Batiak kaluak paku

Batiak kaluak paku adolah ciek dari sakian banyak motif ukiran batiak dalam Minangkabau. Barasa dari motif guluangan (kaluak) pado ujuang tanaman paku nan masih mudo. Indak hanyo kaluak paku ado bamacam-macam motif batiak nan ado di Minangkabau. Dari bamacam-macam jinih motif tu, ado makna nan babeda-beda. Makna nan ado dalam jenis motif batiak mampunyoi makna nan diambiak dari kaadaan atau situasi lingkungan nan dicaliak dari alam. Mangko dari situlah pangrajin batiak mandapekan sumber inspirasi dalam mambuek bamacam-macam jinih batiak. Makna nan ado dalam motif kaluak paku iyolah pado guluangan atau kaluak paku nan mampunyoi kaindahan sarupo panuah sumangaik jo tanago sainggo capek bagerak sarato manyasuaian diri jo keadaan. Salain itu ado pulo arati tasiraik dari batiak kaluak paku iyolah manggambakan sifaik kodrat manusia.

Pucuak paku pado mulonyo tumbuah malingka kadalam, nan kudian akhianyo tumbuah malingka ka arah lua. Baitu pulo manusia, nan pado mulonyo mangenal dirinyo talabiah dahulu sabalum malakuan sosialisasi jo interaksi ka lingkuangannyo. Ado pulo tasiraik makna paralunyo intropeksi diri sarupo baguluang kadalam talabiah dahulu, kudian barulah baguluang ka arah lua. Mokasuiknyo iolah sarancaknyo mangoreksi kasalahan surang talabiah dahulu baru kudian mangoreksi kasalahan urang lain.

Kaluak paku dalam adaik

Sarupo mamangan adaik mangatokan :

Kaluak paku kacang balimbiang

Tampuruang lenggang lenggokan

Baok manurun ka Saruaso

Tanam siriah jo ureknyo          

Anak dipangku kamanakan dibimbiang

Urang kampuang dipatenggangkan

Tenggang nagari jan binaso

Tenggang sarato jo adaiknyo

Mukasuiknyo iolah kaluak paku malambangkan tanggung jawek dari laki-laki minang nan mampunyoi duo fungsi yaitu sabagai ayah bagi anak-anaknyo sarato sabagai mamak bagi kamanakannyo. Inyo harus mambimbiang jo mandidiak anak sarato kamanakannyo sainggo manjadi urang nan baguno jo batangguang jawek ka kaluarga kaum jo nagari.