Anggrek Tien Soeharto
Anggrek Tien Soeharto adolah anggrek endemik nan hanyo ditamukan di daerah tinggi nan kariang di Sumatra Utara. Anggrek nan namo latinnyo Cymbidium hartinahianum iko kali patamo ditamukan oleh Comber dan Rusdi E. Nasution, Paneliti Lembaga Ilmu Penelitian Indonesia (LIPI) di Desa Baniara Tele Kacamatan Harian Kabupaten Samosir Provinsi Sumatera Utara, Indonesia pado taun 1976.[1] Panamoan namo latin anggrek iko dibarian oleh istri kaduo Presiden RI, Soeharto, Raden Ayu Siti Hartinah Soeharto nan akrab disapo Ibu Tien. Pambarian namo iko didasari ateh jasonyo dalam baupayo malastarikan anggrek di Indonesia.[2]
Panjabaran
[suntiang | suntiang sumber]Salah ciek jenis anggrek tana iko mamiliki bungo babantuak bintang badiameter 3,5 cm batekstur saketek taba dan indak babaun. Ukuran kalopak daun jo mahkotanyo hampia samo gadang. Bibia bungo bawarno putiah jo corak totol merah manjulua ka muko tadiri dari 3 celah, bagian muko dilipek ka bawa jo tapi bagalombang, celah sampiang luruih ka ateh. Tugunyo bawarno violet galok sapanjang 1,2 cm.
Daunnyo babantuak pita jo ujuangnyo nan marunciang sapanjang 50-60 cm. Panjang batang 15-30 cm nan tadiri dari 4-21 kuntum. Pamukoan ateh bungonyo bawarno kuniang kaijauan dan pamukoan bawahnyo bawarno kacoklatan jo kuniang pado bagian tapinyo.
Anggrek Tien Soeharto tumbuah dengan caro marumpun, manyukoi tampek tabukak di antaro rumpuik jo tanaman lain samacam paku-pakuan, kantong semar, dan lainnyo.[3]
Tumbuahan iko iduik badampingan jo tumbuahan lain mode Nepenthes, Vaccinium, dan tumbuahan paku (Pteridophyta) mode Dacrydium, Leptospermum, kamiriangan lereang >60, tipe lahan kritis, jo jenis tanah Ao 104-2 /3c (Orthic acrisol) dengan curah ujan manampati 1500-2000 mm/ tahun.[4]
Samo mode Anggrek Itam, Anggrek Bulan Bintang, dan lainnyo, Anggrek Tien Soeharto iko tamasuak sabagai tanaman nan dilinduangi pamarintah karano tampek inyo iduik di ateh 1.700- 2.700 dari pamukoan lauik. Mangkonyo tanaman iko langka dan sulik dikambangbiakkan. Salain itu, kabaradoaannyo kini makin sulik ditamukan di habitat aslinyo karano tajadi parubahan fungsi utan manjadi lahan patanian.[4] Salain itu, panabangan utan di Sumatera Utara acok tajadi baik sacaro legal maupun ilegal.
Makonyo, anggrek iko dibao ka Kabun Raya Bogor untuak dilindungi dan indak dipajuabalikan. Iko alah ado di Paraturan Pamarintah Nomor 7 taun 1999. Jadi, bagi urang yang nio mamaliharo Anggrek Tien Soeharto harus mandapekan izin oleh pihak bawenang, mode Balai Konservasi Sumber Daya Alam (BKSDA).[2]
Upayo konservasi
[suntiang | suntiang sumber]Badasaran World Conservation Monitoring Centre status konservasi anggrek iko adolah endangered kategori A untuak spesies prioritas konservasi tumbuahan Indonesia. Pado taun 2004, tim eksplorasi dari Pusat Konservasi Tumbuhan Kabun Raya- LIPI Bogor nan dipimpin oleh Rismita Sari manamukan tanaman Anggrek Tien Soeharto sarato buahnyo di habitat aslinyo. Tim mananam anggrek tasabuik di Kabun Raya Cibodas, Kabupaten Cianjur, Jawa Barat. Hasilnyo Anggrek C. hartinahianum indak dapek iduik lamo karano Kabun Raya Cibodas berketinggian 1.300-1.425 m dpl dan curah ujan 2.950 ml pa tahun.
