Anas Nafis
Anas Nafis (lahia di Padang Panjang, 9 Januari 1932 – maninggaa di Padang, 18 April 2007 pado umua 75 taun ) adolah saurang panaliti, akademisi, seniman, budayowan jo tokoh Sumatra Barat.
Inyo adolah adiak dari sastrawan Ali Akbar Navis. Apaknyo banamo Navis gala Sutan Marajo, saurang pagawai Staatsspoorwegen (jawatan kareta api zaman Balando), jo amaknyo banamo Sawiyah.
Sabagai anak saurang pagawai sabuah jawatan kareta api, kaluarga Navis acok bapindah-pindah tampek. Pado maso panjajahan Japang, kaluarga Navis pindah ka Duku. Sataun manjalang Japang kalah parang, apak Anas Navis ditangkok Kempeitai satalah itu dipanjorokan di Bangkinang jo kaluarga Anas Navis pindah baliak ka Silaiang, Padang Panjang. Pado awal-awal kamerdekaan, satalah Navis dibebaskan dari panjaro, inyo pindah ka Bukittinggi.
Sakolah jo mangaja
[suntiang | suntiang sumber]Sasudah Indonesia mardeka, Anas Nafis baliak basakolah di SMA. Sabalumnyo, pado maso panjajahan Japang, Anas sakolah di HIS Muhammadiyah, Guguak Malintang. Sambia basekolah, Anas nan manjadi siswa kelas III SMA tu, juo alah ikuik mangaja sabuah SMP Swasta. Uniknyo, SMA jo SMP tu ciek gedung sakolah. Pagi Anas manjadi siswa SMA, siangnyo mangaja siswa SMP tasabuik. Taun 1952, Anas Nafis lulus ujian tarakhia SMA.
Satalah lulus dari SMA, Anas Nafis barencana manjadi guru di daerahnyo. Hal ko dikaranokan kondisi amaknyo, Sawiyah, nan hampia satahun mandarito sakik. Namun, Uda-nyo A.A Navis manyuruahnyo untuak taruih malanjuikan sakolah.
Patangahan Juli 1952 Anas Nafis barangkek ka Jawa untuak malanjuikan sakolah. Namun, saat masih barado di Jakarta, tanggal 2 Agustus 1952, amaknyo maningga dunia, A.A Navis managahannyo pulang jo maagiahnyo samangek untuak taruah malanjuikan sakolah. Jo parasaan campua aduak, Anas Nafis barangkek juo ka Yogyakarta jo mandaftar di Universitas Gajah Mada.
Raso rindu batamu saudara nan ditingga amaknyo, mandorong Anas kambali pulang kampuang. Desember 1955, Anas manjajakkan kakinyo Padang. Babekal beslit guru nan didapeknyo, Anas Nafis mangajaa di Pariaman dalam rangka pangarahan tanago mahasiswa.
"Sang Referensi"
[suntiang | suntiang sumber]Sajumlah ide bisa mangalia dari carito Anas Nafis. Sastrawan A.A Navis saat manulih novel Robohnya Surau Kami (1956) idenyo barasal dari Merontokkan Surau Anduang Montok Belakang Gudang. Ide nan muncua katiko inyo tingga di Padang Panjang. Salain panaliti, akademisi, seniman jo budayowan nan maminjam referensi nan dipunyoinyo, pajabat daerah juo suko mamanfaatkan jaso Anas Nafis.
Salain mangumpuakan literatur tantang Minangkabau jo Sumatra Barat, taun 1987 Anas Nafis manggageh badirinyo Pusat Dokumentasi jo Informasi Kabudayoan Minangkabau (PDIKM) di Padang Panjang. Niek itu mandapek sokongan dari mantan Kapalo Bulog, Bustanil Arifin. Kamudian dibangunlah rumah bagonjong untuak dijadikan museum PDIKM nan samanjak itu manjadi salah satu tujuan wisata utamo Sumatra Barat.
Taun 2004, 10 naskah carito rakyat Minangkabau nan inyo sadua, ditabikkan Pusat Pangkajian Islam jo Minangkabau (PPIM). Anas Nafis juo manulih buku Peribahaso Minangkabau (1997) nan alah mangalami cetak ulang bakali-kali. Sajumlah skenario yang ditulisnyo alah difilmkan di TVRI, sarupo Dang Tuanku (1975) jo Perang Kamang (1980), searato mangolah carito jo sinopsis film Palasik untuak RCTI (1997).
Maningga
[suntiang | suntiang sumber]Tanggal 18 April 2007, pado pukua 08.00 WIB, dalam umua 75 taun, Anas Nafis pai untuak salamo-lamonyo. Anas manghambuian nafas di rumahnyo, sabuah rumah kontrakan di Jl. Aua Duri No.3A Padang jo dimakamkan di TPU Tungguitam, Padang.
Rujuakan
[suntiang | suntiang sumber]- (Indonesia) Gufron, Anas Nafis: "Referensi" Sumbar Yang Dilupakan, Ranah-Minang.Com: 21 April 2007
Pranala lua
[suntiang | suntiang sumber]- (Indonesia) Ranah-Minang.Com
- (Indonesia) Yurnaldi, Anas Nafis, Referensi Berjalan Minang, Kompas, Kamis, 06 April 2006