Lompat ke isi

Andrinof Chaniago

Wikipedia Minangkabau - Lubuak aka tapian ilimu
Andrinof Chaniago

Andrinof Achir Chaniago atau nan labiah dikana oleh masyarakaik yaitu Andrinof Chaniago marupokan pangamaik ekonomi politik sarato kabijakan publik. Inyo cukuik dakek samo Presiden RI katujuah yaitu Joko Widodo (Jokowi) sajak Jokowi masih manjabaik Walikota Solo, Gubernur DKI Jakarta hinggo manjadi Presiden tahun 2014 lalu. Andrinof parnah manjadi Mantari Parancanoan Pambangunan Nasional (PPN)/Kapalo Badan Parancanoan Nasional (Bappenas) dalam kabinet Jokowi-Jk. Sampaik pulo manjadi Komisarih Utamo BRI dan kini manjabaik Wakil Komisarih Utamo Bank Mandiri.[1]

Maso Ketek

[suntiang | suntiang sumber]

Andrinof lahia pado 3 November 1962 di Padang. Namo abaknyo Sutan Akhirudin sadangkan amaknyo Zaidar. Abaknyo baasa dari Kasiak, Nagari Koto Sani, Solok. Amaknyo dari Nagari Sumpu, Tanah Datar.[2]

Sawakatu ketek, Andrinof hiduik dalam kasusahan, ekonomi payah sahinggo inyo ikuik mambantu urang tuo bakarajo macari pitih. Inyo mamaruik ubi kayu nan ka dijadian kue talam dek amaknyo untuak dijua ka pasa. Rumahnyo dakek palabuhan Taluak Bayua, sahinggo kadang di waktu sanggang inyo jadi tukang angkuik barang disinan. Dek karano talampau sero bamain jo mancari pitih, Andrinof sampaik baranti sikolah di kelas limo SDN 46 Padang salamo satangah tahun atau ciek semester. Inyo baru namuah sikolah katiko dibujuak dibalian baju baru dek anduangnyo.[1]

Sabananyo, Andrinof wkatu ketek nio marantau tapi ndak diizinan. Inyo baru bisa marantau di kelas 2 MTs dan tingga samo dunsanaknyo di Jakarta. Inyo sikolah di SMP Ma'arif Grogol, Jakarta Baraik. Sajak di siko lah inyo suko mambaco karya Buya Hamka jo W.S Rendra. Bahkan dek hibino manulih puisi ko, sawakatu kelas 2 SMP puisinyo masuak Kompas edisi 13 Oktober 1978 nan bajudul "Pintu".[1]

Maso Kuliah

[suntiang | suntiang sumber]

Andrinof SMA di SMA 56 tegal Alur, Jakarta Baraik lalu kuliah di Universitas Indonesia maambiak jurusan Ilmu Politik di Fakultas Ilmu Sosial jo Ilmu Politik (FISIP).[1] Inyo aktif manulih dan babarapo tulisannyo masuak di Kompas samaso Kuliah. Dek karano aktif dan kritih, inyo bahkan parnah manjabaik sabagai Katua Badan Parwakilan Mahasiswa jo Katua Umum Senat Mahasiswa FISIP UI.[1]

Skripsi Andrinof nan bajudul "Masalah Pangalihan Teknologi untuak Pangambangan Industri Kapa Tabang Nusantara" mambuek panaliti dari nagari Singapura tartarik. Panalitu tu mambahas skripsi tu jo direkturnyo. Direktur tu maundang Andrinof untuak Fellow salamo sabulan di nagari Singapura sarato bakarajo samo jo panaliti lain nan rato-rato alah Doktor samo calon Doktor.[1]

Manjadi Asisten Dosen

[suntiang | suntiang sumber]

Sakambalinyo dari nagari Singapura, Andrinof dipacayo manjadi panaliti junior di Limbago Panalitian jo Pangambangan (Litbang) FISIP UI. Ndak lamo siap tu, nyo diangkek manjadi asisten dosen oleh Dr. Farhan Bulkin. Kurang labiah tigo tahun maaja di UI, tibo-tibo nyo dibarantian samo Dekan FISIP nan baru karano dianggap indak mamanuhi syaraik. Manuruik Andrinof, inyo dibarantian dek karano ado konflik politik di internal fakultas.[1]

Luntang-lantuang samanjak dibarantian dari asisten dosen, Andrinof bakarajo lapeh jo paruah wakatu. Nyo sempat bakarajo di majalah Ummat sabagai Koordinator Bagian Riset jo Bank Data.[3] Tigo tahun siap tu pindah ka harian ekonomi Neraca manjadi Kapalo Kompartemen Riset jo Bank Data namun satalah itu nyo baranti karano produktivitas parusahaan manurun dek efek krisih ekonomi tahun 1997-1998.[1]

Buku nan Malambuangan Namo Andrinof Chaniago

[suntiang | suntiang sumber]

Samanjak baranti, Andrinof bakarajo mandiri di rumah lalu manulih buku nan bajudul "Gagalnya Pembangunan: Telaah Ekonomi Politik Terhadap Akar Krisis 1998"[4] hinggo kini buku ko manjadi salah satu buku sumber di barbagai kampus di Indonesia.[5]

Kuliah Pascasarjana

[suntiang | suntiang sumber]

Andrinof sadar dirinyo tatingga dari sagi pandidikan untuak kalangan saurang pangamaik politik, sahinggo mamutuihan untuak kambali masuak kampus manjadi mahasiswa dan malanjuikan kuliah S2 di jurusan Magister Parancanoan jo Kabijakan Publik di Fakultas Ekonomi jo Bisnih (FEB) dan batami jo dosen senior Dr. Isbodroini nan saat tu manjabaik Katua Program Pascasarjana dan samanjak itu pulo Andrinof kambali maaja sarato mamegang mato kuliah Ekonomi Politik, Kabijakan Publik jo babarapo mato kuliah nan lain.[1]