Satalah itu, Tim jugo manyamai baniah di Laboratorium Kultur Jaringan Kabun Raya Bogor. Upayo pabanyakan Anggrek Tien Soeharto di Kabun Raya-LIPI Bogor antaro lain dengan mapabanyak anggrek dari biji sacaro in vitro, hardening atau pangadaptasian di suhu ruang kultur nan labiah angek, sarato aklimatisasi bibit di greenhouse. Iko karano biji anggrek baukuran sangaik ketek dan indak mampunyoi cadangan makanan, yaitu endosperma dan kotiledon mode kabanyakan biji tanaman monokotil lainnyo. Oleh sabab itu, pakacambahan biji sacaro alami sangaik sulik dilakukan. Pakacambahan sacaro alami dapek tajadi bilo ado simbiosis jo mikoriza. Kabaradoan mikoriza dapek diabaikan, jikok pakacambahan biji malalui kultur in vitro jo media buatan.
Praaklimatisasi (hardening in vitro) marupokan pangkondisian planlet untuak maningkekan kabarhasilan aklimatisasi. Panyiraman dilakukan jo aia hinggo media basah (lambok). Medianyo indak buliah lambok bana karano dinding sel tanaman indak kareh (tipih dan lembut) dan indak capek busuak dan mati. Upayo lain barupo induksi katahanan tahadok cakaman abiotik (suhu tinggi) dengan iradiasi sinar gamma pado kacambah anggrek untuak mandapekan mutan tahan suhu tinggi.
Kini tim panaliti alah mamparoleh 700 bibit taraklimatisasi baumua 1-9 bulan. Tim barupayo untuak maningkekan jumlahnyo hinggo 1.000 bibit pado akhir 2017. Kegiatan aklimatisasi iko balangsuang hinggo sado bibit dapek batahan iduik.[5]
Upayo lain dilakukan juo oleh kalompok mahasiswa nan tagabuang dalam PKM-P tadiri dari Febry Indriani Syafitri, Desi Sakinah Tinendung, Ibnu Arief nan malakukan pametaan untuak manantukan wilayah konservasi Anggrek Tien Soeharto.
Informasi iko dapek digunokan untuak manyusun upayo konservasi nan efektif dan efisien sahinggo dapek manjago Anggrek Tien Soeharto di Sumatera Utara tahinda dari kapunahan. Manuruik mereka sajauah iko alah ditamukan 45 titik sampel kabaradoan Anggrek Tien Soeharto nan diparoleh dari wilayah Gunuang Sibuatan, Kabupaten Karo, Provinsi Sumatera Utara jo katinggian 1800-2400 mdpl.[6]
Rujuakan
[suntiang | suntiang sumber]- ↑ "Anggrek Bu Tien Soharto - National Geographic". nationalgeographic.grid.id (dalam bahasa Indonesia). Diakses tanggal 2022-04-22.
- ↑ a b Prakasa, Hary. "Mengenal Anggrek Tien Soeharto (Cymbidium hartinahianum J.B. Comber & Nasution) – INOVASI BIOLOGI" (dalam bahasa Inggris). Diakses tanggal 2022-04-22.
- ↑ "E-Publication of Research Center for Plant Conservation and Botanic Gardens". publikasikr.lipi.go.id. Diarsipkan dari versi asli tanggal 2022-05-19. Diakses tanggal 2022-05-28.
- ↑ a b "IDENTIFIKASI HABITAT ANGGREK TIEN SOEHARTO (CYMBIDIUM HARTINAHIANUM JB COMBER & NASUTION) DI GUNUNG SIBUATAN SUMATERA UTARA - PDF Free Download". docplayer.info. Diakses tanggal 2022-05-28.
- ↑ https://thehijau.com/selamatkan-anggrek-tien-soeharto/[pranala nonaktif permanen]
- ↑ Kusumo, Rizky. "Anggrek Tien Soeharto, Kenangan kepada Ibu Negara yang Mencintai Tanaman". www.goodnewsfromindonesia.id (dalam bahasa Indonesia). Diakses tanggal 2022-07-13.