Batintin

Wikipedia Minangkabau - Lubuak aka tapian ilimu
Loncat ke navigasi Loncat ke pencarian

Batintin, babondai, atau lagu gadang marupokan sastra lisan Minangkabau nan tadapek di 3 desa di Tanah Data: Rao Rao, Kumango, jo Tabek. Sastra lisan ko barupo berbalas pantun. Katigo nagari tasabuik manyabuik sastra lisan ko jo namo nan babeda: di Kumango disabuik jo batintin, di Rao-Rao disabuik jo babondai, dan di Tabek disabuik jo lagu gadang.[1]

Tahun 1970-an, tradisi ko indak ditamukan di nagari Tabek.[1] Samantaro itu, di nagari Rao-Rao jo nagari Kumango tradisi ko barubah manjadi sabuah partunjuakan yang ditampilan dalam acara parkawinan. Namun, tradisi iko pun alah langka dipartunjuakan di kaduo nagari tasabuik.[2]

Asal mulo[suntiang | suntiang sumber]

Batintin pado mulonyo marupokan kagiatan babaleh pantun dek pamuda-pamuda nagari nan sadang rundo malam atau bajago-jago. Kagiatan ko bamukauik untuak maisi wakatu jo mahilangkan kantuak. Dimulai dari pondok rundo (bahasa Indonesia: pos ronda), batintin balangsuang salamo pamuda-pamuda mangaliliangi nagari sambia manjago kaamanan hinggo baliak ka pos. Kadang- kadang, batintin ko ditunjuakan pado gadih idaman si pamuda katiko malewati rumahnyo. Kalau lai baruntuang dan si gadih alun lalok, si gadih akan mambaleh pantun tasabuik dari laman rumah.[1]

Pertunjukkan[suntiang | suntiang sumber]

Umumnyo, batintin diadokan sasudah Isya hinggo manjalang subuah.[2]

Partunjuakkan batintin tadiri dari 2 kalompok, masiang-masiang baranggotakan 5 sampai 20 urang barumua 17 hinggo 35 tahun. Kaduo kalompok saliang bahadokan jo saluruah badan kacuali mato disalimuikan saruang. Iko bafungsi untuak manutupi identitas diri supayo indak ado raso malu antaro pamain yang mungkin sajo sudaro kasadonyo. Baitu, partunjukkan diharokan dapek bajalan lancar. [2]

Untuak manambah karahasioan, partunjukkan diadoan di laman rumah atau lapangan tabukak tanpa panarangan. Panarangan biasonyo barasal dari bulan bilo sadang nampak.[2]

Partunjuakan diawali jo kasado pamain tagak. Satiok kalompok mampunyoi janang nan batugas mambukak pantun. Katiko janang alah bapantun, kasado pamain bajalan malingkar jo malanjuikan mambaleh pantun sacaro bagantian. Satiok pamain malatakan kaduo tangan di bahu pamain di sabalahnyo. Samantaro itu, kaki digarakan duo langkah ka muko jo ciek langkah ka balakang untuak mangiriangi pantun tiok-tiok pamain.[2]

Catatan kaki[suntiang | suntiang sumber]

  1. a b c Amir, Zuriati & Anwar 2006, hlm. 190.
  2. a b c d e Amir, Zuriati & Anwar 2006, hlm. 191.

Referesi[suntiang | suntiang sumber]