah Gadang patamo di Nagari Abai. Rumah Gadang tasabuik banamo Rumah Gadang 21 Ruang, rumah adaik tapanjang di Sumatra Barat. Salain bafungsi untuak manjago kasalamatan panduduak dari binatang bueh jo tampek hunian kaluarga, pambangunan Rumah Gadang tu dijadian sabagai tampek patamuan jo pusek pagalaran seni budayo.

Sabalu tradisi Batombe digala, biasonyo talabiah dahulu mambantai saikua kabau saindaknyo saikua kambiang. Tradisi Batombe nan indak mambantai taranak dianggap malangga aturan atau bautang sacaro adaik. Hal ko dikaikkan jo sabuah carito turun-tamurun di kalangan masyarakaik Nagari Abai. Pado mulonyo, sabatang kayu nan ka dijadian tiang Rumah Gadang 21 Ruang indak dapek ditabang. Tapi dek saikua kabau alah dibantai, batang tasabuik dapek ditabang dek panduduak Nagari Abai.

Sajak taun 1960-an indak ado pambangunan rumah adaik di Nagari Abai, tapi tradisi Batombe tatap bajalan. Masyarakaik Nagari Abai barupayo manjago sarato malastarian tradisi lisan Minang ko jo caro manjadiannyo sabagai media hiburan bagi masyarakaik, sarupo pado acara baralek, malewa gala datuak, festival kebudayaan, panyambutan tamu khusus, jo ajang promosi pariwisata daerah.

Kasenian Batombe

Batombe dimulai jo mambacokan pantun pambukaan dek saurang datuak. Pamain masuak arena sarato mambuek lingkaran. Pamain tadiri dari 10 urang laki-laki jo 3 urang padusi. 12 di antaronyo bagarak manari mambantuak garis lingkaran. Samantaro 1 lainnyo manari di dalam lingkaran. Kasenian Batombe diiriangi jo irama musik nan ceria. Alaik musik nan digunokan biasonyo tadiri dari gandang jo talempong. Kaduonyo dimainkan mangikuti irama tari jo nyanyian nan dibaokan pamain batombe. Kaceriaan tarian samakin mangajak jo samangaik sahinggo pado bagian akhia, nan manonton biasonyo bagabuang jo ikuik manari basamo-samo.

Pakaian Adaik Kasenian Batombe

Pamain Batombe mamakai baju khusus nan manyarupoi baju pamain randai atau silek, latak bedanyo talatak pado motif nan ado pado langan baju. Di randai atau silek biasonyo digunokan motif nan polos, samantaro Batombe ko disulam manggunokan banang ameh. Warna baju pun labiah bavariasi, sarupo merah, ijau, kuniang, jo itam. Pado bagian ikek kapalo biasonyo mamakai warna kuniang kaamehan, sadangkan pado pinggang dihias sahalai kain sulaman banang ameh. Samantaro untuak sarawa dirancang labiah gadang pado bagian pahonyo, sahinggo manyarupoi saruang.