A. Damhoeri

Wikipedia Minangkabau - Lubuak aka tapian ilimu
Loncat ke navigasi Loncat ke pencarian

A. Damhoeri[1] adolah sastrawan asal Minangkabau. Namo asli sastrawan awak ko adolah Ahmad Damhoeri. Baliau labiah dikenal jo namo pendek A. Damhoeri. Sahari-harinyo, Baliau akrab disapo A. Dam, Bung Adam, Pak Adam, atau A. Damhoeri Pangarang. Baliau lahia di Batu Payuang, Kabupaten Limapuluh Kota, Sumatra Barat, 31 Agustus 1915.[2]

Sakolah jo Karajo[suntiang | suntiang sumber]

A. Damhoeri partamo sakali basakolah di Sakolah Desa nan lamonyo tigo taun di Batu Payuang, kudian malanjuikkan ka Jongen Vervoischool, Sakolah Gubernemen Kelas Duo di Bangkinang Riau salamo duo taun dan salasai taun 1928. Damhoeri melanjutkan sakolah ka Normaal School, Sakolah Guru di Padangpanjang dan salasai taun 1943. Pendidikan formal Damhoeri hanyo sampai Normaal School tu, salanjuiknyo Damhoeri baraja ilmu sastra, agamo, dan lainnyo sacaro otodidak. Ijazah nan alah dipunyoi tu manjadi modal gadang dek A. Damhoeri untuak manjadi guru sainggo Baliau dapek mulai maaja di taun 1934.[3]

Pado taun 1934—1936 A. Damhoeri manjadi guru Sakolah Desa. Pado taun 1938—1940, Damhoeri maaja di Sakolah Gemente Medan. Pado taun 1940—1942, Damhoeri maaja di HIS Medest Medan. Pado taun 1943—1946, Damhoeri maaja di Sakolah Sambungan Payokumbuah. Pado taun 1947—1956, Damhoeri manjadi Kapalo Sakolah di Sitonang Payokumbuah.

Riwayat Mangarang[suntiang | suntiang sumber]

Salain terlibat aktif di dunia pandidikan, A. Damhoeri pun maurus bidang kebudayaan. Baliau pernah manjabat sabagai Kapalo Inspeksi Kebudayaan di Sumatra. Pado taun 1956—1958, Damhoeri manjadi Kapalo Seksi Kesenian Perwakilan Daerah Kebudayaan Sumatra Tangah di Bukittinggi. Pado taun 1960—1963, Baliau manjadi Kapalo Seksi Kesenian Inspeksi Daerah Kebudayaan Sumatra Barat. Pado taun 1964—1971, Damhoeri manjadi Kapalo Inspeksi Kebudayaan Daerah I Kota Payokumbuah. Pado taun 1946, Damhoeri manjadi anggota Sidang Pangarang, Departemen Pendidikan dan Kebudayaan di Bukittinggi. Pado taun 1947, Damhoeri diangkek manjadi Ketua Komite Nasional Batupayuang.

Paratian A. Damhoeri ka dunia tulih-manulih mulai tampak sajak Baliau basakolah di Sakolah Desa. Pado usia 20 taun, A. Damhoeri manyalasaikan novel partamonyo Mencari Jodoh nan ditabikkan dek Balai Pustaka pado taun 1935. Novel Mencari Jodoh sangaik disukoi urang banyak wakatu itu dan bakali-kali dicetak ulang. Salain manulih novel, Baliau pun manulih carito pendek, carito anak, puisi, sarato buku pelajaran sakolah. Baliau pernah pulo manulih teka-teki silang wakatu maasuah Ruang Kesusasteraan di majalah Panji Pustaka.

Dalam riwayat iduiknyo tatulih baraso A. Damhoeri tamasuak salah sorang pangarang pado tigo zaman, yaitu: zaman penjajahan Balando, zaman penjajahan Jepang, sarato zaman kemerdekaan. Pado zaman Balando manjajah nagari awak ko, A. Damhoeri pernah manggunokan namo samaran Aria Diningrat. Sabagai pangarang, Damhoeri adolah anggota Organisasi Pengarang Indonesia (OPI).