Managakan Limbago Survei

[suntiang | suntiang sumber]

Andrinof mancubo paruntuangan di ranah nan babedo. Inyo mancubo mandirian limbago survei dan maagiah namo Center for Indonesian Regional and Urban Studies (CIRUS) tahun 1999. Namonyo samakin dikana samo masyarakaik. Namonyo makin naiak katiko limbago surveinyo ikuik sarato dalam survei-survei Pemilu. tahun 2008 nyo kambangan jaringan limbagonyo dan mandirian CIRUS Surveyors Group.[6]

Sitasi di Google Scholar

[suntiang | suntiang sumber]

Sampai awal tahun 2024, sagalo tulisan Andrinof nan tainput di Google Scholar alah dikutip sabanyak 380 kali dan itu alun tamasuak urang nan mangutip tulisannyo nan indak ditabikan. Hal iko manunjuakan bahwosanyo Andrinof cukuik tanamo di dunia akademik tanpa disadari. Tulisannyo nan tainput di Google Scholar nan bajudul "Perkoperasian Indonesia" nan ditulih tahun 1984 disitasi 156 kali[7] lalu bukunyo nan bajudul Gagalnya Pembangunan: Telaah Ekonomi Politik Terhadap Akar Krisis 1998" alah disitasi sabanyak 76 kali.[8]

Daftar Tulisan nan alah tainput di Google Scholar:

  1. Perkoperasian Indonesia[7]
  2. Gagalnya Pembangunan: Telaah Ekonomi Politik Terhadap Akar Krisis 1998[8]
  3. Ekonomi 2[9]
  4. Gagalnya Pembangunan: Membaca Ulang Keruntuhan Orde Baru[10]
  5. Koperasi Indonesia[11]
  6. Ekonomi dan Koperasi[12]
  7. Perekonomian Indonesia[13]
  8. Pendidikan Perkoperasian Indonesia[14]
  9. Rencana Pembangunan Jangka Menengah Nasional 2015-2019[15]
  10. Profesionalitas dan Netralitas Birokrasi: Menuju Daya Saing Ekonomi Daerah: Studi di Empat Provinsi[16]
  11. Memelihara Kelestarian Lingkungan Hidup[17]

Rujuakan

[suntiang | suntiang sumber]
  1. ↑ a b c d e f g h i Chaniago, Hasril (ed). 2023. Ensiklopedia Tokoh 1001 Orang Minang. Padang: UMSB Press.
  2. ↑ "Profil Andrinof Achir Chaniago - VIVA". www.viva.co.id (dalam bahasa Indonesia). 2016-10-24. Diakses tanggal 2024-01-16. 
  3. ↑ Pepnews. "Anak Pelabuhan Teluk Bayur Lulus 'Summa Cumlaude' Kabinet". Pepnews.com (dalam bahasa Indonesia). Diakses tanggal 2024-01-16. 
  4. ↑ Chaniago, Andrinof, Achir. 2001. Gagalnya Pembangunan: Kajian Ekonomi Politik Terhadap Akar Krisis Indonesia. Jakarta: LP3ES
  5. ↑ https://fisip.unjani.ac.id/wp-content/uploads/2017/12/Kapita-Selekta-Hubungan-Internasional.pdf Archived 2020-03-31 di Wayback Machine. (Diakses 16 Januari 2024)
  6. ↑ https://www.ui.ac.id/alumni/drs-andrinof-achir-chaniago-m-si/ (Diakses 16 Januari 2024)
  7. ↑ a b "‪Perkoperasian Indonesia‬". scholar.google.co.id. Diakses tanggal 2024-01-16. 
  8. ↑ a b "‪Gagalnya pembangunan: kajian ekonomi politik terhadap akar krisis Indonesia‬". scholar.google.co.id. Diakses tanggal 2024-01-16. 
  9. ↑ "‪Ekonomi 2‬". scholar.google.co.id. Diakses tanggal 2024-01-16. 
  10. ↑ "‪Gagalnya pembangunan: membaca ulang keruntuhan Orde Baru‬". scholar.google.co.id. Diakses tanggal 2024-01-16. 
  11. ↑ "‪koperasi Indonesia‬". scholar.google.co.id. Diakses tanggal 2024-01-16. 
  12. ↑ "‪Ekonomi dan Koperasi‬". scholar.google.co.id. Diakses tanggal 2024-01-16. 
  13. ↑ "‪Perekonomian Indonesia‬". scholar.google.co.id. Diakses tanggal 2024-01-16. 
  14. ↑ "‪Pendidikan Perkoperasian Indonesia‬". scholar.google.co.id. Diakses tanggal 2024-01-16. 
  15. ↑ "‪Rencana Pembangunan Jangka Menengah Nasional 2015-2019‬". scholar.google.co.id. Diakses tanggal 2024-01-16. 
  16. ↑ "‪Profesionalitas dan netralitas birokrasi: Menuju daya saing ekonomi daerah: Studi di empat provinsi‬". scholar.google.co.id. Diakses tanggal 2024-01-16. 
  17. ↑ "‪Memelihara kelestarian lingkungan hidup‬". scholar.google.co.id. Diakses tanggal 2024-01-16. 
Diambiak dari "https://min.wikipedia.org/w/index.php?title=Andrinof_Chaniago&oldid=3153572"