Bakaua

Wikipedia Minangkabau - Lubuak aka tapian ilimu
Loncat ke navigasi Loncat ke pencarian
Bakaua di Sijunjung

Bakaua adolah sabuah tradisi sakaitan jo partanian nan terdapat di babarapo daerah Minangkabau. Tradisi iko barupo samacam ritual tolak bala nan dilakuan sabalun atau basamoan jo kagatan turun ka sawah atau proses awal mangarajoan sawah.[1] Bakua dilakuan jo mamanjek doa basamo-samo kabakeh Allah SWT sambia bakaliliang kampuang jo mambakar kumayan. Masyarakaik picayo Allah SWT akan malindungi mereka dari sagalo marabahayo jo bencana.[2][3]

Kini, tradisi bakaua palahan mulai hilang di tangah masyarakaik. Babarapo daerah nan masih malakuan tradisi bakaua yakni daerah Solok, Sijunjung, joTanah Datar.[1][4][5][6]

Jinih[suntiang | suntiang sumber]

Sacaro garih gadang, bakaua dibagi ateh duo bagian, yakni bakaua ketek jo bakaua gadang. Pambagian ini tiko mangacu pado gadang atau keteknyo bantuak acara nan dilakuan. Bakaua ketek dilakuan jo acara saderhana indak mambutuahan biayo nan cukuik gadang, sadangkan bakaua gadang dilakuan jo mandabiah sapi (manggoroh) sabagai bantuak jamuan. Bakaua ketek hanyo dihadiri anggota kaluarga, sadangkan bakaua gadang dapek dihadiri satiok masyarakaik nan ado di nagari. Dek baitu, indak mangherankan pado bakaua gadang banyak urang nan datang.[1]

Panyalenggaro[suntiang | suntiang sumber]

Dalam bakaua, sadoalah patani supakaik turun ka sawah sacaro sarantak. Sabalunnyo, para patani duduak basamo talabiah dulu mangenai wakatu panyalenggaroan. Indak ado sangsi bagi patani nan indak ikuik bakaua. Sebab petani nan manggarap sawah, di lua hari nan alah ditantuan, baiak mandahului atau manyusua, mereka akan rugi surang dek padi nan dulu tabiik atau balakangan, akan menjadi santapan hama takah buruang, manciak, jo pianggang.[7]

Acara bakaua biasonyo dipimpin dek "urang siak" atau pamuko agamo nan ada di nagari. Urang siak nan dipiliah yaitu malalui kasapakatan basamo. Tugasnyo adolah mamimpin warga badoa kabakeh Allah. Mereka badoa kabakeh Allah agar tanaman padi dapek tumbuah subur sarato agar masyarakaik dapek hiduik rukun jo damai tahindar dari bala bencana.[1]

Pakaian nan dipakai dek paserta disasuaian jo tampek palaksanoannyo. Pado acara bakaua ketek nan tampeknyo barado di lokasi kagiatan, mako pakaian kaum laki-Iaki ikuik dalam acara bakaua mamakai pakaian karajo biaso, sadangkan urang siaknyo tetap mamakai pakaian kaagamoan, baiak dalam acara bakaua ketek maupun acara bakaua gadang. Samantaro itu, dalam acara bakaua gadang pakaian bagi kaum laki-laki disasuaian jo status sosialnya di tangah-tangah masyarakaik, sakironyo inyo saurang pangulu mako pakaiannyo haruslah pakaian pangulu. Bagi kaum padusi, tautamo ipa bisan, tetap mamakai baju kuruang basiba barono hitam.[1]

Kondisi kini[suntiang | suntiang sumber]

Dalam pajalannnyo tradisi bakaua gadang alah jarang basobok, dek banyak faktor nan manyebaban tradisi iko mulai dilupoan masyarakaik. Selain itu, maso turun ka sawah indak sarantak. Adopun bakaua ketek masih ado dilakuan dek masyarakaik basamo jo acara tolak bala.[1]

Catatan kaki[suntiang | suntiang sumber]

Rujuakan[suntiang | suntiang sumber]

Daftar pustaka[suntiang | suntiang sumber]

Pautan lua[suntiang | suntiang sumber]