Randang Lokan
Randang lokan marupokan salah satu makanan khas masyarakaik di Kanagarian Indopuro, Kecamatan Pancung Soal, Kabupaten Pesisir Selatan. Makanan iko babahan dasa jinih sipuik nan iduik di aliran Batang Aia Indopuro. Makanan ko alah ado sajak ratusan taun nan lalu dalam masyarakaik Indopuro. Bilo salamo ko nan tanamo randang sabagai sajinih masakan tradisional di daerah Sumatera Barat nan babahan baku utamo dagiang jawi atau kabau, mangko makanan ko manjadian sipuik batang aia sabagai bahan baku utamo. Hal ko disababkan dek karano sipuik tasabuik cukuik banyak iduik di tapian batang aia sarato manganduang banyak gizi jo protein nan tinggi[1]. Randang lokan manjadi samba utamo nan musti ado dalam acara-acara adaik di Indopuro sarupo acara baralek lainnyo.
Rujuakan[suntiang | suntiang sumber]
- ↑ Asnan, Gusti (2003). Kamus Sejarah Minangkabau. Padang: Pusat Pengkajian Islam dan Minangkabau. pp. 216. ISBN 979-97407-0-3.