Di sampiang aktif sabagai pangarang, Damhoeri aktif pulo di dunia penerbitan. Baliau mulai mangarang sajak taun 1931 dan pernah ditahan salamo 4 bulan karano delik (palanggaran undang-undang) pers ateh artikelnyo "Timor, Ranah Airku" nan dimuek di surek kaba harian Persamaan di Padang taun 1937. Kariernyo di bidang tulis-manulih bamulo dari Majalah Taman Kanak-Kanak Panji Pustaka. Pado taun 1932—1934 A. Damhoeri mulai mambantu majalah Panji Pustaka untuak mamajukan dunia kesusasteraan. Sasudah itu, pado taun 1938—1939 A. Damhoeri manjadi redaktur majalah Dunia Pengalaman.[4]

Rumah Tanggo[suntiang | suntiang sumber]

A. Damhoeri manikah duo kali. Partamo manikah jo padusi sajorong jo Baliau, Batu Payuang. Karano urang rumah partamo ko maningga, pangarang nan guru ko manikah baliak jo padusi di Jorong Lurah Bukik. A. Damhoeri kini alah maningga. Baliau maningga di Jorong Lurah Bukik, Nagari Balai Panjang,Kecamatan Sago Halaban, Kabupaten Limopuluah Koto, Provinsi Sumatra Barat pado  6 Oktober 2000[5], katiko baumua 85 taun.  Sastrawan awak ko maninggakan  banyak karangan, bahkan banyak karangan nan alun sempat bacetak dan masih tasimpan di perpustakaan pribadi Baliau di Jorong Lurah Bukik.

Karya[suntiang | suntiang sumber]

Di bawah ko adolah daftar karya A. Damhoeri nan alah dipublikasikan.

Cerpen:

1.       "Lebai nan Sial" dalam Pandji Poestaka No. 11—12 Taun ka-10. (1932): 166—168

2.       "Redakteur Chilaf, Medewerker Djadi Mempelai" dalam Pandji Islam No. 13 Taun ka-5 (1938: 305—306)

3.       "Sepaham Sependirian" dalam Pandji Islam No. 4 taun ka-5 (1938: 33—95)

4.       "Rendang Padang" dalam Pandji Islam No. 43—44 taun ka-8 (1941: 836—839)

5.       "Djalan Belakang" dalam Waktu No. 19 taun ka-9 (1955: 36—37)

6.       "Latifa" dalam Waktu No. 26 taun ka-9 (1955: 36—38)

Carito Basambuang:

7.       "Ratu dari Pulau Mentawai" dalam Pandji Islam No. 10—28 Taun ka-8 (1941) 

8.       "Sahabat Sedjati" dalam Pandji Poestaka tanggal 6, 13, 20, sarato 27 Oktober 1933.

Puisi:

9.       "Di Pekuburan" dalam Pandji Poestaka No. 83 taun ke-11 (1933: 1299),

10.    "Ingin Beta hendak ke Sana" dalam  Pandji Poestaka No. 6 taun ke-11 (1933: 246)

11.    "Terkenangkan Bunda" dalam Pandji Poestaka No. 93 Taun ke-11 (1933: 1460)

12.    "Bedaja" dalam Pandji Poestaka 13 Januari 1933

13.    "Kendiri" dalam Poedjangga Baroe No. 12 Taun ke-1 (1934: 371)

Novel:

14.    Depok Anak Pagai, 1935 dan 1965 (cetakan IV). Jakarta: NV. Nusantara,

15.    Dari Gunung ke Gunung, 1950, Medan: Saiful,

16.    Kurir, 1950, Medan: Tjerdas

17.    Garis Demarkasi

18.    Domba Kencana

19.    Petualangan si Hitam

20.    Menempuh Jalan Buntu

21.    Nahkoda Tenggang

22.    Terompah Usang  jang Tak Sudah Didjahit, 1953. Jakarta: Balai Pustaka,

23.    Mentjari Djodoh, 1962 (cetakan IV), Jakarta: Nusantara

24.    Telaga Darah,1964. Payokumbuah: Eleonora

25.    Rahasia dalam Surau (Raja Katak Mengamuk), 1968: Kuala Lumpur: Pustaka Antara

26.    Si Loreng dari Rimba Mangkisi, 1989, Jakarta: Balai Pustaka

27.    Hoelobalang Teungkoe Oemar, 1939, Balai Pustaka

Esai:

28.    "Penerbitan Inpres: Dampak Positifnya terhadap Penerbit dan Pengarang", Singgalang, 19 Oktober 1985

29.    "Efek Penerbitan Inpres pado Penerbit", Singgalang, 21 Oktober 1985

30.    “Menempuh Jalan Buntu: Masalah 2820 dari PN Balai Pustaka”, 1980, Balai Pustaka.

Rujuakan[suntiang | suntiang sumber]

  1. https://id.wikipedia.org/wiki/A._Damhoeri
  2. Rampan, Korrie (2000). Leksikon Sastra Indonesia. Jakarta: Balai Pustaka. 
  3. Atisah. 1995. Biografi dan Karya A. Damhoeri. Jakarta: Pusat Pembinaan dan Pengembangan Bahasa.
  4. http://ensiklopedia.kemdikbud.go.id/sastra/artikel/A_Damhoeri
  5. Harian Haluan, 1 November 2011. “Ziarah Mengenang Sastrawan A. Damhoeri”. Situs Harian Haluan.